المشاركة الأصلية كتبت بواسطة cooldjstuff
بص بقى انا هجبلك من الاخر
اولا ادخل على النت دور على نفس موديل عربيتك ده فى كزا موقع و اتاكد لو ليها باور ولا لا
لو طلع ان بينزل منها بره باور و ده احتمال وارد عشان فى مصر بيلغو اوبشنز كتير من العربيات و بالزات الموديلات الرخيصه عشان الجمارك عندنا غبيه جدا فى الحاله دى انزل دور على نفس ماتور عربيتك فى الوكاله و عزبه شلبى و إن شاء الله احتمال كبير تلاقى الحجات بتعتها ووقتها لازم تشترى منهم
1 طرمبه باور
2 الخراطيم و لو مش متوفره او كانت مقطوعه خد منهم الاكور بتعها و اكبسهم عن اى حد من بتوع الخراطيم
3 الاسكتره او علبه الدركسيون الباور
5 جزنه الزيت الخاصه بزيت الباور
6 طنبوره كرنك غير بتاعتك فى حاجه ان الباور يكون له سير خاص بيه
7 قاعده طرمبه الباور
طب لو ملقتش على النت عربيه نزله باور من موديل عربيتك او لقيت فعلا بس ملقتش قطع الغيار دى متوفره فى الوكاله و عزبه شلبى
فى الحاله دى تدور على ماتور شبه عربيتك و على ما اظن عربيتك الماتور الى فيها هو بتاع الريجاتا انا مش متاكد خالص من المعلومه دى بس كنت سمعت الموضوع ده
بس اكيد مهما كان نوعه إن شاء الله هتلاقى حاجه شبهه و هيكون نازل فيها باور طبعا انا بقولك تدور على ماتور شيهه عشان تجيب الطرمبه بتاعت الباور الى تتناسب مع شكل ماتورك و الى اهم من كده القعده بتعتها الى هتبقى ماسكه الطرمبه لانه دى مهمه اوى لان اى قاعده عموله مع الوقت بتكسر و بتعمل مشاكل زى قواعد التكييف الى متركب على موديل مفيهوش تكييف اصلن
لما ربنا يوفقك فى الجزء ده هيبقى فاضل عندك حاجه مهه جدااااا
انك تفك الاسكتره او علبه الدركسيون من عربيتك و تخدها و تنزل بيها الوكاله و تدور على واحده باور بس تكون بنفس المقسات و اماكن التثبيت لان الاسكتره بالزات لو لقدر الله مكنتش مناسبه او متثبته صح ممكن لاقدر الله يحصل فيها اى حاجه و انت على الطريق و تفقد السيطر على العربيه و مش عاوز اكمل لاقدر الله
لو لقيت زيها بالظبط بس اطول شويه مش مشكله ممكن لما تتاكد انها سليمه تفك منها البارات و تعدلها عند خراط بس لازم الاول تتاكد انها سليمه عشان لو عدلت فيها مش هينفع ترجع
و طبعا هتجيب بقيه الحجات الى فى اللسته الى فوق الى انا كتبتهالك
بس طبعا طبعا طبعا الموضوع ده هيتكلف معاك فى حاله انك تلاقيه استيراد لنفس موديل عربيتك مش هيكون اقل من 3500 جنيه
و لو انت هتعمل الموضوع التانى انك توفق بين حجات عشان تتركب عندك هتكون التكلفه حوالى 2000 او 2500
و يا ريت فى الحاله دى تروح لحد متخصص تعديل عربيات مش مجرد ميكانيكى باور عشان الناس بتوع الباور الى فى شمبليون انا اتعملت معاهم قبل كده فى عربيتى و كلهم مبيفهموش اى حاجه يشيلو و يحطو بس كفايه انه كانو فاكرين انى معدل عربيتى باور مع انها اصلن بتنزل من بلدها كده
ربنا يوفقك و تقدر توصل للموضوع بس هاكد عليك اوع تقصر فى عوامل امان عربيتك يعنى لو لاقدر الله لقيتها اه الدركسيون بقى خفيف بس العربيه بتعوم مثلا اوع تسكت عليها و تفرح بالباور مش مشكله لو تعبت شويه و انت سايق بس متموتش نفسك
ارجو انى اكون رديت رد كافى لسؤلك