يا جماعه في عربيه c300 معروضه للبيع في كونتاكت كار وكانت معروضه على الموقع هنا وبيقولوا انها مش رشه حاجه انا رحت كشفت عليها في التوكيل وكنت بشتريها وطلعت مرزوعه من الجنب اليمين قدام وكانت فاتحه شاسيه وراشه القايم والرفرف والفخده من جوه فخلي بالكم
عرض للطباعة
يا جماعه في عربيه c300 معروضه للبيع في كونتاكت كار وكانت معروضه على الموقع هنا وبيقولوا انها مش رشه حاجه انا رحت كشفت عليها في التوكيل وكنت بشتريها وطلعت مرزوعه من الجنب اليمين قدام وكانت فاتحه شاسيه وراشه القايم والرفرف والفخده من جوه فخلي بالكم
شكرا للتنبيه يارت تجيبلنا اللينك والصور
الغش بقي ملوش حدود ناس لا تستحي
شكرا للتنبيه بس فعلا يا ريت اللينك علشان الناس تاخد حذرها
شكرا للتنبيه :)
بس اعتقد ما ينفعش يحط اللينك الا لو كان معاه ما يثبت كلامه ، طبعا انا مش بكدبه، بالعكس ، بس عشان ما يبقاش اي حد يدخل بسهولة يسوء سمعة اي عربية والله اعلم بحق ولا بدون حق
بص يا باشا الواحد لازم يفترض سوء النيه قبل ما يتفرج
٩٩.٩٩ ٪ من المعروض لازم يكون مخبي الحاجه المهم تبقى حاجه مقدور عليها زي شغل في عفشه مثلا
انما عادي تلاقي عربيه حادثه او نصين و يقول لك فابريقه مرفوعه ١٠ سنين بحاله شاذه استخدام طبيب
و الملاحظ ان معظم المستعمل لغاية ١٠ سنين فاتوا كله عداده من ٤٠ الف ل ٦٠ تقولش كله راكن العربيه و بيتمشى على رجله امال ام العربيات اللي زاحمه الشوارع ٢٤ ساعه نظامها ايه
جزاك الله خيرا علي النصيحة ،
بالفعل فيه ناس كتير بتقع في المشاكل دي وهي بطيب خاطر بتكون مفترضة الأمانة في البائع ،
ولكن هي دي النفس البشرية ، سبحان الله .
عامة شكراً لك وجزاك الله خيراً علي النصيحة
فعلا بيحسسوك ان البلد كلها رافعة عربياتها كأن انا الوحيد اللى سايق :U_thin1[1]: !!!!!!!!!
و كمان بسأل نفسى كل ما اروح مشوار سمكرة او دوكو
و الاقى عربيات كتيييييييييييير بترش دواخل و عربيات كتيييييييييير بتتلحم
و تيجى تدور ف سوق المستعمل تلاقى معظم الناس عربياتها فابريكة او راشه اكصدامين
و تلاقى اللى بيبيع عربيات بقالها اكتر من 10 سنين و يقولك فابريكة
طيب الناس الكتير اللى رشوا دواخل ,, بيموتوا مثلا بعد مابيرشوا عربياتهم
و لا بيسوقوها ف مكان تانى غير مصر ؟!!!!!!
عشان تبقى عارف اي حد بيعمل شغل في شاسيه سواء في التوكيل او في ورشة سمكره شهيره طلبه الاساسي مش سلامة العربيه ده طلب طبعا مهم بس الباشا اول حاجه بيكلم فيها السمكري انها ما تبقاش باينه نهائي يقوم السمكري رادد بكل ثقه اتطمن ياباشا دي لو جت تكشف عندي بعد كده انا نفسي هفتكرها فابريقه دواخل و طبعا المشتري يلبس زي الحلاوه
امال الواحد بطل يشتري مستعمل ليه
عذرا يا بهوات انا مش حينفع احط اللينك بتاع العربيه علشان مبقاش بسيء لحد انا قلت بس انبه حضراتكم هي لونها فيراني فرش اسود ترخيص الجزيره وسقف بانوراما وعامله ٦٢ عداد وانا لو كنت صورت الريبورت بتاع التوكيل كنت نزلتهولكم وعلى فكره كانت متصلحه في التوكيل برده بس فرع تاني والناس الي في توكيل مرسيدس الاهرام الي عند حازم حسن قمه في الاحترام الصراحه المهم ان انا كنت رحت شفتها وعجبتني واللهي فيها ريحه الفبريكه يا جماعه مستحيل تقول دي متنيله كده وكنت واخد الفلوس معايا وحخلص والي يضحك انهم في التوكيل المهندس كل ما يكشف على حاجه يطلع يقولي ميه ميه ويشاورلي بصبعه الموتور ميه ميه العفشه ميه ميه الجيربركس ميه ميه وانا طاير من الفرحه بالكلام ده لحد ما كشف ا على البودي والبويه وكانت المفاجاه انها مرزوعه وكانت فاتحه شاسيه واتعملت في التوكيل بلحامات شبه لحامات الفبريكه والحمد الله ان ربنا نجاني منها لانه عارف الواحد جايب الفلوس دي ازاي وتعبان فيها قد ايه