الفساد بيزيد فساد مع تعقيدات الاجراءات و الغلاء و الجشع و الزيادة السكانية
لازم نعمل حاجة ، لازم يكون عندنا ولو نية اننا نجرب نغير .

النهاردة مثلا كنت بتكلم مع زملاء فى الشغل على شوية اصلاحات و تطويرات فى الشغل عندنا
و كنت بالفعل كاتب الافكار دى فى ورقة علشان اعرضها على الزملاء و المدير ، و نشوف لو فيها حاجة نسعى فى تنفيذها
وقتها الزملاء منهم اللى عجبه بعض الافكار ، و منهم اللى اخدها بتريقة ، و المدير قولتله خليها معاك و يومين و اعرف رأيك فيها
فى نفس اليوم فى آخره و احنا ماشيين ! ، كان بيقولى : كلام جميل .. الخ ، لكن ماينفعش دى يتعمل فيها كدا ، و دى ماينفعش يتعمل فيها كدا ... و دى كنا كلمنا فيها المدير الاعلى منه و قاله مالهاش إلا التصرف ده
من الآخر : الراجل قرأ الورقة قراءة جرايد ، و هو كبير فى السن اساسا و مش بتاع تغيير و تطوير و هبل من ده ... و كروتها فى دقيقة و خلص الحوار
......
نرجع لموقف النهاردة / وريت الورقة لزميل ، الزميل من النوع اللى منتظر الفرج من الله ، و حاسس بإنه جاى قريب جدا :) !
اول ما قرا الورقة و كان فيها : ان المعينين الجدد ياخدوا دورة تدريبية شهر أو شهر و نص حسب متطلبات الشغل يفهم فيها الشغل ، و فى الفترة دى ياخد المرتب الاساسى فقط
الراجل اول ما قرأ انه هاياخد المرتب الاساسى فقط اعترض جدا ،، و ماكملش قراءة الورقة و اعطاهالى !!

الموقف من اوله لآخره محبط و منيل بستين نيلة
لـــــــــكن : لو لقيت فى نفس موقفى دا 10 ولا 20 ، و قدرت اوصلهم من خلال النت مثلا ،، و بقى معانا منهج مكتمل و عرضناه مباشرة على واحد مسئول ، و جرينا على تنفيذه ، يبقى احنا غيرنا حاجة

لكن لو دورت فى اللى حواليك ، واحد من كل 50 ممكن يغير معاك حاجة ، و 5 منتظرين الامور تتغير ربانى بدون عمل ، و 30 عايشين و خلاص مش متوقعين تغيير ، و الباقى عاوزين الوضع كدا لإنهم منتفعين منه !!

فكر و دور بره الصندوق ،، استخدم الانترنت فى تجميع ذخيرتك من الافكار و الناس