المساعدة فى تسعير ماتريكس 2006 توب لاين خليجى

السلام عليكم اعضاء المنتدى الكرام
الرجاء المساعدة من الخبرا فى تسعير ماتريكس 2006 كورى اتوماتيك عاملة 160000 كيلو متر بتاعة صديق لى وعايز اشتريها هى فابريقة كلها وسقف وكبوت وشنطة ورشة جانبين فيها فتحة سقف ومخدع امامى وخلفى ومساحة خلفية وفول سبويلر اصلى بتاعها ولسه صاحبى ده مركب عفشة جديدة اصلى اربع مساعدين kyb يابانى ومقصات جديدة بصراحة عفشتها تحفة وبطاريتها لسه جديدة بقالها شهر بالضمان
ومغير بوجيهات بلاتنيوم وتكييف تلاجة باختصار العربية مفيهاش حاجة لاصل هو زميلى فى البنك وجارى كمان وبنروح ونيجى مع بعض وبقالها معاه 3 سنين يعنى من الاخر العربية معرف وهو حايجيب خلاص الاتراج الجديدة وعايز يبيعها بس علشان احنا صحاب وزمايل الموضوع محرج هو قالى شوف على النت اسعارها كام ومش حانختلف بس فوجئت باللى طال 97000 و93000 واقل واحد 89000 والله اعلم بالحالة بس دى انا عارفها وسوقتها بنفسى تحفة بصراحة ومحتاجة بس تغير قاعدة الموتور علشان فى رعشة فى العربية لما بيشغل التكييف وهو غير القاعدة الكبيرة من سنة وانا معاه تقريبا بقية القواعد عايزة تتغير وقالى انها رخيصة واعملهالك المهم علشان ماطولش عليكما انا شايف ان سعر النت ده مبالغ جداااا انا قلت له 89000 فهل فى رايكوا السعر ده كويس ولا غالى مع العلم انى لسه ما نفذتش علشان هو طالع يصيف بيها فى السخنة وقال نكلم بعد ما نرجع
يا ريت المساعدة من خبراء المنتدى الكرام ولكم جزيل الشكر

]ولا رد واحد فين رجالة المنتدى الكرام ؟؟ افصلوا بينا يا قوم بما يرضى الله رايكوا مهم بالنسبة لى انا مش مستريح لاسعار النت دى شايفها مبالغ فيها جدااااا ومش عايز اظلم صاحبى بردوا ايه رايكوا يا رجالة سعرها العادل كام ؟؟

وعليكم السلام ورحمة الله وبركاته
المشكله ان تقييم السعر دلوقتى بقى حاجه صعبه جدا و التقييم ده امانه و مسئوليه علشان لا نظلم البائع و نقول سعر اقل من قيمه السوق و نخسره لو وافق عليه ولا نظلم المشترى و نقول سعر اعلى من سعرها
انا مش مقتنع بأن السعر يتراوح من 89 لـ 97 الف
العربيه موديل 2006 و ماشيه 160 الف لو انا اللى بشترى مش هدفع اكتر من 82 لـ 85 الف رغم انى شايف انه كتير عليها جدا (فيه عربيه معروضه على كونتاكت بـ 77 لو تقدر تكلمه و تشوف العربيه و تقارن بين الـ 2)
ممكن تشوف معرض و تسأل كأنك عايز تبيعها و صاحب العربيه يكون معاك طبعا و شوف سعر المعرض كام و شوف رأى صاحب العربيه ايه فالسعر لو وافق يبقى ادفع نفس السعر لو لأ شوف هو عايز كام و حاول توصل معاه لسعر مناسب

من 73 : 78 متعديش كده

شكرا لكل اللى ردعليا وانا فعلا اتصلت بالاخ اللى عارض ب 77 الف وقالى معلش اتباعت مالحقتش اشوفها وفعلا اليومين دول ما حدش يعرف يحدد اسعار حاجة الاسعار نارررر الماتريكس 2010 و2011 بيطلبوا 115 و110 دى كانت زيرو ب 104 الف دى حاجة تجنن ولا اسعار الالنترا كمان بصراحة اسعار كونتاكت خيال علمى
بس انا سالت صاحبى صاحب معرض قالى لسه مخلصين فى ماتركس زى دى ب85000 الف من شهر وحالة اقل من دى لما وصفت له حالتها كل اللى مسخنى على الموضوع ان العربية انا عارفاها وعارف صاحبها تقريبا بنصلحها مع بعض (ما هو جارى بقى :) وده اللى مطمنى. واللى فهمته انه مش حايبيعها اقل من 87000 الف وهو فعلا جاله قدامى 85000 وما رضيش يبيعها .... يعنى معنى كده انى اكبر دماغى لانكوا بتقولوا ان كده غالى عليها ؟؟؟ وفى الاخر ربنا يحسن له سوقها هى العربية حلوة ودلع بصراحة وانا باتمناله كل خير بس بعد كلامكوا ده انا فعلا اترددت اكتر ولو حد قدامه واحدة بالسعر ده من 75 الى 80 يا ريت يقولى عليها بنفس المواصفات ولا اخلص على 85 فى دى وخلاص ؟؟؟؟؟؟؟؟؟؟؟

العربية تستاهل 89000 فعلا اخويا لسة بايع عربيته الماتريكس الأسبوع اللي فات موديل 2008 بتاعة غبور العادية اللي مفهاش سبويلر و لا مساحة خلفية و لا مخدع فابريقة برا و جوة بس ماشية حوالي 250000 اشتراها منه تاجر ب 84000. بس عربية صاحبك دي المفروض ان فيها فرامل ABS و فيها Airbag.

اقتباس:

---

المشاركة الأصلية كتبت بواسطة shiko85

وعليكم السلام ورحمة الله وبركاته
المشكله ان تقييم السعر دلوقتى بقى حاجه صعبه جدا و التقييم ده امانه و مسئوليه علشان لا نظلم البائع و نقول سعر اقل من قيمه السوق و نخسره لو وافق عليه ولا نظلم المشترى و نقول سعر اعلى من سعرها
انا مش مقتنع بأن السعر يتراوح من 89 لـ 97 الف
العربيه موديل 2006 و ماشيه 160 الف لو انا اللى بشترى مش هدفع اكتر من 82 لـ 85 الف رغم انى شايف انه كتير عليها جدا (فيه عربيه معروضه على كونتاكت بـ 77 لو تقدر تكلمه و تشوف العربيه و تقارن بين الـ 2)
ممكن تشوف معرض و تسأل كأنك عايز تبيعها و صاحب العربيه يكون معاك طبعا و شوف سعر المعرض كام و شوف رأى صاحب العربيه ايه فالسعر لو وافق يبقى ادفع نفس السعر لو لأ شوف هو عايز كام و حاول توصل معاه لسعر مناسب

---

شكرا اخى العزيز هى فعلا الاسعار مجنونة حبتين اليومين دول مش فى الماتريكس بس !!!!
يعنى راي حضرتك اخدها ب 85 على الاقل انا ضامنها ولو اغلى من سعرها الفين او تلالتة مش مشكلة العربية فعلا مش محتاجة صيانة جامدة عفشتها جديدة وبطارية جديدة وصالون ممتاز وشوية خرابيش من بره وخلاص ... اتكل على الله واشتريها ؟؟

طبعا عربيه بالسعر ده مش هتستنى
ربنا يبارك للى اشتراها و تكون خير له
لو مش لازم ماتريكس شوف اوبترا لان اسعارها معقوله جدا

اقتباس:

---

المشاركة الأصلية كتبت بواسطة madmode

شكرا اخى العزيز هى فعلا الاسعار مجنونة حبتين اليومين دول مش فى الماتريكس بس !!!!
الأسعار كلها مبالغ فيها و كل واحد عايز يعرض عربيته للبيع بيشوف باقى الأعلانات مطلوب كام و يقارن حاله عربيته بباقى العربيات و يزود السعر و هكذا و تقريبا العربيات موضه يعنى كل فتره الطلب بيزيد على موديل معين و سعره يزيد جدا
يعنى راي حضرتك اخدها ب 85 على الاقل انا ضامنها ولو اغلى من سعرها الفين او تلالتة مش مشكلة العربية فعلا مش محتاجة صيانة جامدة عفشتها جديدة وبطارية جديدة وصالون ممتاز وشوية خرابيش من بره وخلاص ... اتكل على الله واشتريها ؟؟
طبعا هى ميزه ان العربيه من حد معرفه و مضمون و كمان حضرتك عارف العربيه كويس و فظل النصب و الغش و انعدام الضمير يبقى توكل على الله و اشتريها خصوصا ان حضرتك بتقول ان ده هو سعرها فالسوق دلوقتى و ان صاحب معرض بيقول كده و حتى لو سعرها زياده 2 او 3 هيكون فمقابل الأمان و الراحه و البعد عن النصب و الغش

---