ما حدث معى فى بريليناس كروس ٢٠٠٩ !!!
السلام عليكم اخوانى .. انا أسمى احمد من الغردقه ..انا كان نفسى أجيب عربيه من زمان بس اللى كان معطلنى مش الفلوس انى انا مش بفهم فى العربيات اوى والميكانيكا . المهم قولت اخد قرار وأجيب عربيه واعيش التجربه .. بالفعل قمت بشراء بريليناس كروس ٢٠٠٩ مستعمله . قولت أتعلم فيها وشكل العربيه جميل وشبابى والموتور ميتسوبيشى . المهم اتكلت على الله وجبتها من ٥ ايام . ال ٥ ايام عدوا عليا لحد دلوقتى ٥ سنين ... العربيه كل ما اصلح حاجه الاقى حاجه ..كانت العربيه فيها جنوط ١٧ روحت مغير عشان الميكانيكى قالى دا حيبوظ العفشه روحت مغير جبت ٤ فرد جنوط و٤ كوتشات جداد .دى اول دبحه . عملت الصيانة الطبيعية من تغير سيور والكلام دا وطنابير العفشه والدنيا تمام مشيت بيها بسمع خبط فى العربيه من قدام قلت فى ايه تانى !! روحت كشفت على العربيه قالك مساعدين جيب مساعدين ياحمد وركب .. قولت بقى يلا أولع التكييف ياحمد واعيش اللحظه هبا حراره العربيه رفعت روح ياحمد للميكانيكى . فى أيه يعم الميكانيكى قالى ثوانى اشيك شيك يابا وعيش وعد ياعداد قالى تمام نجيب مياه جديده ونظبط ماشى ياحاج يلا بينا . قلت بقى العربيه هاتشباك يابوحميد اجرى بيها واوعى القطر لاقيت رقص راب وهاوس فى الدر يكسون .. أجرى ياحمد اظبط زوايا لا خليها بكره روحت اظبط وهبا فى ايه الفرده الجديده اللى بكيسها اتخرمت . احيه بقى !!! روح الحم وتعالى ماشى اظبط زوايا تمام تمام العربيه من ٨٠ ل ١٠٠ احساس غريب رعشه وهززه فى الدريكسون . ارجع تانى معلش أأكد على الزوايا . ايه الصوت دا !!! صوت تزييق فى المساعدين الجداد ؟! طيب انا اروح فين دلوقتى !! روح ياحمد فول بنزين الاول وبعدين ربك يحلها فولت ومشيت ركنت أشرب قهوه عشان كنت فاصل والاقى بنزين يبنقط .. روح اعمل الحوار دا مهم روحت الميكانيكى قالى مفيش حاجه كله فى الكلتش . روحت بقى عملت ايه ركنت العربيه ورجعت البيت وقلت خره عليك ياحمد انت والعربيات ...
هو انا ماشى غلط ولا عشان دى اول مره ولا المستعمل كدا ولا ايه !!
انا صارف ٦٣٠٠ لحد دلوقتى وفى حابه حاجات تانيه .
انا الميكانيكيه لو على الحال دا حيبنوا الدور التالت وكمان حمام سباحه منى ...
انا عايز نصايح بالله عليكم !!! أبدا ازاى اعمل ايه انا جبت العربيه وكرهتها ركنها قدام البيت ....
أتمنى ما تبخلوا عليا وجعل الله هذا فى ميزان حسناتكم .
انا حاسس انى بشحت :d
