اشتريت فيرنا اوتوماتيك تعمل بالغاز

الحمد لله بعد طول بحث وتردد . كنت محتاج سيارة تصلح للمنيا وشوارعها ويفهم في صيانتها الميكانيكية اللي هنا .. ويكون مكيفها قوي وقطع غياره متوفرة في المنيا .. وكنت هركبلها غاز عشان البنزين عندنا شحيح وفي ازمة بعكس الغاز المتوفر ومافيش اي تكدس عليه


والحمد لله لقيت في النت طلبي واشتريت فيرنا اوتوماتيك مستعملة موديل 2008 تعمل بالغاز فابريقة برة وجوة ماشية 90 الف كم

اجمل ما في السيارة هو الغاز .. راكب من سنة 2008 بتكلفة 6 الاف جنيه .. ومعمول له صيانة دورية من وصلات وخراطيم . وله زرار التحويل مخفي في درج العملات ..

التفويلة تكلف 16 جنيه ووصلتني من القاهرة للمنيا مسافة 300 كم تقريبا .. نفس المسافة دي كانت تكلفني حوالي 75 جنيه بنزين .. ولكن وزن الاسطوانة وهي مليانة يتعدى ال 50 كيلو بالراحة وكان مأثر على سرعة العربية وقوة السحب .

الغاز يعمل بنظام الحقن التزامني .. ضخ الغاز لا يتم الا بعد تسخين المحرك بالبنزين اوتوماتيكيا ويبدأ الضخ عند وصول عداد لفات المحرك الى 2000 .. ثم يستمر الضخ حتى ولو نزل عداد لفات المحرك تحت ال 2000


المكيف قوي جدا .. الفرامل ممتازة وليس كما هو مشهور عن الفيرنا ..صوت الموتور عالي .. عزل جيد ..

http://im71.gulfup.com/AfsORJ.jpg

http://im71.gulfup.com/gHE7ua.jpg

انبوب الغاز مخفي بطريقة ممتازة وواكل ثلث الشنطة تقريبا

http://im71.gulfup.com/leiWwe.jpg

مكان مفتاح التحويل

http://im71.gulfup.com/wZ33le.jpg

جهاز الغاز
http://im71.gulfup.com/iP2jVE.jpg

:beeangel:

اجراءات نقل الملكية هي اللي قرف في قرف :-

الشهر العقاري رسوم العقد المسجل هي 1120 جنيه

توجهت لمرور مديرنة نصر لعمل شهادة بيانات اخذت ساعتين فيها

ثم توجهت ثاني يوم للمنيا وبدات معاناة الترخيص ولابد من الاستعلام الامني عن السيارة بواسطة جهاز في المرور يكشف عن رقم السيارة ورقم الموتور والشاسيه مع ان جايب لهم شهادة البيانات معتمدة ومختومة فيها الكلام ده ..

مطابقة البصمة انتهت والحمد لله بعد اقرار هذا الاجراء ( الاستعلام الامني من الادارة العامة للموور بواسطة الجهاز )

الف مبروك وربنا يباركلك فيها انا بفكر بطريقة حضرتك تماما لان الغازهوالامل الوحيد بعد ارتفاع اسعار البنزين
لكن انا عارف ان الفيرنا واطية ومع وزن الانبوبة هتبقى واطية قوى تخيل لو حبيت تحمل ٤ افراد بالخلف هيحصل ايه عشان كده صرفت نظر عن الفيرنا الاتوماتيك وبفكر فى البى واى دى الاتوماتيك وهعملها غاز لانها علية عن الارض وشنطتها واسعة ومحدش اشتكى منها

موتور الفيرنا لو تآكل بسبب الغاز كما يدعون ثمنه استيراد في حدود 5 الاف جنيه ومتوفر .

مشكلة الوطيان عند تحميل العربية هو مشكلة كل العربييات .. ركب علايات بلاستيك في الاربع عجلات اللي ارتفاعها 3 سم وتركب تحت الياياات

مبروك
ناقصك علايات علشان تعادل وزن الاسطوانة

الف مبرووك

الله يبارك فيكم .. شكرا جزيلا

هشوف هل فعلا راكب علايات ولا لا

مثلث وشنطة وطفاية ومحفظة جلد ب 220 جنيه

بوليصة سنتين شركة مصر للتأمين 220 جنيه

ضريبة سنتين ب 480

لايوجد لوحات مرور ويتم دق لوحات يدوية على صفيحة بارقام بدون حروف

الف مبروك بس قلنا خلصت فيها بكام

سعر المانيوال نفس الحالة والموديل حوالي 55 الف

وبما ان سعر الاوتوماتيك الزيرو يزيد عن المانيوال حوالي 12 الف جنيه فبالتالي رينج سعر سيارتي حوالي 65 تقريبا بالاضافة للغاز

فانا اشتريتها ب 68 وفي النهاية موضوع البيع والشراء ده بالتراضي بين الطرفين مهماك ان السعر

اقتباس:

---

المشاركة الأصلية كتبت بواسطة drcobra

مبروك
ناقصك علايات علشان تعادل وزن الاسطوانة

---

لقيت فيها كاوتش علاية اسفل السوست الخلفي يبلغ علوه 3 سم تقريبا

الف مبروك يا فندم
ربنا يملهالك بركة وتاخد خيرها

الله يبارك فيك جزاكم الله خيرا ..

ركبت فيها شاشة وكاميرا رجوع خلفي مثبتة اعلى لوحة الارقام الخلفية

http://i1104.photobucket.com/albums/...ps2390a910.jpg

الكاميرا ثمنها 160 جنيه والشاشة تركب فوق مراية الصالون ثمنها 550 جنيه

--------------------

واشتريت كاسيت بايونير بلوتوث بينقل الاغاني مباشرة من الموبايل وبالطبع استقبال وارسال التليفون وعرض الاسماء ع الشاشة بتاعته ويقوم بعمل الامبليفاير ايضا ثمنه 1050 جنيه

DEH-X4650BT Car stereo with MIXTRAX™, Bluetooth®, USB Control for iPod®/iPhone®, Android™ Media Access and Pandora® - Pioneer Car Stereo, Radio

وركبت 4 سماعات بيونير مكان السماعات القديمة .. كل زوج ب 220 جنيه

وناقص اركب بازوكا بس مش لاقيها حاليا .

تحديث .. الفرامل ضايعة خالص .. مسافة التوقف طويلة جدا وفين وفين لما تقف --

نقلت عقد الغاز باسمي بتكلفة 25 جنيه
وعملت صيانة لجهاز الغاز ومراجعة على البوجيهات والاسلاك

مش كانت من شوية ممتازة مش زى ما هو مشهور عن الفيرنا
شكلك أتحسدت يا أبو صلاح

لازم اقول الحقيقة فعلا الفرامل لا تسعف ابدا في التوقف المفاجئ يمكن عشان الوزن الزائد

كمان نظام الغاز هو بالنظام القديم Mixer وحاليا يوجد نظام جديد ب 6300 جنيه اللي هو الحقن التزامني injection زي رشاشات البنزين بالظبط

طيب حاول تكشف عالفرامل يا باشا
وتشوف الكاوتش حالته ايه بيفرق مع الفيرنا
خصوصا لو ركبت بيردجيستون مثلا ويكون تماسك قوي

الكاوتش GT radial الاندونيسي جديد راكب من 8 اشهر

-----

اليوم ركب انذار wolf ولغيت ريموت المفتاح الاساسي وسبب تركيب الانذار عشان لمبة البيان الزرقاء الخاصة بالانذار اللي تتحط بين التابلوه والبربريز قد تكون سبب في عدم تعرض السيارة للحرامية .. وبالطبع قمت بتركيب كتاوت قطع مع الانذار بحيث يعمل كمانع ادارة محرك وتمت التجربة والحمد لله ..
التكلفة 200 الانذار و 100 تركيب شامل الكتاوت

اقتباس:

---

المشاركة الأصلية كتبت بواسطة د.محمود صلاح

تحديث .. الفرامل ضايعة خالص ..

---

لازم تركب جنوط 195/50/15 هي اللي بتدي الفيرنا ثبات وقوه في كبس الفرامل حسب تجربة ناس كتير جربت المقاس دا وبيشكروا فيه وبيقولوا انو افضل حل لمشكلة فرامل الفيرنا

وفي تاكسي كمان بعرفوا شغلوا دايماً سفر خارج القاهره بس الفيرنا بتاعتو منوال وهو مركب المقاس دا بيقول وكأنك راكب ألماني من حيث الثبات وقوة الفرامل يقول عيب الفيرنا بودي

صغير وموتور كبير عليها لكن من تديها جنوط 15 بتحس وكانك مربطها على الارض وهي بتمشي

شكرا للنصيحة .. ان شاء الله هعمل كده كخيار تاني بعد ما اغير التير وامس الطنابير

رحت لعفشجي لتربيط العفشة بالكامل امامية وخلفية وكان فيها رباط .. كلفني 15 جنيه وحوالي نصف ساعة تربيط

النتيجة تحسن ملحوظ في اصوات الدبدبة المصاحبة للمطبات ..

طاسة الفيرنا الاوتوماتيك مختلفة عن العادي

هي تشبه دي

http://i1104.photobucket.com/albums/...ps626e3a1f.jpg

فيها غطا صغير له ارجل والارجل دي دايما بتتكسر فبالراحة عليها اهو وانت بتفكها .. وتحتها ستجد مسامير الجنط فوق الغطا وبالتالي مش محتاج رباط حزام على الغطاء

انا كان معايا فيرنا مانيوال 2007 وكنت عايز اركب ليها غاز بس بصراحة خفت , ياتري اخبار سحب العربية اية علي الغاز.

السحب بالغاز زي البنزين مافيش فرق ، العربية اوتوماتيك بتاخد الغيار براحتها حسب ضغطة دواسة البنزين ، والاتوماتيك مش بتاع شد وجري خالص


الفتيس الأوتوماتيك ده ما بيقفلش بعد انطفاء السيارة يعنى ممكن اغير مكان عصاية الفتيس والسيارة مطفية . لكن لن تشتغل السيارة والفتيس على ال d . R . 1 .2
وكمان لا يحتاج ضغط على الفرامل لكي تحرك عصا الفتيس من p لتحت ( ياما سيارات تعطلت واتسحبت على ونش بسبب السويتش بتاع الفرامل وتشغيل السيلرة ونقل عصاية الفتيس )

هل تغيرت القناعات بعد هذه الاشهر الطويله ؟؟

Gt سيء
ولو غيرت شوف نوع معامل الفرامل ليه عالى

اقتباس:

---

المشاركة الأصلية كتبت بواسطة azkol2005

هل تغيرت القناعات بعد هذه الاشهر الطويله ؟؟

---

كل واحد ظروفه تختلف .. انا في المنيا عندي دي العربية المناسبة تماما من حيث قطع الغيار والصيانة ووفرة محطات الغاز وصعوبة الحصول على البنزين .. وبالتالي قناعاتي لم تتغير .. فقط مش لاقي طاسات بدل اللي بتطير دي ..

غيرت فانوسين خلفيين بالكامل الواحد ب 75 جنيه

اقتباس:

---

المشاركة الأصلية كتبت بواسطة a.saad

gt سيء
ولو غيرت شوف نوع معامل الفرامل ليه عالى

---

انا اتعودت على ضعف الفرامل وتكيفت بزيادة الضغط على الدواسة ، وهغير الكاوتش ان شاء الله الاجازة دي ويمكن اركب جنوط وهبقى اقولكم على النتيجة