الموضوع: ايهما افضل ارجو عدم الخناق

روح اتفرج على byd l3 الجديدة العادة والاتوماتيك عربيه تحفه وسعرها هايل ....المانيوال 88 ...الاتوماتيك 97

انا حجزت ال l3 المانيوال ب 86000، العربية فعلا تحفة

السلام عليكم... انا هحكيلك تجربتي في الايام اللي فاتت
انا كنت اليومين اللي فاتوا محتار نفس حيرتك دي جدا جدا، يمكن كمان هتلاقيني عضو جديد علشان انا دخلت المنتدى مخصوص علشان اسأل الناس الخبرة اللي هنا و مكنتش اعرف المنتدى اصلا!
مبدئيا لازم نفصل بين العربيات الصيني بتاعة زمان و العربيات الصيني بتاعت دلوقتي لان الصين حصل عندها طفرة كبيرة جدا في صناعة السيارات خلال الصنين القليلة اللي فاتت.
انا مرتبط بميزانية لا تزيد عن 90,000 كحد اقصى و مش عايز اركب فيرنا ولا لانوس فكان لازم افكر طبعا في العربيات الصيني لانها هي اللي بتقدم كماليات بسعر مناسب.
المهم، عجبتني الامجراند شكلا و نزلت اتفرجت عليها مرة اولى علشان اخد فكرة عامة ، عجبتني من جوة الى حد ما ، و وقفت سواق تاكسي راكبها و شكرلي فيها و قابلت ناس قاعدين على القهوة اللي بقعد عليها سألت صاحبها عليها قالي مش بطالة بس مكانش مبسوط و هو بيتكلم عنها بمعنى اخر مش زي واحد لسه شاري عربية جديدة عن اقتناع و بيتكلم عنها بحماس... فاهمني
انا مخدتش ولا اديت و نزلت اتفرج عليها تاني خصوصا اني كنت شايل الBYF F3 من حساباتي علشان تابلوهها الاجزاء الشبه خشبية اللي فيه مكانتش عاجباني رغم انها سيارة جيدة و الاتوماتيك بتاعها ب 87000.
انا من الناس اللي مش بتتأثر بكلام الناس بسهولة بس برضو بحب استشير غيري و رغم الجدل و الخلاف الكبير على العربية هنا في المنتدى الا قررت اني خلاص اشتريها، و نزلت اتفرجت عليها تاني و اتفقت مع البائع اللي المعرض و كده.
تاني يوم الصبح و انا في المهندسين قابلت شاب راكبها و قفته و نزلت ركبت معاه قاللي اوعى تشتريها دانا لسه جاي من حماية المستهلك و اشتكيتهم فيه علشان كذا مشكلة في العربية و خصوصا الفرامل عنده! و قاللي بالحرف"انا ركبت byd [مش بتاعته] و فيرنا و لانسر و لو عايز تشتري اتكل على الله وهات الbyd"قاللي انا لو الزمن رجع بيا تاني كنت اشتريتها. اتا ساعتها كنت معرفش عن byd غير f3
انا من ساعتها و انا اتقفلت من العربية دي تماما و كأن دي كانت رسالة من ربنا ليا، طبعا في ناس بتشكر في العربية جدا بس انا ليه احط نفسي في محل الجدل الكبير ده و اوجع دماغي و بعدين الواحد بيركب زيرو علشان يريح نفسه و يشتري دماغه.
و انا بدعبس على المنتدى لاقيت حد بيتكلم عن موديل جديد ل byd اسمه l3 و قريت تقرير للاخ ابو جيسي الله يباركله بيتكلم عن العربية بالتفصيل، عجبتني العربية و قررت اني اروح مصر الجديدة معرض شركة الامل علشان اشوفها.
فعلا رحت و شفتها و اتفاجأت بالعربية ، العربية فيها كل ما يمكن ان تحلم بيه بسعر هايل و لولا ضعف التسويق ليها العربية دي كانت اكلت السوق و اكلت اي عربية تانية و ده ما زال المتوقع اذا سعرها ما زادش.
المهم قلت اعمل اللي عليا اتفرج على الاسبيرانزا (انفي-m12-m11) من باب العلم بالشئ و رحت المعرض اللي سور نادي الزمالك بس ملاقيتش غير الm12 بس لاقيتها مش مناسبة ليا و كمان معجبتنيش قوي، البياع مكنش عارف اي حاجة عن اي حاجة و اكتفى بانه اداني البروشور بتاعها و لما سألته عن الموديلات التانية قاللي اناه لسه هاتنزل بس مايعرفش هتنزل بكام ولا في تغيير في سعرها ولا لأ.
انا في الايام اللي بعدها حسيت نفسي في الl3 و لاقيت نفسي تلقائيا بدور عليها و بقرا عنها و بنزل صورها (وبدأت قصة حب جديدة :D) و قررت اني انزل احجزها، و لو عايز تعرف عنها اكتر ممكن تقرا تقرير ابو جيسي و تحت امرك في شئ.

المشاركة الأصلية كتبت بواسطة abojessy

الله يبارك لك يا أخى الفاضل
وربنا يعطيك كل مافيها من خير ويكفيك كل شر

وأقول لك بصراحة وبكل ثقة لقد وفقك الله لأن byd l3 - 2015 الجديدة أفضل سيارة صينى دخلت مصر على الأطلاق
وقريبا ستعرف مصر كلها قيمة هذه السيارة .
خصوصا لو تحرك التوكيل وعمل لها الدعاية المناسبة
تصور يا أخى العزيز ان هذه السيارة بكل ما فيها من امكانيات وكماليات هائلة لا يعرف احد عنها شئ او انها حتى موجودة فى السوق
ولا اجد سبب واحد يفسر لى هذا التصرف الغريب من التوكيل

الف مبروك وفى انتظار تقرير بعد استلامها باذن الله

ربنا يخليك يا أخي و بجد انت سبب رئيسي اني اعرف العربية دي و احبها.
و معاك حق طبعا في قصة التسويق دي، حاجة محزنة لما تلاقي عربيات اقل منها جدا و الناس عارفاها بالاسم و راكباها و بتدفع فيع فيها مبالغ طائلة! و التوكيل بيبرر ده بالحريق اللي حصل في المصنع و انه لو عمل دعاية مش هيقدر يغطي الطلب عليها!
بس اعتقد في الفترة الجاية ان العربية هتبيع نفسها و هتفرض نفسها من غير دعاية و انا كنت في المعرض امبارح و لاقيت كذا حد بيتفرج عليه و منبهر بيها و كمان لاقيت ناس بتستلم خصوصا ان الاوتوماتيك نزل و موجود في المعرض.
ان شاء الله بمجرد الاستلام على خير هقدم تقرير للاخوة هنا في المنتدى.

خليك فالبي واي دي فرأي

اشكرك فعلا على الاهتمام انا بعشق byd فعلا ولكن للاسف مفيش اهتمام بيها ولا من الوكيل ولا ليها مراكز صيانه منتشره اما الجيلى والبرليناس فى اهتمام بيهم بس السؤال الان كل السيارات الصينى والكورى بتبدتى من فئه معينه يعنى من اول 83 ايه الى يميز الصينى عن الاونس او الفيرنا او لوجان مع ان شكل الوجان 2015 تحفه