خبراء الترخيص - الحقونى !!!!!!!!!!!!

**moh_elnahas** · 22-10-2008 02:15 AM

الحكايه كالتالى انا اشتريت عربيه من شهرين و رخصه العربيه باسم واحده باعت العربيه للى انا اشتريتها منه ( يعنى توكيلين)
و المفروض الترخيص هيخلص شهر 11 و هيتعملها فحص

لما احب ارخص أعمل ايه بالترتيب علشان اخوكم مستجد
اروح الشهر العقارى ولا اروح على المرور على طول و هل ينفع اجدد الرخصه و ادفع الضريبه و التامين واللذى منه و اسيب الرخصه ذى ما هيه باسم البائع ولا اعمل ايه؟

**ramyfawzy** · 22-10-2008 03:55 AM

شوف يا عزيزي:
قبل كل الكلام ده لازم تكون دافع المخالفات (يعني يكون معاك واحدة حديثة) طالما الرخصة سارية
1 - تروح على الشهر العقاري وتعمل عقد مسجل بإسمك وتدفع مصاريف التسجيل والذي منه
صور البطاقة بتاعتك ورخصة العربية والتوكيلات عشان ما تتزنقش هناك

2 - تروح المرور اللي انت تابع له ومعاك الورق كله - تقول على الشباك عايز اعمل نقل ملكية

3 - تشتري الورق اللازم (نموذج فحص + استمارة بس بصراحة مش عارف رقمها كام)

4 - تشتري طفاية حريق او يكون معاك واحدة سليمة

5 - تدفع التأمين الاجباري في الاول عشان تريح نفسك من الزحمة

6 - تماى الورق بالبيانات المطلوبة وتخش بالعربية على مهندس الفحص الفني عشان ياخد رقم الشاسيه وبصمة الموتور ويكتبهم في ورقة الفحص

7 - تجمع الورق ده كله وتخش على الشباك - هتدفع ضريبة الموتور + الضريبة الجديدة (رسم التنمية )

8 - بعد كل ده هتسلم الورق كله وتستنى الرخصة ان شاء الله (بالهنا والشفا)

واي خدمة

ملحوظة : مش هينفع تسيب الرخصة بإسم صاحبها الاولاني الا لو هوا بنفسه عمل تجديد للرخصة غير كده ما ينفعش

**moh_elnahas** · 22-10-2008 10:48 AM

بجد انت باشا
الخلاصه و اسلوب مرتب و 100%
الف شكر على المعلومات يا جنرال
ادعيلى بس استحمل النفخ بتاع المرور لحسن اخر مره جددت رخصه السواقه
كان هاين عليا ابيع العربيه بعدها علشان مروحش المرور تانى

**cybrarian** · 22-10-2008 11:09 AM

نحن السابقون وانتم اللاحقون

انا لية مخلص نفس قصتك امبارح، وعشان تعرف الخطوات بالتفصيل ادخل على الموضوع ده:
http://nilemotors.net/Nile/showthread.php?t=43570

طبعا زميلنا ramyfawzy يشكر على معلوماته، بس احب اضيف حاجة مهمة

اول خطوة هاتعملها انك تعمل شهادة بيانات موجهة للشهر العقاري دي عشان تعمل بيها عقد بيع العربية، واذا كانت العربية هاتتنقل لمرور تاني، هنا هاتحتاج شهادة بيانات للمرور اللى هاتنقل اليه العربية.

بعد كدة تعمل شهادة المخالفات، وبعدين تعمل عقد العربية في مكتب الشهر العقاري اللى انت تابع ليه، ولو كنت في الجيزة تروح على طول للمكتب اللى في مرور الدقي (بين السرايات).

وبعدين تدفع التأمين الاجباري، وبعدين تعمل الفحص، بعد كدة تجمبع كل الورق دا وتروح على شباك نقل الملكية ... وربنا معاك

حاجة مهمة جدا، الوصول للخزنة انجاز عالمي، فتراعي انك تشوف كل الحاجات اللى عايز تشتريها مرة واحدة، والنموذج المطلوب اسمه 251

ربنا معاك

**moh_elnahas** · 22-10-2008 11:49 AM

و الله انتم عالم محترمه
و من الاخر الف شكر على الاهتمام و النصيحه و ربنا يقوينا على المرور
ح مار يا مصر

**hesham2004** · 22-10-2008 11:54 AM

المشاركة الأصلية كتبت بواسطة ramyfawzy

شوف يا عزيزي:
قبل كل الكلام ده لازم تكون دافع المخالفات (يعني يكون معاك واحدة حديثة) طالما الرخصة سارية
1 - تروح على الشهر العقاري وتعمل عقد مسجل بإسمك وتدفع مصاريف التسجيل والذي منه
صور البطاقة بتاعتك ورخصة العربية والتوكيلات عشان ما تتزنقش هناك

2 - تروح المرور اللي انت تابع له ومعاك الورق كله - تقول على الشباك عايز اعمل نقل ملكية

3 - تشتري الورق اللازم (نموذج فحص + استمارة بس بصراحة مش عارف رقمها كام)

4 - تشتري طفاية حريق او يكون معاك واحدة سليمة

5 - تدفع التأمين الاجباري في الاول عشان تريح نفسك من الزحمة

6 - تماى الورق بالبيانات المطلوبة وتخش بالعربية على مهندس الفحص الفني عشان ياخد رقم الشاسيه وبصمة الموتور ويكتبهم في ورقة الفحص

7 - تجمع الورق ده كله وتخش على الشباك - هتدفع ضريبة الموتور + الضريبة الجديدة (رسم التنمية )

8 - بعد كل ده هتسلم الورق كله وتستنى الرخصة ان شاء الله (بالهنا والشفا)

واي خدمة

ملحوظة : مش هينفع تسيب الرخصة بإسم صاحبها الاولاني الا لو هوا بنفسه عمل تجديد للرخصة غير كده ما ينفعش

احب اضيف للكلام المفيد ده انه لازم تتم عملية التسجيل فى الشهر العقارى قبل انتهاء الرخصة ( مش خلال فترة الشهر السماح ) بأكرر قبل انتهاء الرخصة ، ماذا و ألا حتضطر تلجاء لصاحب العربية الأصلى عشان يسجلك .
اما بالنسبة لأجراءات المرور فممكن تعملها فى خلال فترة السماح ، بس المهم هو التسجيل قبل انتهاء الرخصة

**cybrarian** · 22-10-2008 12:04 PM

الزميل hesham2004

شكرا على اضافتك للموضوع، لكن ممكن تسجل العربية بعد انتهاء الرخصة لو جبت شهادة بيانات للشهر العقاري وتكون دافع ضريبة السنة الجديدة، انا عملت كدة مع عربيتي.

**hesham2004** · 22-10-2008 12:36 PM

المشاركة الأصلية كتبت بواسطة cybrarian

الزميل hesham2004

شكرا على اضافتك للموضوع، لكن ممكن تسجل العربية بعد انتهاء الرخصة لو جبت شهادة بيانات للشهر العقاري وتكون دافع ضريبة السنة الجديدة، انا عملت كدة مع عربيتي.

بس بيتهيألى انه عشان تحصل على شهادة بيانات المرور حياخد منك الرخصة برده .