الموضوع: لو حد عمل حدثة وصلح عربيتة فى التوكيل ياريت يدخل!!

اسمح لي اساعد في الرد رغم اني باشتغل في التوكيل واجابتي مجروحة (يعني ممكن اكون متحيز) انما هاقول لك اللي باشوفه وكمان ان اليومين دول فيه عربية قريب لي بتتصلح عندنا ومتابع الموضوع بالظبط :

اولا المميزات :
- اصلاح العربية من الحوادث كجودة بالتأكيد لا يعلى عليها لأن التوكيل عنده كل الأجهزة اللي بتحددها شركة ميتسوبيشي (اجهزة استعدال شاسيه - وكواريك وغيرها) وكذلك كل الأبعاد القياسية للعربية بالمليمتر وكذلك خطوات الاصلاح المحددة من قبل شركة ميتسوبيشي ثم افران الدهان واستخدام افضل البويات العالمية اللي بتنصح بيها الشركة ، واعتقادي الشخصي ان دي حاجات مش هتلاقيها في كثير من المركز غير المعتمدة.
- عند ورود عربية حادثة يتم عمل مقايسة لها يقوم بها مهندس مسئول عن قسم السمكرة والدوكو يقوم بمعاينة العربية وكتابة كل الأجزاء وقطع الغيار المضارة في المقايسة بحيث يتم تغييرها بقطع جديدة ، فيه طبعا سمكرة لكن في حدود بسيطة اما الأكثر هو الاستبدال وده بيخلي العربية ترجع زي الزيرو بعد انتهاء الاصلاح.

ثانيا العيوب :

- نتيجة تغيير كل الأجزاء وقطع الغيار المتأثرة بالحادث مهما كان التأثر بسيط فان اجمالي التكلفة بيكون عالي وعلشان كده دايما انصح مشتري العربية الجديدة بالتأمين عليها لأن التأمين بيتحمل التكلفة ويوافق على 99% من المقايسة اما اذا كنت غير مأمن عليها فالاصلاح بره التوكيل هتلاقيه ارخص لأنه هيلم الموضوع وتكون النتيجة النهائية مش بطالة انما مش Perfect بالتأكيد.

- العيب الثاني هو التأخير لأن الحوادث في مصر اصبحت كتيرة جدا وبالتالي فيه قائمة انتظار انما ده لا يمنع ان فيه انجاز رغم ضغط الشغل والمهم انك تستلم عربيتك بعد الانتهاء زيرو تاني.

وبالمناسبة التأخير ده في كل التوكيلات فمثلا اخويا معاه فيرنا 2008 في رمضان واحد خبط له الباب والعربية راكنه وداها غبور وبعد المعاينة والمقايسة وموافقة التأمين آخر كلام هيبدأوا شغل 25 اكتوبر ويستلمها 25 نوفمبر (والموضوع باب ومراية).

شكرا لكلامك يا استاذ خالد وانا معملتش غير الواجب (بس كان نفسي حد يعمل معايا اي واجب في غبور لعربية اخويا)