نفسي أوصل الجامعة .. مرة واحدة بس .. يا رب نولهالي

و انا واقف في زحمة المحور اللي متحجر و مبيتحركش من ساعة .. و عمال متخيل إن هسقط السنة دي في المادة بتاعة الساعة 9 دي لا محالة .. مفيش حضور أصلاَ .. مبعرفش أوصل الجامعة ..رأيت فيما يري النائم طيف في المراية .. الحقيقة انا كنت ببص في المراية لأن كان نفسي أجيب معايا موس أحلق دقني لأن الوقت يساع و زيادة .. ونا قاعد اعمل إيه يعني ؟! فتحت نجوم إف إم لقيتهم بيقولوا المحور واقف .. قلت منا عارف و قفلت الراديو .. و انا بفكر في الهوايات اللي ممكن أمارسها في مشوار و انا رايح الجامعة ده مروراَ بقراءة القصص و الروايات (مش عايز جرايد البلد ولا حاجة من ريحة مصر الحبيبة) و الرسم علي الزجاج و السودوكو أو تعلم ألة موسيقية جديدة .. و قاعد بتفرج عاللي بيقرا الجرنال و اللي مطلع صوابع رجليه حاططهم عالتبلوه ولا كأنه قاعد عالشزلونج في مارينا .. خير اللهم إجعله خير .. لقيت الدكتور في المراية .. الدكتور ورايا ! يا دكتوووووووووووور .. و نزلت أسلم عليه (عادي الدار أمان محنا واقفين بقالنا ساعة هتمشي دلوقت؟!) .. إيه يا دكتور إزيك .. هو مفيش محاضرة ولا إيه .. قاللي يبني شكلي هلغي الإمتحان .

المهم بعد ساعة و نص .. وصلنا .. و كان السكشن معاده عدي طبعا .. ركنت جنب الدكتور .. و داخل معاه بقي بقوله يا دكتور من ساعة السنة بدأت مخدناش محاضرة توحد ربنا .. مش عارفين نوصل الجامعة أصلاَ .. قاللي يبني انا بفكر ألغي الإمتحان بتاع الميد تيرم و أخليه بحث .. هوا إحنا خدنا حاجة نمتحن فيها !

و بالمناسبة دي انا كنت معجب جداَ بنظام قريت عنه في مرسيدس تقريباَ .. قال إيه فيه سنسورز في الإكصدام اللي قدام فا أول ما اللي قدامك يتحرك تقوم العربية تتحرك و تقف قبليه بمسافة لوحدها .. و لكن في الحقيقة لقيت النظام ده ممكن تطويره ليتناسب مع مصرنا الحبيبة و هيبقي كالتالي

http://www.tkig.com/Image-500/Newite...lClock-S-1.JPG

هنركب منبه في العربية .. و نوصله بسنسورز زي المرسيدس في الإكصدام اللي قدام .. بحيث إنك ممكن تاخد تعسيلة في العربية لو ملكش هوايات و مش عايز تقرأ الجرايد ..لو اللي قدامك إتحرك (شوف "لو") .. المنبه يرن .. فا تصحي .. تحرك العربية الحتة دي .. و تنام تاني ، بس عايزين ممول للإختراع .. مين جي ؟

ههههههههههههههههههههههههه ههههههههههههههههههه


الله يجازيك خير :d اخيرا حبة كوميديا هنا؟

هم يضحك..مش يبكي.

و يارب توصل الجامعة مرة قبل ما تمتحنوا يارب :d

ضحكتني والله يا محمود :)

انا بقى رأيى ان انتوا تعملوا الامتحان على المحور

الله يكون فى عون سكان القاهرة ..... كيف سيكون الحال بعد سنتين مثلا ؟؟

مش مممممممكن يا محمود، إسلوبك تحفة في الوصف.. هو فعلا الوضع مميت كده ع المحور؟ أصلي ماليش أي علاقة بيه غير اني في طريقي للشغل لما بادخل شارع 26 يوليو من شارع احمد عرابي بالاقي مطلع الكوبري واقف فباخرم من وادي النيل على شارع شهاب على الشارع اللي فيه شغلي.. بس بصراحة ماكنتش باستوعب حجم المعاناه اللي حاصلة.. كان الله في العون.

لما كنت راكبة مع ara و زوجها و المحور برضه كان واقف بطريقة غبية زوجها ياعيني لقيته بيقول انا شكلي كده هاعجز ع المحور ده و هاخرج مني ألاقي شعري إبيض :(

يا جماعة دي فرصة بتوفرها البلد لينا للتثقيف
وللترابط الأسري بين "سكان" السيارة الواحدة

بجد إنت زي العسل يا محمود :) :)

يا راجل ياطيب نفسك تروح الجامعة بدرى ؟....طيب ازاى ...ده انا بتشل يوميا و معدى من ع كوبرى الجامعة و من عند بيتكو..بس حقيقى احييك ع طموحك ...و استمر عليه ...يمكن ربنا ينولها لك قبل ما تتخرج.....بس برده واضح انك مابتصليش الفجر...عشان لو كنت بتصلى كنت اكيد هاتطلع من البيت بعد الفجر مباشرة..وساعتها احتمال (خلى بالك احممال مش اكيد) توصل فى معادك و لا تتأخر لك نص ساعة...عموما انت ممكن تأجر شقة جنب الجامعة ..و يا أخى لو وحشك اهلك و حبيت تشوفهم ممكن تبقى تسافرلهم ..قصدى تروح لهم فى اخر الاسبوع...و لو انى اعتقد انك لو فكرت كويس فى اللى بتشوفه ف الطريق و خاصة مدخنة تايتنك ...محدششششششششششش هيوحشك خالص.
ربنا يعينك و تخلص الجامعة ع خير ان شاء الله وتستريح من المشوار ده
عشان هتبدأ المعاناة مع مشوار الشغل:(

انتا زي العسل والله والاختراع دا جامد جدا ونا معاك لو عايز حاجة ههههههههههههههههههههههههه ههههههههههههههه

:smartass:
:smartass:
:smartass:
:smartass:
:smartass:

اسلوبك كالعاده
فظييييييييييع مسخره يابني

فكرتني بمسرحيه سمير غانم اما كان بقاله 3 ايام في الاتوبيس و مش عارف ينزل و يقول يارب المره دي يارب المره دي :)

انا عندى حل ، دمغة على كل كارنيه للطلبة عشرة جنيه ولا حتى خمسين ، ثم يعملوا طريق معلق على حساب الغلابة دول ، وللتوفير ممكن كل واحد ينزل كليته بالبراشوت ارخص ، وهى تبقى برشطة فعلا ، فكرتونى لما فى سنة رابعة تجارة فى العباسية مرة رايحين امتحان اخر السنة لقينا المرور واقف من مستشفى كوبرى القبة ولقيت منظر لم اراه الا يومها الطلبة قفلت عربياتها فى مكانها وسابتها وطلعوا وانا معاهم نجرى الكام متر الفاضلين نلحق امتحان البكالوريوس ، بس جرى لحد 6 اكتوبر بعيد شوية
الله يكون فى العون

شكراَ لمروركم الكريم يا جماعة و دعواتكم إن أوصل الجامعة انا هحاول مجدداَ الصبح و ربنا يكرم .. بس واضح إن الإختراع عجبكم :D إسمحولي أضيف بعض الإضافات للمشاركات

اقتباس:

---

المشاركة الأصلية كتبت بواسطة Goodle

يا جماعة دي فرصة بتوفرها البلد لينا للتثقيف
وللترابط الأسري بين "سكان" السيارة الواحدة

---

بالزبط يا محمد و الزحام اللي عالمحور هيغير في أسلوب حياة المصريين كتير

يعني عندك مثلاَ هيختفي جواز الصالونات و يظهر جواز العربيات .. و هتسمع جمل زي "انا إتعرفت علي زوجتي في إشارة المصل و اللقاح في المهندسين" أو " يا عمي انا معجب ببنت حضرتك و عشان كدة حبيت أخش "العربية" من بابها و أجي أطلب إيدها) و "ترجع قبل الساعة 11 إنت فاهم ؟؟!! انا هقفل السنتر لوك 11 بالدقيقة لو إتأخرت إرجع الإشارة اللي جيت منها ملكش بيات عندي" و "إحنا عيلة محافظة .. عربياتنا كلها متفيمة" .. و بعدين يبقي الواحد راكب مع والدته و يلاقيها نزلت فجأة يسألها رايحة فين تقوله أصل خالتك عازماني عالغدا في لانسر سودا في الحارة اللي في النص مش بعيد .

اما عن الرادار فا هتتاخد مخالفة رادار برضه .. ليه ؟ عشان تخطيت الحد الأدني للسرعة عالطريق .. و الأمين هييجي يقولك الرخص للباشا .. تقوله الطريق واقف يا بني أدم يقولك يا باشا إتصرف هو إحنا اللي موقفينه !

ثم متتعحبش لو لقيت عربية مساجين واقفة قدامك و سمعت الشاويش بيقول "سيد عبد البر .. إفراج" .. مدته خلصت يا محمد !

اقتباس:

---

المشاركة الأصلية كتبت بواسطة OlaOsman

هو فعلا الوضع مميت كده ع المحور؟

---

الفكرة علي المحور يا علا إنه المنفذ الوحيد لحوالي 987756567576 منطقة عن طريق الدائري إلي المهندسين .. طب خلينا نفكر .. الدائري ده قبل ما يوصل المهندسين بيعدي علي إيه ؟ عندك ( الهرم ، فيصل ، كرداسة ، صفط اللبن ، قليوب ، إسكندرية الزراعي ، إسماعيلية الصحراوي و الزراعي ، إمبابة ، الوراق .. إلخ إلخ ) إضافة للناس اللي جاية أصلاَ من أكتوبر و الشيخ زايد .. كل ال clash ده في مساحة قد إيه من الأرض ؟ حارتين ! مفيش إصلاحات ولا حاجة هو الطريق من أول نزلات الدائري لحد ميدان لبنان حارتين .. كل هذا الكم من العربيات في حارتين .. لازم يقف طبعا .. و المثل في الإتجاه الأخر اللي رايح أكتوبر .. بس اللي رايح أكتوبر مبيبقاش زحمة بعد الساعة 5 لأن مبيبقاش رايح غير سكان أكتوبر خلاص الشغل خلص في بيبقي شبه ماشي يعني .. إنما اللي راجع منها بقي واقف علي طول .. و إنتي و حظك .. ساعات يقف قبل ميدان لبنان بخمسة كيلو يتاخدوا كلهم تا تا .. تا تا .. يا أما بأربعة كيلو .. يا بكيلو واحد .. كل واحد و نيته .. و أحلي حاجة اما الواحد يبقي خلاص مش طايق الزحمة يفتح الراديو يلاقي بتوع نجوم إف إم بيقولوا جالنا تقرير إن المحور واقف خالص .. يقوم يعمل زي سعيد صالح في العيال كبرت بعد ما عبد الواحد رنه علقة "ها ها ها !!! منا عرفت !!!! "

اسلوبك ساخر و ممتع للغاية :) - يذكرني بأسلوب احمد رجب على شبابي طبعا

:k48::k48::k49::k49:
الله يجازيك خير يا موتو باشا .....فعلا من المعاناه يولد الفنان ....حتة يوسف وهبي خالص

ههههههههههههههههههه

والله عسل

ما تقلقش خالص يا موتو
هتتخرج ان شاء الله من الجامعة بتاعتك
بس لازم تضحي شوية
يعني انزل بدري حبتين عن معاد المحاضرة
لو المحاضرة الساعة 9 - انزل الساعة 7
تضمن الطريق يكون فاضي ولذيذ
انا بقالى 5 سنين والحمد لله قاطع على الطريق ده (اكتوبر - مدينة نصر والعكس ) صبح وظهر وليل
حله الوحيد - انزل بدري حبتين تلاتة

والله انت زى العسل
وبجد موضوع ساخر اوى بس النظريه دلوقتى انا من ساعه ما فتحوا المحور ده

وعلطول اسمع ان هو واقف

هما مش ناوين يعملوا اى حاجه ليه علشان الحال ده ينصلح

وانت غلطان كنت اسال الكليه اللى هتخشها طريقها فين الاول

طيب ما تشوفوا حد ينفذ فكرة التليفريك يا جماعة ويبقي زي المترو كدة ولية محطات وكلام من دة وبكدة تبقي اتحلت المشكلة من جذورها..ههههههههههههههههه

اقتباس:

---

المشاركة الأصلية كتبت بواسطة mahamedaraby

وانت غلطان كنت اسال الكليه اللى هتخشها طريقها فين الاول

---

و الله كان مااااااشي ده هو إتبهدل من سنتين كدة :k20:
يالا هانت ..

إنهاردة فعلا يا أستاذ رامي انا قلت الحل الوحيد للمهزلة دي إن أنزل بدري .. نزلت الساعة 7 إلا عشرة و الحمد لله وصلت في معادي و عملت الإنجاز التاريخي .. بس الدكتور ربنا موفقوش فا مخدناش المحاضرة برضه .

شكرا لمروركم جميعاَ :)

بجد ضحكتنى
انت بتتكلم فى المحور
انا طريقى رايح جاى من الشغل كل فرده 8 كيلو بالتمام و الكمال
الطبيعيى 10 دقايق
بس والله ساعات باخدها فى ساعه ساعه و نص لو 45 دقيقه يبقى لوز
انا حافظ جميع اليفط و الاعلانات فى الطريق و عادد عواميد النور و عدد الشجر و برده زهقت
دلوقتى دايما فيه جرايد معايا عشان احرق دمى زياده

كنت زمان ببقى مركز ازاى اقرا الجرنال و عينى على الطريق عشان لو (واخد بالى من لو) اتحرك اتحرك انا كمان دلوقتى خلاص بطلت - اللى ورايا هيزمر اول ما تمشى و حتى لو نسى مش مهم ماهى كده كده و اقفه

بقيت بحسد اللى بيروحوا فى الاتوبيس عشان بياخدوا تعسيله حلوه كل يوم

اخيرا يا موتو خدت محاضرة قبل ما اموت:k48:

ما تشوف لك طريق غير المحور ده انت بتروح منين ولفين وانا وباقى الاعضاء هنساعدك متقلقش
مستقبلك امانة بين ايدينا مش هتروح فى المحور قدام عنينا

ههههههههه بجد دى عاوز معجزة

اقتباس:

---

المشاركة الأصلية كتبت بواسطة MoToRiZeR

هنركب منبه في العربية .. و نوصله بسنسورز زي المرسيدس في الإكصدام اللي قدام .. بحيث إنك ممكن تاخد تعسيلة في العربية لو ملكش هوايات و مش عايز تقرأ الجرايد ..لو اللي قدامك إتحرك (شوف "لو") .. المنبه يرن .. فا تصحي .. تحرك العربية الحتة دي .. و تنام تاني ، بس عايزين ممول للإختراع .. مين جي ؟

---

ههههههههههههههههههههههههه هههههه
انت سعيد الحظ انك لقيت الدكتور معاك في الاشارة ولغى الامتحان
بس حلوة اوى اوى اوى يا موتو فكرة المنبه دي
و اديها نوم بقى و احلام سعيدة :k49:

اقتباس:

---

المشاركة الأصلية كتبت بواسطة theking2690

انا بقى رأيى ان انتوا تعملوا الامتحان على المحور

---

ههههههههههههههههههههههههه
و دي كمان من الافكار الرائعة
تعتبر حل مؤقت على ما يتم تنفيذ فكرة المنبه

معلش ... سؤال من غير ما حد يضحك ..

هو فعلا انت قابلت الدكتور فى الإشارة و فعلا مخدتوش منهج الترم دا ولا انت كنت بتحكى رواية يعني ... ؟؟؟

إنتوا رجعتوا الموضوع بمناسبة إن الجامعة إبتدت تاني إنهاردة ولا إيه ؟ :)

و الله المحور من ساعة ما الإصلاحات خلصت بقي نص بشع في الرايح .. و سوبر بشع في الراجع .. و طبعاَ مش محتاج أفسر إن ده بسبب إن الطريق بيبقي ضيق اما نقرب من ميدان لبنان .

اقتباس:

---

المشاركة الأصلية كتبت بواسطة SuccessCre8or

معلش ... سؤال من غير ما حد يضحك ..

هو فعلا انت قابلت الدكتور فى الإشارة و فعلا مخدتوش منهج الترم دا ولا انت كنت بتحكى رواية يعني ... ؟؟؟

---

لا و الله بجد ! بس مش مخدناش المنهج بس أخدنا عدد محاضرات قليل جداَ .. إحنا المفروض بناخد عالأقل 12 محاضرة في كل مادة في التيرم .. التيرم اللي فات و اللي قبله بسبب تصليحات المحور كنا فعلاَ بنقف بالساعات عالمحور فا بنوصل بعد ما معاد المحاضرة يكون عدا .. أو الدكتور ييجي يلاقي مفيش حد يقوم ماشي .. التيرم اللي فات مثلاَ الزحمة + الأجازات الكتير لقينا نفسنا مخدناش غير محاضرتين في أحد المواد! فا الدكتور إتكسف يعمل إمتحان في المحاضرتين و خلا الدرجات هتتقسم علي مشروع عملي + بحث .

الوضع كان صعب جداَ ايام التصليحات و ما تبعها من ايام التفنيش .

فعلا اغلب الاختراعات جاءت من محض الصدفة وبالمصادفة فقط وليست فى نيه الشخص انه يفعل شىء

حكايه الدكتور حقيقة ولا خيال هههههههههههههههههه

حاجه كويسه انك ماتروحش الجامعه وخد الشهاده من البيت

اقتباس:

---

المشاركة الأصلية كتبت بواسطة algeneral

حاجه كويسه انك ماتروحش الجامعه وخد الشهاده من البيت

---

يا ريت .. دنا كدة هاخد الشهادة من المرور !

[QUOTE=MoToRiZeR;464000]

ثم متتعحبش لو لقيت عربية مساجين واقفة قدامك و سمعت الشاويش بيقول "سيد عبد البر .. إفراج" .. مدته خلصت يا محمد !



ههههههههههههههههههههههههه هههه بجد انت راجل زي العسل
بس الجملة دي انا لما قرتها موتتني من الضحك ههههههههههههههههههههههههه ه انت مجررررررررم

اقتباس:

---

المشاركة الأصلية كتبت بواسطة MoToRiZeR

و انا واقف في زحمة المحور اللي متحجر و مبيتحركش من ساعة .. و عمال متخيل إن هسقط السنة دي في المادة بتاعة الساعة 9 دي لا محالة .. مفيش حضور أصلاَ .. مبعرفش أوصل الجامعة ..رأيت فيما يري النائم طيف في المراية .. الحقيقة انا كنت ببص في المراية لأن كان نفسي أجيب معايا موس أحلق دقني لأن الوقت يساع و زيادة .. ونا قاعد اعمل إيه يعني ؟! فتحت نجوم إف إم لقيتهم بيقولوا المحور واقف .. قلت منا عارف و قفلت الراديو .. و انا بفكر في الهوايات اللي ممكن أمارسها في مشوار و انا رايح الجامعة ده مروراَ بقراءة القصص و الروايات (مش عايز جرايد البلد ولا حاجة من ريحة مصر الحبيبة) و الرسم علي الزجاج و السودوكو أو تعلم ألة موسيقية جديدة .. و قاعد بتفرج عاللي بيقرا الجرنال و اللي مطلع صوابع رجليه حاططهم عالتبلوه ولا كأنه قاعد عالشزلونج في مارينا .. خير اللهم إجعله خير .. لقيت الدكتور في المراية .. الدكتور ورايا ! يا دكتوووووووووووور .. و نزلت أسلم عليه (عادي الدار أمان محنا واقفين بقالنا ساعة هتمشي دلوقت؟!) .. إيه يا دكتور إزيك .. هو مفيش محاضرة ولا إيه .. قاللي يبني شكلي هلغي الإمتحان .

المهم بعد ساعة و نص .. وصلنا .. و كان السكشن معاده عدي طبعا .. ركنت جنب الدكتور .. و داخل معاه بقي بقوله يا دكتور من ساعة السنة بدأت مخدناش محاضرة توحد ربنا .. مش عارفين نوصل الجامعة أصلاَ .. قاللي يبني انا بفكر ألغي الإمتحان بتاع الميد تيرم و أخليه بحث .. هوا إحنا خدنا حاجة نمتحن فيها !

و بالمناسبة دي انا كنت معجب جداَ بنظام قريت عنه في مرسيدس تقريباَ .. قال إيه فيه سنسورز في الإكصدام اللي قدام فا أول ما اللي قدامك يتحرك تقوم العربية تتحرك و تقف قبليه بمسافة لوحدها .. و لكن في الحقيقة لقيت النظام ده ممكن تطويره ليتناسب مع مصرنا الحبيبة و هيبقي كالتالي

http://www.tkig.com/Image-500/Newite...lClock-S-1.JPG

هنركب منبه في العربية .. و نوصله بسنسورز زي المرسيدس في الإكصدام اللي قدام .. بحيث إنك ممكن تاخد تعسيلة في العربية لو ملكش هوايات و مش عايز تقرأ الجرايد ..لو اللي قدامك إتحرك (شوف "لو") .. المنبه يرن .. فا تصحي .. تحرك العربية الحتة دي .. و تنام تاني ، بس عايزين ممول للإختراع .. مين جي ؟

---

اقتباس:

---

المشاركة الأصلية كتبت بواسطة MoToRiZeR

شكراَ لمروركم الكريم يا جماعة و دعواتكم إن أوصل الجامعة انا هحاول مجدداَ الصبح و ربنا يكرم .. بس واضح إن الإختراع عجبكم :D إسمحولي أضيف بعض الإضافات للمشاركات



بالزبط يا محمد و الزحام اللي عالمحور هيغير في أسلوب حياة المصريين كتير

يعني عندك مثلاَ هيختفي جواز الصالونات و يظهر جواز العربيات .. و هتسمع جمل زي "انا إتعرفت علي زوجتي في إشارة المصل و اللقاح في المهندسين" أو " يا عمي انا معجب ببنت حضرتك و عشان كدة حبيت أخش "العربية" من بابها و أجي أطلب إيدها) و "ترجع قبل الساعة 11 إنت فاهم ؟؟!! انا هقفل السنتر لوك 11 بالدقيقة لو إتأخرت إرجع الإشارة اللي جيت منها ملكش بيات عندي" و "إحنا عيلة محافظة .. عربياتنا كلها متفيمة" .. و بعدين يبقي الواحد راكب مع والدته و يلاقيها نزلت فجأة يسألها رايحة فين تقوله أصل خالتك عازماني عالغدا في لانسر سودا في الحارة اللي في النص مش بعيد .

اما عن الرادار فا هتتاخد مخالفة رادار برضه .. ليه ؟ عشان تخطيت الحد الأدني للسرعة عالطريق .. و الأمين هييجي يقولك الرخص للباشا .. تقوله الطريق واقف يا بني أدم يقولك يا باشا إتصرف هو إحنا اللي موقفينه !

ثم متتعحبش لو لقيت عربية مساجين واقفة قدامك و سمعت الشاويش بيقول "سيد عبد البر .. إفراج" .. مدته خلصت يا محمد !



الفكرة علي المحور يا علا إنه المنفذ الوحيد لحوالي 987756567576 منطقة عن طريق الدائري إلي المهندسين .. طب خلينا نفكر .. الدائري ده قبل ما يوصل المهندسين بيعدي علي إيه ؟ عندك ( الهرم ، فيصل ، كرداسة ، صفط اللبن ، قليوب ، إسكندرية الزراعي ، إسماعيلية الصحراوي و الزراعي ، إمبابة ، الوراق .. إلخ إلخ ) إضافة للناس اللي جاية أصلاَ من أكتوبر و الشيخ زايد .. كل ال clash ده في مساحة قد إيه من الأرض ؟ حارتين ! مفيش إصلاحات ولا حاجة هو الطريق من أول نزلات الدائري لحد ميدان لبنان حارتين .. كل هذا الكم من العربيات في حارتين .. لازم يقف طبعا .. و المثل في الإتجاه الأخر اللي رايح أكتوبر .. بس اللي رايح أكتوبر مبيبقاش زحمة بعد الساعة 5 لأن مبيبقاش رايح غير سكان أكتوبر خلاص الشغل خلص في بيبقي شبه ماشي يعني .. إنما اللي راجع منها بقي واقف علي طول .. و إنتي و حظك .. ساعات يقف قبل ميدان لبنان بخمسة كيلو يتاخدوا كلهم تا تا .. تا تا .. يا أما بأربعة كيلو .. يا بكيلو واحد .. كل واحد و نيته .. و أحلي حاجة اما الواحد يبقي خلاص مش طايق الزحمة يفتح الراديو يلاقي بتوع نجوم إف إم بيقولوا جالنا تقرير إن المحور واقف خالص .. يقوم يعمل زي سعيد صالح في العيال كبرت بعد ما عبد الواحد رنه علقة "ها ها ها !!! منا عرفت !!!! "

---

أنا أول مرة اشوف الموضوع ده بس بجد بجد اسلوبك في السرد مسخرة كالعادة :k48::k48:
وضحكتني بجد أنا ضحكت لحد مالمكتب كله كان هايتفرج عليا ويفتكروني اتجننت خصوصا بقي الحتة بتاعة جواز العربيات بدل جواز الصالونات :k48::k48::k48:
بس هو انت لسة متخرجتش ياموتو المفروض بما إنكم من رواد المحور يعني تتخرجوا بدري حسن سير وسلوك لإنكوا بتقضوا 3/4 المدة بتاعة الميدتيرم عليه :k48::k48:

بس بجد ربنا يعينك علي الطريق ده فعلا الطريق ده لعنة بجد :K_crying[1]:
الحمد لله انا مجربتوش سايقة بس اللي كانوا سايقين وقتها كانوا هايعيطوا بصراحة.
بس انا بشوف عينة منه وانا مروحة من شغلي كل يوم في منطقة مصر الجديدة وماحولها بجد من كتر الوقفة بيبقي هاين عليا اتصل بيهم في البيت اقولهم انا مش هالحق اروح البيت النهاردة انا هاطلع علي الشغل من بره بره بقي :k48:

الموضوع بتاريخ 21/10/2008
يا خبر ابيض يا ترى وصلت ولا لسه محلك سر .. :)
علشان تبقي عارف يا محمود ده تدعيم لسياسة التدريس عبر الانتر نت مش اكتر ..

الحمد لله على النعمه اللى احنا فيها بره القاهره

انا لو اخدت مره اكتر من نصف ساعه علشان اوصل اى مشوار فى طنطا

بدخل على النت واقرا الجرايد

علشان اعرف ايه المصيبه اللى فى البلد

الحمد لله على النعمه

المشكله الوحيده اللى فى الركنه

اقتباس:

---

المشاركة الأصلية كتبت بواسطة mobitek

ا

المشكله الوحيده اللى فى الركنه

---

مانت لو دخلت على النت هتلاقى ركنة .. :)
بهزر معاك لتفهمنى غلط ولا حاجة ..:)

بفكر اروح اركن فى القاهره لو فيه اماكن انتظار متوفره