لإصحاب الخبرة في ابيزا و بولو

السلام عليكم

انا بجد محتار تماما مش فاهم اي حاجة عمال ادور علي مقارنات مابين ابيزا 94 و بولو 99 -98

مره ادخل القي ان ابيزا افضل بكتير من حيث ثبات و موتور ومره القي ان بولو افضل من حيث ثبات وجري فـ لحد لدوقتي انا مش فاهم مين فيهم افضل من حيث ثبات وسرعة و قطاع غيار
واكيد زي اي شاب عاوز عربية شبابي بتشد فـ يا ريت من اصحاب الخبرة واتمني اللي يرد يكون معاه بولو او ابيزا او مجرب الاتنين وليه خبره جامده فيهم وينصحني بالافضل لإني بجد واللهي محتار تمام و وناس من صحابي تقول بولو اجمد وناس تقول ابيزا اجمد

ياريت من اصحاب الخبرة يفهموني بالتفصيل من فيهم افضل

ابيزا افضل كموتور و تقفيل
بولو تكسب قوة عفشة و رخص و انتشار قطع غيار و اعادة بيع

يعني تعتبر الافضلية لمين انا مش فاهم والمشكلة انا عاوز حاجة ثبات وسرعة وقطاع غيار تمام

ابيزا من 94 - 2002 = بولو 95 - 2002

كلهم على شاسيه واحد
الاختلاف ان الابيزا الحوض بتاعها حوض جولف لكن حوض البولو اصغر شوية
وعشان كده الابيزا بيتسقطلها مواتير مينفعش تتسقط فى البولو

صالون الابيزا اوسع من البولو

عفشة الابيزا 90% منها نفس عفشة البولو والـ 10% اللى باقية عفشة جولف

الابيزا بينزل فيها مواتير من اول 1000 سى سى لغاية 2800 سى سى 6 سلندر بدون تعديل او لعب فى اساسيات
البولو اخرها 1600 سى سى بدون تعديل

موضوع الشد والثبات والكلام ده كله ملوش لازمة تشغل بالك بيه لأن العربيتين مش زيرو عشان تقارن بينهم + ان الاتنين على شاسيه واحد وده يخلى الوزن والابعاد قريبة جدا من بعض والفرق بينهم مش كبير وميستاهلش تشغل بالك بيه

قطع الغيار المشتركة بينهم زى العفشة والمواتير كلها طبعا نفس السعر
قطع غيار الصاج والفوانيس تقريبا بعضه زى بعض ولو فيه اختلاف هيكون لصالح الابيزا

فى النهاية العربيتين زى بعض بنسبة كبيرة والاختيار هيكون على حسب الحالة اللى هتلاقيها

العربيتين واحد مع بعض الاختلاف البسيط والموضوع أزواق فى الشكل
الناس الى بتقلك خد البولو يمكن بتبص على العلامة vw لانها معروفه مش أكثر وده لعدم معرفتهم طبعا بالابيزا والسيات بوجه عام وده بيخلى سرعة أو أرتفاع معدلات أعادة البيع لصالح البولو أو حاملى علامة vw

يعنى شوف مين مستريحلها أكثر كشكل ومش هتفرق كتير

الأيبيزا والبولو واحد الا فى امور محدده واهمها تسقيط المواتير زي ما الأستاذ / كريم قالك .

وانا مع رأي الاستاذ / حسام فى ان الفيصل فى المقارنه ده هو الذوق الشخصي والحالة النضيفه الى تقع تحت ايدك .

رأي ونصيحه ما تديش الأيبيزا والبولو ثقه جامدة بعد سرعه 140 كم / ساعة ، لكنها فى السحب والمراوغة هتعجبك جدا جدا جدا وكلامى عن موديل ايبيزا 94 عشان مجربها لحد 170 كم/ساعه.

اقتباس:

---

المشاركة الأصلية كتبت بواسطة egman

الأيبيزا والبولو واحد الا فى امور محدده واهمها تسقيط المواتير زي ما الأستاذ / كريم قالك .

وانا مع رأي الاستاذ / حسام فى ان الفيصل فى المقارنه ده هو الذوق الشخصي والحالة النضيفه الى تقع تحت ايدك .

رأي ونصيحه ما تديش الأيبيزا والبولو ثقه جامدة بعد سرعه 140 كم / ساعة ، لكنها فى السحب والمراوغة هتعجبك جدا جدا جدا وكلامى عن موديل ايبيزا 94 عشان مجربها لحد 170 كم/ساعه.

---

مع كامل احترامي لحضرتك انا البولو بتاعتي جايب بيها 180 هيا من بعد 160 و تحس انها خفيفة سنة

بس مش مناورات نهائي 160 عادي جدا بعد كدة خطر ... ملاحظة كمان ... الابيزا لقيت انها ماسكة في الارض

نوعا ما عن البولو لما جيت سقتها ... مش عارف دا احساس ولا دي حقيقة

متشكر يا جماعة بجد خصوصا استاذ كريم وحسام لإني بجد ردهم كان من الاخر وكلام مقنع تماما