الموضوع: استفسار عن قطع غيار

فى التوفيقيه فيه واحد مشهور اوى بتاع فولكس وعنده كل حاجه ممكن تتخيلها للبولو بس اهم حاجه فاصل معاه
انا مش فاكر اسمه بس اللى اقدر اقولهولك انه قبطى والمحل بتاعه بتنزله بسلم وهو اشهر واحد بتاع فولكس
سير الكاتينه يوم لما يتنطط هيعمله حوالى 120 جنيه وسير الدينامو انا كنت شاريه ب 80 جنيه انضف نوع
وفلتر الزيت انا كنت شاريه من عنده باين ب 55 جنيه وفلتر بنزين ب 60 وفلتر الهوا ب50 جنيه بس مش عارف اصلى ولا مش اصلى
ممكن بلية سير كاتينه تدخلها فى 350 جنيه والله اعلم
بس هتلاقى واحد فى رمسيس بتاع بلى انت خد البلية بتاعتك واطلع عليه وقوله عايز بلية زى دى وما تقولوش نوعها ايه علشان لو عرف انها فلوكس هيعلى السعر عليك اوى لو سألك وتنح قوله مش عارف انا الميكانيكى صاحبى وقالى لو نازل رمسيس هاتلى بلية زى دى
عامة انا كنت شاريها من عنده باين ب 70 جنيه
واسف انى ماعرفش اسماء المحلات اصلى مش باخد بالى من الاسماء ولو عوزت اى حاجه فى بولو قولى
لانها كانت معايا واتخيط بما فيه الكفايه لحد لما اتعلمت
ولو عربيتك انجيكشن هات البوجيهات ان جى كيه واوعى تجيبها العاديه ام 45 جنيه دى
وسلك بوجيه كنت شاريه ب 165 جنيه وهو بيقولى اصلى بس كان نوع نضيف الصراحه
واى حاجه عايزها انا تحت امرك

متشكر جدا" ليكم يا جماعه على التعاون ده
انا كنت سمعت عن واحد اسمه فتح الباب فى رمسيس و ناس تانيه فى شارع دمشق ايه رأيكم فيهم دول بردوا ؟
و فين الراجل بتاع البلى ده فى رمسيس اصل رمسيس كبيره
البوجيهات ان جى كيه بكام ؟
و هل السيور و الفلاتر دى ليهم ماركات معينة ولا أى حاجه يديهالى و خلاص.
اخد معايا الحاجات اللى هاشترى زيها و انا رايح اشترى ولا هاقوله على الموديل و السنه و خلاص ؟ لان سير التجميعه عندى داخل فيها الدينامو و كمبروسور التكييف.
و بعدين يا عم مصطفى ما انا لما باساك بتقولى كانى و مانى ولا انت نسيت موضوع الرادياتير :)

والله ساعتها كنت مخنوق ومش طايق نفسى وانا بعتذرلك وادينى بعوضهالك هنا اهو :d
واحسن حاجه تاخد القطعه اللى عندك وتجيب زيها لانى لبست فى مره فى فلتر بنزين مش زى اللى عندى وروحتله تانى وغيرته
ولو نزلت رمسيس وسألت فين بتاع البلى اى حد هيقولك عليه وانا والله مش باخد بالى من اساميهم وكمان ماعرفش اسماء الشوارع بتاعت رمسيس دى
والبوجيهات ان جى كى هتعملها فى حدود 90 جنيه
وموضوع السيور والماركه انا مش هقدر افيدك انا باخدهم وبمشى بس الصراحه كانوا كويسين اوى
وانا معاك فى اى حاجه

يا عم مصطفى انت حبيبى و الموضوع مش محتاج اعتذار احنا اخوات بس اصل انا الصراحه ساعتها حسيت ان مفيش حد بيستحمل التانى حتى لو التانى ده مش فاهم فى الموضوع كويس و محتاج ياخد مشورة الناس و انت عارف الميكانيكيه و الصنايعيه لو شافوك مش فاهم فى حاجه هياكلوك.
و ان شاء الله هانزل اجيب الحاجات دى و كنت عاوز اعرف تركيبهم يبقى تقريبا" بكام لو تقدر تفيدنى
و كنت عاوز اجيب كمان الجزء الفيبر اللى بيركب ورا فى الشنطة لانه معوج عندى و اجيب طاسات العجل بتاعة فولكس.