فكرة مشروع مش محتاج راس مال كبير وربحه عالي . رأيكم ؟؟

ازيكم ياشباب

في فكرة مشروع مش محتاج راس مال كبير ولآ تكاليف وربحه عالي والفكرة دي جت ف بالي من فترة

هي عربية غزل بنات وفشار ف نفس الوقت بس عربية شيك مستوردة مش زي اللي بيمشوا ف أغلب شوارع مصر

وطبعا هحتاج مكان راقي أقف فيه علشان متبهدلش من اللف وعلشان برضه الواحد ميهينش نفسه


المشكلة بقى ف المكان

أنا محتاج حديقة مشهورة وعليها تردد عالي وياريت برضه لو حد يعرف ف أسعار تأجير مكان صغير فيها

يعني الأزهر بارك مثلا أو الحديقة الدولية أو كورنيش مثلا أو ف منطقة راقية زي روكسي أو المهندسين

ياريت حد يفيدني ف الموضوع ده خصوصا اني مش من القاهرة برضه

أنا شغلتي الأساسية مهندس زراعي واللي خلاني أفكر ف الفكرة دي هو اني مش بحب روتين الشغل وعايز أبقى بدماغي مش عايز حد يتحكم فيا يعني

ممكن تقف في المولات
شفت عربية غزل بنات في هايبر وان بيعمل اشكال جديدة وغريبة وبيبيع الواحدة ب 20 ج
غير الزلابيا اللي عاملة شغل جامد :)

فكرة ممتازة
في شباب من الأسكندرية عملوا مشروع مشابه
مشروع كافيتريا متنقلة (على شكل مج تقريبا)
وقفوا بيها قدام مول مشهور
بيقدموا مشروبات ساخنة نضيفه في كبايات بلاستيك أو فوم
بيبيعوا كانزات و عصاير و جرانيتا و هكذا

قابلتهم المشاكل الآتية
سايس المنطقة بيشرب و يعزم على صحابه فردة
الحي بيجي ياخد اللي فيه النصيب
عرباوي شغل ابنه معاهم بالعافية
أمين شرطة بيجي من فترة للتانيه ياخد اللي فيه النصيب
وجود كافيتريات ثابته بتقدم مشروبات معتادة و أقل طبعا في الجودة و وجود الشباب دول أثر على أرباحه

مشاكل من هنا على مشاكل من هناك
بلطجية شوية
داخلية شوية
الحي شوية

الموضوع بقى غير مربح و مشاكله كتير
قفلوا و رجعوا أشغالهم تاني

فكر كويس و حدد المكان و التراخيص اللازمة و أصحاب القوة في المنطقة اللي هتقف فيها
و أعرف مين هيتضرر من وجودك و ممكن يحاربك إزاي و هتقدر تدافع عن نفسك و لا لأ

بالتوفيق

شكرا لتفاعلكم الإيجابي مع الموضوع وأنا مستغرب لأني حسيت اني هلاقي ردود سلبية علشان يمكن ف الظاهر إن الفكرة دي مهينة للي هيعملها !!

بس تمام يعني

timtim صعب حوار المول دي هياخد فلوس جامدة مني غير اني لسة مبتدئ يعني
متعرفش مثلا مكان كويس تاني زي نادي مشهور أو منطقة كورنيش راقية أو منطقة سينيمات أو حديقة ؟؟

abohend مهو أنا برضه مش هختار أي مكان يعني وبعدين هي هتبقى متنقلة يعني لو حصل مشاكل أنقل مكان تاني
ياريت تفيدني أكتر ف حوار المكان ده ؟؟

يعني حتى لو على رصيف امام المول او قريب من الباركنج هاياخد فلوس كتير برضه؟
الاماكن اللي فيها هايبر ماركت بيبقى عليها حركة كتير اوي...

timtim أنا شايف ان اللي بيروح هايبر أو كدة مش بيبقى ف دماغه يجيب فشار مثلا أو غزل بنات وهو مروح يعني !!
يعني الموضوع ده موجه أكتر لل Couples والناس اللي رايحة تتفسح

يعني سينما نادي حديقة كلية مثلا !!

انت اي رأيك ؟؟

شوف حي الزمالك عند فنون جميله و تربيه فنيه بيبقي فيه طلاب كتيير و كده كان واقف هناك مره عربية هوت دوج و بتبيع السندوتش ب 20 جنيه و المكان مربح و المنطقه و الناس راقيه و ممكن تشوف الجامعات التانيه

M_samii أنا فكرت جديا ف منطقة الزمالك بس الكورنيش
فكرتك جميلة ماشاء الله مشكور جدا

ربنا يوفقك ياريت كل الشباب يفكر زيك بدل القعدة على القهاوي وانتظار الفرج

تحيه كبيره لحضرتك ولاى شاب بيقاتل لتحسين معيشته
للاسف بيقابلنى شباب كتير جدا عايز وظيفه نظيفه بمعنى ميوسخش هدومه ولا ايديه وعايز مرتب يجوزه في سنه ولا اتنين طبعا مش في مصر الكلام ده الانادر
لكن لاى شاب المهم البدايه واللى تكسب بيه العب بيه متصرفوش وسع شغلك واصرف كأنك لسه مكسبتش
انا من فضل الله بدأت من تحت الصفر منتظرتش وظيفه واجتهدت في شغلى وما كان فارق معايا رأيى اصدقائى المحبط دائما واحترفت في مجالى ميكانيكا النسيج وتهافتت على توكيلات شركات اوروبيه واسيويه للعمل معهم وكنت انا اللى برفض وجاء لى دعوه من اكبر شركه في العالم لصناعه ماكينات النسيج الدائرى واستضافونى في المانيا وتدريبى على احدث الماكينات ومن فضل الله
الظروف تحسنت لكن المهم التوفيق من الله ..والبدايه

توكل على الله وربنا يبارك لك في حلالك

#maam# ربنا يخليك بس برضه محتاج رأيك ف موضوع المكان !!

طارق _عبد السلام مرورك أسعدني جدا بس الفكرة مش مجرد شغل بس الفكرة ف البعد عن الروتين والأوامر والمواعيد والكلام الفارغ ده
ف دول أوروبية وأمريكا المشاريع دي منتشرة جدا وبين الأوساط الراقية أكتر كمان

محتاج رأيك برضه ف موضوع المكان اللي ممكن أقف فيه ؟؟

للاسف مش هقدر افيدك ,,
بس داخل مخصوص عشان ابدى اعجابى بتفكيرك الايجابى
و يارب تكمل مشروعك على خير

اقتباس:

---

المشاركة الأصلية كتبت بواسطة mahmoud naguib

#maam# ربنا يخليك بس برضه محتاج رأيك ف موضوع المكان !!

طارق _عبد السلام مرورك أسعدني جدا بس الفكرة مش مجرد شغل بس الفكرة ف البعد عن الروتين والأوامر والمواعيد والكلام الفارغ ده
ف دول أوروبية وأمريكا المشاريع دي منتشرة جدا وبين الأوساط الراقية أكتر كمان

محتاج رأيك برضه ف موضوع المكان اللي ممكن أقف فيه ؟؟

---

فعلا كلامك صحيح في اوروبا المشاريع دى ناجحه جدا وشيك جدا لكن في مصر للأسف (محتاجين اعاده تأهيل)
وبالبعد عن الروتين والمواعيد ضع في حساباتك انك هتكون ملتزم بالمواعيد جدا وهيكون وقتك ضيق جدا لتجهيز شغلك اليومى بس الاجمل انك هتكون شغال في الشارع يعنى تغيير يومى مش روتينى
بالنسبه للمكان للاسف انا من مدينه المحله مش هقدر افيدك في القاهره (اهل مكه ادرى بشعابها)
اهل القاهره يفيدوك اكتر
لكن كل ماكان المكان راقى ستتعامل مع نوعيات افضل اكيد
بالتوفيق

فكرة رائعة
ربنا يوفقك ويوفق أولادي وشبابنا كلهم .
وأنا بقترح مدينة المقطم :-
والمقطم مدينة رائعة وراقية ( شارع 9 )
فيها محلات بطول شارع 9
وفيها معاهد خاصة
ممكن هناك تظبط نفسك
من حيث :-
1) المكان .
2) البلديات .
3) المحلات .
4) الطلاب ( في فترة الدراسة )
5) رواد المحلات ( ليلاً في فترات الدارسة ، وفترات الأجازة ) .

وفيه كمان الكورنيش ( كورنيش المقطم ) - بس أعتقد أنه غير مناسب من حيث :-
1) هيحتاج أتاوات أكتر لأصحاب الكافيهات ( وهم عاملين الكافيهات بعشوائية - يعني بلوي الدراع - أو حراس عقارات هناك ) - يعني بلطجية شوية .
2) الدوريات الشرطية اللي بتسترزق من هناك برضوا .
3) لكن فيها كابلز كتير ، أو الأغلبية كابلز .

وربنا يوفقك لما فيه الخير ....

أنت ممكن تروح أي نادي و تجرب تسألهم و تشوف هياخدو منك كام. لو اتعمل الموضوع ده في أي نادي أظن هيكون مربح جدا.

روح الرحاب
و بحيك على تفكيرك

minicooper20 مكان ممتاز جدا ومكانش ع بالي خالص ألف شكر ليك !!

svneleven طب إي أفضل نوادي ممكن أسأل فيها ؟؟؟

متابع

شوف النوادي والجامعات بردو اذا كان هايبقي جوه الجامعه وبتصريح وكده او بره عادي

هي العقبه اللي هتقابلك غتاته اصحاب المحلات وده امين شرطه جاي ياخد اللي فيه النصيب

وربنا يوفقك في مشروعك
مين عالم يمكن تبقي كوك دور جديد :)

محلات اي اللي هتغتت عليا !!
هو في محلات ف مصر أصلا بتبيع فشار ولآ غزل بنات !!

المشروع ده مش منتشر أبدا وأعتقد يعني مفيش منافسين أد كدة علشان يطلعلي مشاكل من وراهم !

كدة يمكن اللي توصلتله ف أفضل الأماكن هو كورنيش الزمالك وكلية فنون جميلة ف الزمالك والرحاب !

أنا عايز حد يدلني ع نادي كويس أو مجمع سينيمات مشهور علشان أضيفه للقايمة اللي هطلع عليها إن شاء الله قريب !

في مجمع سينيمات امريكانا بلازا في اكتوبر ده حلو جداا و ممكن بردو تشوف هايبر وان و ممكن تشوف نادي الرحاب حلو

مشروع جميل و ربنا يوفقك فيه بس حاول برضه انك واحدة واحدة توسع نشاطك و تزود حاجات تانية مع الفشار و غزل البنات
و بالنسبة للأماكن انت أحسن أماكن بتبقى الجناين المفتوحة خصوصا في الاجازات و الاعياد
بس خلى بالك من البلطجية و اللى بيحبوا يعملوا فردة عليك
و ربنا يبارك لك في مشروعك

M_samii شكرا جدا لحضرتك وربنا يوفق للخير

Mohamed.Raafat جناين مفتوحة زي إي مثلا ؟؟

الفكره كويسه
بس انا ليا رأي مختلف في شويه حاجات
اولا سيبك من موضوع غزل البنات و الفشار و الحاجات ديه
لأنها هتحتاج مكان يبقي في اطفال اكثر و ده لأما في النوادي او المولات و السينمات و هنا هيكون صعب تقف من غير ايجار

ثانيا خلي العربيه طبعا شيك و معموله بشكل مبتكر ذي ما قولت بس الافضل علي موتسكل بشكل شيك علشان تعرف تتنقل بيها بسهوله بدون مشاكل

ثالثا خلي نشاطك في الاكل السريع هيبقي عليه اقبال اكثر من كل الناس اكثر ما يكون علي الاطفال و العائلات فقط

رابعا حاول تركز في المناطق الجديده او المدن الجديده اللي بيكون الخدمات مش كتير بس فيها مناطق تمركز و قهاوي و كافيهات او مناطق قديمه بس نضيفه ذي المعادي مثلا
او الكليات او الجامعات بس مش اي حاجه هتنفع اوي
لازم تكون حاجه محتاجه فعلا الموضوع ده و فيها نقص في الكافتريات
ذي ما قال حد علي الزمالك فيه هناك مدارس مستواها كويس و 3 كليات و معظمهم بيجيبوا اكلهم من بره

مشروع جميل بس فعلا موضوع الاتاوات والبلطجة مشكلة

3mr Farrag مشكور ياعمرو بس الأكل السريع ده أعتقد موضوع كبير شوية عليا خلينا على أدنا نبدأ كدة وبعد كدة نفكر !!

zorg مفيش حاجة ياعم ان شاء الله أعتقد لو مكان راقي محدش هيبص لواحد بيبيع فشار يعني !!

السلام عليكم ورحمة الله وبركاته ...
جميل جدا انك فكرت بره الصندوق ...
ونصيحتى ليك ممكن تسأل فى حديقة الحيوان لان فيه كافتيريات هناك وممكن تقف جنب اى كافتيريا بايجار ....
هو مش مكان راقى بس عليه اقبال كبير طوال السنة ....
وربنا يوفقك ان شاء الله للى فيه خير ليك ....

elhelwany188 فكرت ف المكان ده برضه بس مش عارف حاسس ان في أفضل

طب اي رأيك ف الأزهر بارك ؟؟؟

عندى اقتراح ليك حلو اوى وخصوصا الفترة الى جاية
انت شاب ومش عايز تهين نفسك
وبتعتمد على الشباب
وانت صح
طيب اية رايك فى الجامعات الخاصة
يعنى عندك مثلا فيوتشر اكاديمى فى ميدان الحجاز
والقلق واللبش هناك قليل جدا
وطبعا المكان طبيعته مستوى عالي
تقدر تقف هناك من نحية عمر افندى وماحدش هيضايقك
وعندك مودرن اكاديمى على الدائرى ودى كانت جامعتى
عايز اقولك 90% من الطلاب كنا بنسيب الكافتيريا ونطلع برة الجامعة من ورا
كان فى شوية شباب عاملين كشك مشروبات وساندوتشات بطاطس وكدة
برضو لو عرفت تظبط مكان هناك هيبقى حلو ليك
ممكن تروح لادارة الجامعة لو مودرن وتتافهم معاهم علشان تقدر تدخل وتقف قدام الجامعة
وصدقنى المكانين دول لو جربتهم هيمشو معاك حلو اوى اوى اوى فى فترة الجامعة والدراسة

bekatcho مشكوووووووووووووووور ياصديقي على الإفادة الجميلة دي

بس برضه مهما كان عدد اللي ف الجامعة مش هيقى أد اللي ف الحدائق العامة وكدة

هو ميدان الحجاز ممتاز جدا بس برضه المشكلة هركن فين لما أخلص شغل مثلا !

اهم حاجة تلغى الحديقة الدولية من حساباتك

اقتباس:

---

المشاركة الأصلية كتبت بواسطة mahmoud naguib

elhelwany188 فكرت ف المكان ده برضه بس مش عارف حاسس ان في أفضل

طب اي رأيك ف الأزهر بارك ؟؟؟

---

السلام عليكم ورحمة الله وبركاته ...
ربنا يوفقك للى فيه خير ليك ان شاء الله ...
سبب ترشيحى لحديقة الحيوان انها فى ميدان الجيزة يعنى مواصلاتها ساهلة وجنب جامعة القاهرة بجميع كلياتها خارج الحرم وداخله وتذكرتها رخيصة يعنى اى حد عايز يغير جو بسعر مناسب هيروحها سواء معاه عربية ام لا سواء رحلات او افراد او عائلة او شباب او طلبة فده بيديك سوق مستهلك كبير ...
بالنسبة للازهر بارك كويسه بس مفيهاش الكم اللى بيروح حديقة الحيوان ....
اقتراحى ليك روح يومين فى الاسبوع للازهر بارك ويومين لحديقة الحيوان يبقى منهم يوم اجازة زى الجمعة او السبت وشوف كمية الناس هنا وهنا وقارن وربنا يوفقك ...
كمان فى ميزة عندك انت مشروعك متنقل ممكن لو معجبكش اى مكان تختاره تروح تجرب مكان تانى معجبكش تروح مكان تالت لحد ما ربنا يوفقك فى مكان كويس ....
بالتوفيق ان شاء الله ...

elhelwany188 تمام جدا كلامك كله مظبوط

ياريت حضرتك تبعتلي أكونت الفيس علشان حابب أتواصل مع حضرتك أكتر ده لو مش يضايقك !

اقتباس:

---

المشاركة الأصلية كتبت بواسطة mahmoud naguib

elhelwany188 تمام جدا كلامك كله مظبوط

ياريت حضرتك تبعتلي أكونت الفيس علشان حابب أتواصل مع حضرتك أكتر ده لو مش يضايقك !

---

السلام عليكم ورحمة الله وبركاته ...
مش هايضيقنى طبعا لانى بحترم اى حد بيفكر بره الصندوق وعلى فكرة انا اول ما اتخرجت من الكلية فتحت محل فول وطعمية بس لظروف صحية مقدرتش اكمل ....
هو فيه مشكلة صغيرة انى للاسف مابتبعش الفيس كتير حتى الفلاشة ماشحنتهاش من حوالى 4 او 5 شهور تقريبا ....
فانا معاك على المنتدى لوعايز اى حاجة اقدر اقوم بيها ...
ااه المتندى بخشه لما بيكون فيه وقت فاضى فى الشغل وطبعا الشغل مفيهوش فيس طبعا ....