محتار في نوع الديب فريزر أرجو النصيحة

**M_Marwan** · 03-09-2014 04:19 PM

انا اشتريت وايت ويل محترم جدا روح اتفرج عليه وشوف تقفيله عامل ازاى

**abokoko** · 03-09-2014 07:54 PM

المشاركة الأصلية كتبت بواسطة mo7a_mo7a

بس غالي جدا 4900 جنيه

الارستون
لو تعرف تجيبه من اسواق المنطقه الحرة
بيفرق مبلغ كبير

عموما
عندى وايت بوينت جميل وصوته هادى وحجمه كبير
7 درج فى حدود ال3200 وممكن اقل

**Mohamed_Hamid** · 03-09-2014 10:41 PM

حط فى اعتباراتك نوع اسمه بيكو
ماركة محترمة جدا ومعروفة عالميا ولهم مركز صيانة فى مصر

**أبو ياسين** · 03-09-2014 10:52 PM

انا كنت فى نفس مشكلتك
و بقيت اشترى اون لاين من cairo sale بنفس السعر مع التوصيل مجانا و توشيبا موجود
الاربعة درج
توشيبا فريزر نو فروست 195لتر 4 درج GF-18H – القاهرة للمبيعات – TOSHIBA مصر
الخمسة درج
توشيبا ديب فريزر 5درج + رف نوفروست GF-22H – القاهرة للمبيعات – TOSHIBA مصر
اطلبهم و هيوصلو لحد البيت

**Ahmed A Rahman** · 04-09-2014 01:17 AM

أمانة عليك يا شيخ بلاش كريازي حتى لو حتشتري منهم حنفية
خدمة العملاء تحسهم ناس جايه عشان البقشيش
الثلاجة عندي كريازي وصوتتها عالي جدا جم مرة بيحركوا التلاجة بيقولي : ان المفروض محركهاش بس عشان حضرتك يا فندم :)

نيجي للانواع التانية
توشيبا على الرغم انه حلو فهو صغير جدا على ديب فريزر اتعمل عشان التخزين وصدقني برضه المدام حتشتكي لك ان الديب فريزر مليان ومش لاقيه مكان تحط فيه حاجه
متتخيلش ان حجم الديب فريزر لما بتفتحه انك حتملاه لحمه وفراخ :) :) فتتخيل انه يشيل 100 فرخة مثلا Absolutely

بمجرد ما الديب فريزر بييجي بيتشال فيه حلل وتخزين كل ما تتخيله وما لا تتخيله من خضار وطماطم وفاكهة موسمية ولحوم وسمك وحتى الشوربة المجمدة

عشان كده هات الاكبر زي مانا عملت : Zanussi فريزر 7 درج تركي
بعد سنة استخدام لاحظت انه بديني Low Freezing
جت الصيانة تاني يوم وضبطت الدنيا وكان العيب مروحة مش اكتر وشغال زي الفل
صيانتهم في منتهى الادب والاحترام
انصحك بيه

**mo7a_mo7a** · 04-09-2014 01:27 AM

اولا انا سعيد جداً جداً بالتفاعل الكريم ده
وبشكر كل اللي شاركوا في الموضوع بالنصيحة المخلصة
تحياتي لكل الزملاء الافاضل

وعلشان ابشركم ... المشكلة الحمد لله اتحلت واشتريت بالفعل

ولكي تعم الفائدة اسمحولي انقل التجربة بالتفصيل علشان ناس اكتر تستفيد من التجربة دي

انا بدابة قسمت الماركات لفئتين
اولا ماركات مقبولة حختار منها:
توشيبا
زانوسي
ارستون
وايت بوينت
وايت ويل
سامسونج

ثانيا ماركات مستبعدة تماماً:
الكتروستار : السبب ان شكله مش عاجبني
كريازي: لان التقفيل سئ جداً جداً جداً ممكن يكون الموديلات الاقدم احسن لكن الحالي مش كويس ابداً
يونيفرسال: ليا صديق بيشتغل في المصنع وقالي بلاش لان الصيانة بتاعتهم مش كويسة وعندهم مشاكل كتير في الموضوع ده لدرجة ان الشركة بتبيع بعض المنتجات بدون ضمان!
ألسكا: هي شركة جيدة ومنتجاتها محترمة لكن بردو الشكل مش مقنع وكمان التكنولوجيا اقدم شوية

وبدات الخطوة الاصعب اللي هي المقارنة

أولا توشيبا:
هو كان اختياري الاول وبقالي مدة طويلة بدور عليه ومش لاقيه ابداً
ورحت فرع الشركة في ش فؤاد ومجاش يقاله اكتر من 3 شهور وموجود عند بعض الموزعين بسعر 3500 للخمس ادراج
((ولاني من الاسكندرية فكل الحلول اللي اقترحوها الزملاء عن شارع عبد العزيز ومدينة نصر والشراء الالكتروني لا تناسبني – ولهم جزيل الشكر طبعاً))

ثانياً زانوسي:
معنديش معاه مشكلة بالعكس شكله حلو جداً وشيك ومساحته رائعة وممكن اشتريه من الشركة والتوصيل مجاناً وسعره 3220 للابيض 7 درج والضمان كويس والشركة معروفة ومتجرب

ثالثاً وايت بوينت:
مش موجود كتير وهو هو نفس الزانوسي فمفيش الحاح اني ادور عليه

رابعاً وايت ويل:
ماركة مش وحشة وانا عندي منتجات ليها ومش بطالة بس تصميم الديب فريزر مش منافس وكنز شوية واقل في الحجم بسيط

خامساً سامسونج وارستون:
خرجتهم من المقارنة علشان السعر غالي وفوق الميزانية اللي انا محددها

وبالتالي التصفية الاولي نتج عنها
زانوسي

وفي يوم رحت لمعرض قريب من البيت قلت اسال علي السعر لو لقيته اقل من الشركة يكون احسن وهناك صاحب المعرض قالي متاخد ديب فريزر فرش!
بصراحة انا مكنتش اعرف انهم بيعملوا ديب فريزر
المهم اتفرجت عليه ولاحظت انه هو هو نفس الديب فريزر بتاع زانوسي ووايت بوينت ويونيفرسال وكمان تركي وارخص لان سعره 3050 للكبير 7 درج ابيض
وكمان لاحظت ان حتى الملصقات الداخلية والتحذيرية اللي موجودة علي الاجهزة متطابقة ونفس الشكل والطباعة واحدة ودي مش ممكن تكون صدفة
فلما سالت صاحب المعرض قالي اصلهم كلهم بيتعملوا في مصنع واحد في تركيا
فقررت اجيب قرار الموضوع ده وافهمه كويس
فقعدت قعدة محترمة علي النت لمدة 4 ساعات واكتشفت الاتي:
انهم كلهم (زانوسي ووايت بوينت ويونيفرسال وفرش) بيتصنعوا في نفس المصنع في تركيا فعلاً وهو اسمه Arçelik A.Ş وهو من اكبر الشركات هناك اتاسست سنة 1955 وفيها 25 الف عامل
وكل الشركات المصري بتجيب الديب فريزر من هناك وبيحطوا عليه العلامة بتاعتهم فقط والفرق بين الجهاز والتاني يبقي في اسم الشركة والصيانة وبعض الاختلافات البسيطة في مواصفات الموتور فقط!!!

طبعاً كانت مفاجأة بالنسبالي وبالتالي قررت اجيب فرش لانه ارخص لكني قلقت من ان يكون الموتور بمواصفات اقل خاصة ان مكتوب عليه انه بيستهلك كهرباء 27 كيلو وات في الشهر وزانوسي 45 كيلو وات
وفي نفس اليوم عملت زيارة لكارفور ولقيت هناك ماركة لفتت انتباهي هي بيكو (BEKO) والغريب انها من انتاج نفس الشركة التركي Arçelik A.Ş بس بمواصات اعلي شوية وشكل اجمل وهو بصراحة عجب زوجتي اكتر
واخدت قرار الشراء بسعر 3179 سبع ادراج فضي ضمان 5 سنوات غير شامل الكابينة والادراج والارفف
العيب الاساسي ان الجهاز مش موجود وده مجرد حجز ومنتظر يوصل خلال اسبوع وطبعا انا في الانتظار

ارجو اني اكون وصلت التجربة بامانة ومصداقية وان يكون ناس كتير استفادت

خالص التحية

**Abo Yasso** · 04-09-2014 01:35 PM

المشاركة الأصلية كتبت بواسطة أبو ياسين

انا كنت فى نفس مشكلتك
و بقيت اشترى اون لاين من cairo sale بنفس السعر مع التوصيل مجانا و توشيبا موجود
الاربعة درج
توشيبا فريزر نو فروست 195لتر 4 درج gf-18h – القاهرة للمبيعات – toshiba مصر
الخمسة درج
توشيبا ديب فريزر 5درج + رف نوفروست gf-22h – القاهرة للمبيعات – toshiba مصر
اطلبهم و هيوصلو لحد البيت

قبل ما اشترى التوشيبا كلمتهم لآنى ساكن جمبهم معندهمش ال خمسه درج وجبته من اسواق عبد العزيز والتوصيل مجانا

**mo7a_mo7a** · 04-09-2014 03:50 PM

الف شكر علي مباركة الزملاء وزوقهم
وان شاء الله اعمل تقرير بعد الاستلام والتجربة

-

-

الموضوع: محتار في نوع الديب فريزر أرجو النصيحة

LinkBack

أدوات الموضوع

عرض

-

-

-

-

-

-

-

-

المواضيع المتشابهه

أرجو النصيحة

الديب فريزر

ايه انواع الديب فريزر الرأسي الكويسة؟

اسعار واماكن الديب فريزر لسوبر ماركت

أرجو النصيحة

الكلمات الدلالية لهذا الموضوع

المفضلات

المفضلات

ضوابط المشاركة