c elysee بعد 50 الف كيلو

السلام عليكم

انا بكتب تجربتى فى ايجاز عن عربيتى ستروين الجديده سى اليزيه بعد ما مشيت 50 الف كيلو بيها الحمدلله

1- العربيه انا من اول ماجبتها كان عندى مشكلتين فيها التكييف بيفصل والسحب مع التكييف فقط لا غير وفعلا الى الان هى دى بس مشاكلها
2-التيل والطنابير هم من نوع بوش بbosch واى عربيه اياكان نوعها فيه نظام بوش هيلاقى المشكله دى التيل بيهبب وبيخلص والطنابير بتحتاج تتغير بعد 35 او 40

شهادتى عن العربيه بقولها وربنا يشهد مش للدعايه او لاى غرض تانى

العربيه بسم الله ماشاء الله ثابته وكل اللى ركبها استغرب من ثبتها على الارض وحمار شغل انا كنت بعمل بيها على الاقل فى اليوم 250 كيلو 300 وكنت بشيل فى شنطتها معدات تقيله العربيه ماشتكتش وانا والله مره حطيته فيها ماتور ونش يوزن 500 كيلو فى الشنطه وفضلت فيها 6 ايام وكان بيركب معايا ناس ودا كان وزن اضافى وبردو مشتكتش العفشه والمساعدين كله تمام لحد دلوقتى الحمدلله

لو رجعت بيا الايام كنت هجبها ؟؟
بصراحه لا كنت هجيب سيراتو مستعمله الشكل القديم مش لانها افضل لكن عشان انتشارها لو اى حد نزل الحرافيين هيلاقى االاف العربيات سيراتو متقطعه نص امامى نص خلفى اكصدام تاتيوانى صينى الخ ودا لانها عربيه جديده زى الموديلات الجديده لكن من ناحيه قطع الغيار اه العربيه قطع غيارها غاليه بس دا الاصلى منها الاوروبى اللى بيتجاب باليورو زى قطع الغيار اليابانى اللى بتتجاب بالين هتلاقيها غاليه لكن المضروب والدراجات التانيه موجود كتير بس شوف عمره واستحماله قد ايه وشخصيا افضل اجيب الغالى والاصلى بدل ماوجع دماغى فى المضروب

واخيرا

اى حد عايز يجيب سى اليزيه حاليا هقوله عيبها ايه التكييف والسحب مع التكييف فقط فقط
وشخصيا منصحوش بيها لان سعرها بقى 140 الف وكانت ب 130 الف فدا قمة الاستهبال

تحياتى للجميع

كلامك منطقي ومحايد جدا جدا لأن كل النقط اللي اتكلمت فيها موجوده ف أختها ال 301
بس السؤال : بتحس بالنقله التانيه فالفتيس ولا عربيتك مانيوال ؟

قمه الحياديه تقرير جميل حضرتك عرفت عيوب العربيه قبل مميزاتها انا كنت هجيب بيجو 301 لكن في الاخر جبت اكسنت ار بي وليها بردوا عيوب ومميزات مفيش عربيات كامله في الفئه دي وشكرا

تقرير جميل وحيادى
والسبب الرئيسى لتوقف إنتشار هذه السيارةهو فعلاً الزيادة الجنونية فى سعرها .. ومن وجهة نظرى شكلها أشيك بكتير من الـ 301

يا ريت كل الناس زى حضرتك كده
ربنا يباركلك فيها

ربنا يباركلك فيها

ربنا يبارك وشكراً على النصيحة