العربية بتاعتي فيكترا 2003 cd الموتور 2000 سي سي 2 كامة
العربية بتاكل بنزين كتير جدا
في السفر 140 كم في الصفيحة وجوا البلد بي 80 و100 كم في الصفيحة
العربية لما ادورها الصبح واسخنها أجي أزودلها ألاقيها بتقطع عند 4.5
أبطلها وادورها تاني ما تقطعش غير علي 6.5
طبعا شكيت في حساس الكامة
كنت عند شكري بغير جوان الفرن قلتله
نظفلي حساس الكامة وغيرلي البوجيهات وقاللي العربية حريقها كويس
يوم السبت وانا جاي من القاهرة قبل ما اوصل المنصورة بحوالي 30 كم لقيت العربية فجاة اتكتمت
ىجي ادوس بنزين العربية مش تمشي وضعيفة جدا لغاية ما أدوس لآخر الدواسة وفجأة العربية تسحب
بطلتها ودورتها بتدور عادي من غير ما تغيب المهم كان المؤشر بيقوللي إن لسه في التانك 10 لتر
دخلت بنزينة امون
نزلت من العربية لقيت الشكمان بيتفتف كأن العربية متلتة حطيت مظف إنجكشن وفولت العربية للآخر أخدت 36 لتر
وعلى بال ما الراجل خلص تموين كان العربية ظبطت
ومشيت وهي كويسة
روحت قلت أنظف البوابة
فكيت خرطوم الهوا من البوابة ونظفتها ببنزين في البلاور والعربية بطالة
وبعدين مليت البوابة بنزين ورحت مدور وبعدين رشيت اسبراي
العربية صوتها مضبوط بس لسا ما خرجتش بيها
دلوقتي أنا شاكك إن حساس الكامة بيهيس ( حد عنده فكرة؟؟؟؟؟)
الشكمان مش بشم منه اي روايح
بشك إن فيه تسريب في دورة البنزين ( ممكن حد يقول لي أتأكد إزاي بالتفصيل الممل)
الاهم من ده إني في يوم كنت في الاسكندرية ( رحت وجيت في نفس اليوم 270 كم رايح وزيهم جاي) وأنا راجع دخلت بنزينة وطنية امون مالقيتش فيها غير بنزين 80 مونت منه لقيته مش فرق في أداء العربية خالص بس استهلاكه أقل من بنزين 92
كشفت على العربية كومبيوتر قاللي مفيش أعطال متسجلة
حد عنده أي اقتراحات ( غير إني أبيع العربية)
مستني ردودكم