الموضوع: كلاكيت تاني فتيس اتوماتيك وزياده عليه التكييف برجاء الافاده

السلام عليكم ورحمة الله وبركاته
كلاكيت تاني مره الفتيس يا بشمهندس عاصم ويا استاذ محمد ممدوح انقذوني دي هتبقى تاني مره احتاج اغير فيها الفتيس في اقل من 6 شهور
بدون اطاله معلش عشان مصدعكوش
اللي حصل في الفتيس المره دي نفس المره اللي فاتت بالظبط على اختلاف الطريقه اللي نقص بيها الزيت وحدث ما يلي الردياتير كان اتخرم ورحت لحمته طبعا مع الفك والتركيب للردياتير نزل شوية زيت لا بأس بهم حوالي ربع كيلو المهم قلت امشي بالعربيه وعند اول حد بتاع زيت واجيب علبه وازوده تاني وانا رايح في الطريق الفتيس مكدبش خبر علطول قام قعد يرزع ويدب بلغة الصنايعيه مع كل نقلة غيار المهم جبت الزيت وزودت ولا حياة لمن تنادي وازود بزياده شويه مفيش فايده حصل نفس اللي كان بيحصل في الفتيس اللي قبله نتش مغ الغيارات وتقل شديد في العربيه وتهنيج مابين التالت والرابع لازم ادوس بنزين على مرتين ويقوم الار بي ام ناطط وبعدين تبتدي العربيه تمشي عادي واحيانا تأخر في الرابع فقط ممكن توصل انها تاخده عند سرعة 120 ..بجد تعبت من موضوع الفتيس ده افيدوني يا اصحاب الخبره بالمنتدي الرائع بتاعنا ....

حاجه تانيه واخيره واسف مره تانيه على الاطاله بس دي فعلا حاجه غريبه في تكييف اللانوس وانا زهقت من فتي الصنايعيه ومش عاوز اي واحد يلعب في التكييف وخلاص المهم ان اللي بيحصل معايا كالاتي وانا مشغل التكييف وبعد مده حوالي ساعه او ساعه ونص وحوالي مسافة 100 او 120 كيلو فجأه بلاقي كمية الهواء اللي خارجه من فتحات التكييف قلة لدرجة ان 4 فريون مش محصل واحد فريون مع العلم ان الكمبروسر بيكون شغال ومروحة والمروحه اللي في التابلوه بتبقى شغاله وصوتها بكفاءته مع زيادة رفع درجة زرار بكرة الفريون ومع ذلك الهواء اللي خارج من الفتحات يكاد يكون منعدم ومش فاهم ليه وازاي فسألت 2 بتوع تكييفات بدون ما يفكوا حاجه عشان انتوا فاهمين الباقي بقى المهم واحد قالي حاجه اسمها كنترول فلف وده في الكباس وباظ وعاوز يتغير والتاني قال السربنتينه مكتومه وعاوزه تتفك وتتنضف وانا بصراحه كده معرفش اي حاجه في التكييف...

اسف اسف اسف على الاطاله وسامحوني بس لازم توضح المشكله للدكتور كويس عشان مش يديك علاج غلط ومش تدوخه معاك ..

برجاء الافاده يا سادة اساتذة اللانوس...

مجدي اوتوماتيك اول احمد سعيد من ناحيه كليه رمسيس للبنات من عند البنزينه اتجه يمين دقيقه وتلاقيه
فيه دلوقتي حاجه اسمها repair kit دي قطعه بيغيرها بدل ما تغير الفتيس كله وبيقبي زي الاول
وربني يوفقك........ وعلي فكره انت راجل ذوق قوي