مشروع مضمون للشباب اللي مش لاقي شغل
المشروع ينفع لجميع الاعمار
راس المال المطلوب من 30 الي 70 الف جنيه حسب الامكانية
....
المشروع ببساطة عربية سوزوكي 8 راكب
http://i429.photobucket.com/albums/q...ps9f60ef07.jpg
وتشتغل عليها بنفسك دورات مدارس
الطفل من 100 الي 200 في الشهر حسب المشوار والمدرسة ( دي اسعار السنة اللي فاتت قبل زيادة البنزين )
والعربية ح تاخد 10 اطفال تقريبا وممكن تعمل دورتين
يعني الدخل ح يبقي 2000 جنيه تقريبا علي اقل تقدير ( بحساب الطفل 100 فقط وعدد الاطفال 10 فقط ودورتين فقط )
بينما الواقع ان عدد الاطفال ح يكون اكتر وسعر الطفل مش ح يقل عن 150 جنيه
المصروفات بنزين وصيانة ... والعربية لو زيرو يبقي عندك 3 سنوات بدون مشاكل صيانة
الضرائب .... زيرو .. لان العربية ملاكي
مدة العمل ساعتين الصبح وساعتين الظهر 5 ايام في الاسبوع
دخل اضافي غير الدخل الثابت ( فترة الدراسة 9 شهور تقريبا )
كروت وتتوزع علي اولياء الامور والاصدقاء والجيران
توصيل لدروس او كورسات
مشاوير خاصة
سفريات او توصيلات مطار وخلافه
انت ورزقك وشطارتك
مين عارف .... مش يمكن بعد كام سنة يبقي عندك شركة نقل
....
اللي عاوز يشتغل لازم يسعى .... يعني ممكن تستلف تمن العربية من والدك او اخوك ... او تبيع دهب مراتك مقابل انك تشتغل ( طبعا الكلام للناس اللي سابت شغلها او لسة مش لاقية شغل )
ممكن تجيب العربية كاش ح تعمل 70 الف بالجنوط بالتكييف
وممكن تدفع مقدم وتقسط ... انت ومقدرتك
وطبعا فيه عربيات صيني ارخص لكن السوزوكي هي الستاندرد في الفئة دي
ولو انت بتحب العربيات والسواقة يبقي ح تشتغل في حاجة بتحبها
....
وصية لمن يريد عمل هذا المشروع .... اتق الله وحافظ علي الاطفال وخلي بالك منهم كأنهم اولادك
كدة ربنا ح يكرمك ... وعلي فكرة الاهالي بيشعرو بالنقطة دي جدا حتي لو مش بيظهرو كدة
...
بس انا ليا شير ف المشروع
تفتكرني بدعوة صالحة بظهر الغيب