السلام عليكم ورحمة الله
لاصحاب السياره peugeot 301 ... على مدار فترة استخدامكم للسياره ما هى العيوب الموجوده فى هذا النوع من peugeot ..
ارجو الافاده فى اسرع وقت
لأنى بفكر اجيبها و خايف ماتكونش كويسه فاندم بعد كده
عرض للطباعة
السلام عليكم ورحمة الله
لاصحاب السياره peugeot 301 ... على مدار فترة استخدامكم للسياره ما هى العيوب الموجوده فى هذا النوع من peugeot ..
ارجو الافاده فى اسرع وقت
لأنى بفكر اجيبها و خايف ماتكونش كويسه فاندم بعد كده
منصحكش. . .
انا معايا مانوال 2015 من شهر 5 اللي فات ولحد دلوقتي الحمد لله مبشتكيش من حاجة .. بالعكس .. الحمد لله معجب بيها جدا ..
ولو بتسأل عن اي شكاوى شائعة .. فهي وبكل امانة المشاكل الشائعة في اي عربية !
- يعني التيل بيتغير على 10000 كلم وفيه اعضاء بتستمر معاهم حتى 20000 كلم .. حسب طريقة الاستعمال
- قطع الغيار من التوكيل .. غالية نسبيا زيها زي اي توكيل في بلدك
- العفشة .. يمكن ناشفة نسبيا لو قارنتها برينو ميجان او بعض العربات الكوري .. وبردو بتختلف من واحد للتاني
- للاوتوماتيك .. سمعت موضوع نتشه .. مش في العربيه دي بس .. بل في اكتر من عربية استبترونيك .. وبعض الاعضاء مع تحديث السوفتوير كتبوا انها انتهت وبعضهم لم تنتهي بعد وبعضهم لم يشعر بها من الاساس !
مسمعتش عن اي تعليقات تانية عليها كشكوى غير دول بكل امانة
2015 هاى لاين
تقديرى لها من 80 الى 85%
مشاكل عبيطة مميزات محترمة لا مقارنة فى الفئة السعرية
صفقة رابحة
نصيحة يا مانيوال يا هاي لاين
البيزلاين زى اللى رقصه على السلم ابعد
لازم تحط بنزين من محطة بنزين نظيفة لأنها حساسة للبنزين
بص يا أستاذ Mohamed :
فى البداية أنا مش خبير عربيات ولا مقطع السمكة و ديلها بس الكلام اللى حقولو حيكون عن اللى شوفتو فى عربيتى أنا و مش عربية حد تانى ... أنا معايا مانيوال 2015 من شهر أبريل و قرأت كتير أعتراضات و ذم و بهدلة فى السيارة 301 و فى بعض الأوقات كنت بركز قوى فى العيوب اللى الأعضاء بيقولو عليها و الحمد لله مكنتش بلاقى الكلام دة عندى و السؤال ليه أو ازاى و الاجابة أن بعض الملاك بيختبرو العربية بطرق مختلفة عن اللى هى مصنوعة لأجله ... بمعنى أنها مش سيارة سباق أو مجهزة لل Drifting أو رحلات السفارى و انما هى سيارة للمشى داخل المدينة و لأنها مصنعة فى أسبانيا فبعض القطع فيها مثل تيل الفرامل نوعة ردىء و على فكرة من وجهة نظرى الشخصية العيب الوحيد اللى قابلنى هو تيل الفرامل ... أما عن المميزات فأنا لسه راجع من مشوار فى الساحل طوله 140Km. رايح و زيهم راجع و كانت العربية و الحمد لله عشرة على عشرة بمعنى : كان معايا ناس و شنط و تقريبا كان الوزن 350 - 360 كيلو و كنت مشغل التكييف و الكاسيت و كان سحب السيارة و أستهلاك البنزين جيد جدا و كنت بعمل غرز بالعربية و كمان فى أختبار أخر للفرامل كنت ماشى على سرعة 100Km و فجأة سيارة نقل و بدون أشارة بقى أمامى و الحمد لله كان تجميع الفرامل ممتاز و بدون ما أسمع صوت الفرملة أو تعمل علامة على الطريق . و كمان حاجة أخيرة المشوار كان رايح جاى بدون توقف غير المشى جوة البلد و مع ذلك السيارة لم تعطى أشارة أنها بتسخن و كمان العفشة كانت كويسة مش ناشفة . فى النهاية أنا عارف أن كلامى مش حيعجب ناس كتييييير بس دة رأى شخصى فى العربية و أسف على الأطالة
بس في حوادث حصلت بسبب الفرامل ياريت حد يوضحلنا العيب ده لنا حصلت مع كذا حد
متشكر على متابعتك و اهتمامك ... و بصراحة كلامك اقرب حاجه للواقع ... فى ناس استعمالها وحش للعربيه وفى ناس تانيه بتقارنها بعربيات مش فى الفئه بتاعتها ... معلش اما عربيه بيجو فيها عيوب كتيره و خربانه زى ما الناس بتقول .. طيب الصينى يعمل ايه !!!! .. مع احترامى لاصحاب العربيات الصينى !
بس دى عربيه اوروبى من شركة عالميه زى البيجوو
الحمد لله مفيش مشكلة في الفرامل وتجميعها كويس اوي " ماشاء الله " ومشكلة التيل دي بتختلف من شخص لاخر حسب الاستخدام والكبس علي الفرامل , يعني اكيد المانوال استهلاكها مش زي الاوتوماتيك والسواقة في المدن غير السواقة علي طريق مفتوح
اما هي بشكل عامل سيارة مريحة وتستحق المبلغ الي اتحط فيها , يمكن لو انت متعود علي شئ مختلف او كان نفسك في مواصفات معينة متلاقيهاش فيها , بس علشان تستمتع بالسيارة انصحك انك تبص علي النواحي الايجابية فيها اما السلبيات فكل السيارات فيها مشاكل ولكن فيه ناس بتتعايش معاها او مش بتبقي مشكلة كبيرة
الخلاصة : السيارة ادائها كويس جدا وتكييفها قوي وكذلك الفرامل والعفشة زي ما بعض الاعضاء قالو انها عمليه نسبية بتختلف من شخص لاخر حسب ما اتعود بالاضافة الي شئ مهم اوي انها عليه عن ارض بارتفاع كويس وده بيجنبك الحك في 80% علي الاقل من مطبات مصر العشوائية
تحياتي