معلومة جميلة
بالنسبة للطريشة ، البدو كانوا بيقولولنا إنها بتموت فى دقيقتين وإن اللى تلدغه لازم يبتر مكان العضة فى وقتها ، وأعرف واحد قطع صباعه بمنجل بنفسه عشان ضربته فى صباعه
ممكن تكون معلومة حقيقية وممكن يكون تهويل
أنا شوفتها فى جبال البحر الأحمر على الطريق اللى بين القصير على البحر وقفط فى قنا ، وصورتها من على بعد حوالى 30 سم ومشيت ، ماعرفش جاتلى جرأة إزاى ، بس هى كانت قاعدة ملفوفة ودافنة نفسها شوية وماعملتش حاجة ، وعلى فكرة هى تصنيفها أفعى مش تعبان لأن بيبقا فيه فرق فى الأنياب وإسمها بالإنجليزى horned viber أى الأفعى المقرنة زى ما حضرتك تفضلت وقولت ، وبيقولوا الشيح مش بيأثر معاها ولا مع العقرب ، وعموماً الطريشة هى أكبر رعب لكل العاملين فى الجبال فى مصر عشان الكلام الفظيع اللى بيتقال عنها ، بيقولوا إنها عميا وبتحس بحرارة الجسم فتقفز عليه زى السهم وتلدغه ، بس أنا قريت فى كتاب إنها بتحس بذبذبات أقل حركة وبتقفز فعلا ناحية عدوها وتعضه ، وطولها فى حدود 30-60 سم وجسمها أتخن من ناحية الراس
فيه تعبان تانى إسمه الناشر أو النافث ، وده بينفث السم بمنتهى الدقة فى عين الضحية من على بعد أمتار قليلة ويصيبه بالعمى
عموماً من غير رعب اللى أعرفه عن التعابين إنها مابتأذيش إلا لو حد أذاها وهى دايماً بتبعد عن الإنسان وتتحاشاه طالما مش بيأذيها على عكس العقرب تماماً اللى شاهر سلاحه وماشى يدور على ضحية يفرغ فيها سمه بدون أى سبب ، و كنت سمعت إن الرسول عليه الصلاة والسلام أخد عهد على التعبان إنه مايتعرضش للإنسان إلا لو أذاه أما العقرب فرفض العهد ده وعشان كدة بيمشى رافع سلاحه وناوى على الأذى غير التعبان اللى دايماً بيحاول يختفى ويبعد عن الناس ، حاجة أخيرة إن برغم كدة سم التعبان أفتك بكثير من سم العقرب إنما خطورة العقرب إنه بيدور عليك ويأذيك فى حين التعبان لو فات فوق جسم واحد نايم عمره ما هيلدغه على حسب ما بنسمع ، برضه أعرف واحد زميلى إتلدغ من عقرب وإتلحق بالترياق بعد نص ساعة من الإصابة وفى ظرف يومين ولا حاجة كان الورم راح والحرارة إنخفضت وخلاص على كدة
ربنا يسترها معانا جميعا ، بس عجبتنى فكرة الجاز على أرضية الجراج ، ممكن تكون مفيدة ، جرب سم يستنشق مايتاكلش ، لأن التعبان بياكل السم بدون تأثير ، بيهضمه فى معدته قبل ما يوصل للدورة الدموية ، شوف حاجة متطايرة زى النفتالين مثلا أو الجاز اللى على الأرضية