السلام عليكم ورحمة الله وبركاته
النهاردة كنت ماشى فى شارع صلاح سالم و باخد يو تيرن لقيت العربية فيها هزة يمين و شمال
ملحوظة جدا و الدركسيون فيه عضة يمين
و العربية ماشية ترقص زى مايكون العجل مفكوك
وقفت على جمب انزل اشوف فى ايه
و اهز فى كل عجلة يمكن تكون مفكوكة او مهوية
كله تمام مافيش مشكلة
روحت مكلم الميكانيكى بتاعى قالى تعالى نشوف
روحتله و قالى اكسر العجل يمين
كسرته و حد ايده على الكاوتش قالى الكاوتش فيه عالى و واطى و لازم يتغير
قولتله انا كنت شاكك فى الكاوتش برضو
مع العلم ان العربية نازلة بكاوتش هانكوك اوبتيمو
مقاس 14\70\175

المهم قولت اطلع على سمير بيومى بما انه الاقرب و الارخص
روحتله على اساس انى اركب الكومهو اكستا لانى كنت سأل عنده من حوالى اسبوعين و كانت موجودة و كان سعرها 400 جنيه
روحت و للاسف كانت خلصت
و قالى على اسعار فرد كتير
من 350 لـ 590 بس مقاس 14\65\185
من كومهو و هانوكوك و جى تى و ماكسس و نكسن و بردجستون
كان افضلهم طبعا البردجستون تورانزا gr 90 سوبر سايلنت
و سعرها 590 جنيه شامل التركيب و الترصيص و النايتروجين
قولت توكل على الله و ركب اهى احسن من الاكستا بس غالية حبتين
الكاوتش عندى كان رايح فى داهية و فيه فردتين فيهم عالى و واطى
بس كتر خيره مشيت عليه 51000 كيلو

اسيبكم مع الصور
ـــــــــــــــــــــــــ ــــــــــــــــــــــ


















طبعا فرق السما و الارض بين التورانزا و الهانكوك
صوت الهانكوك كان عالى خصوصا لو على اسفلت خشن و دة اللى ضايقنى منها
و كانت ناشفة بس كويسة فى الفرامل
نيجى بقى للتورانزا انا مش اول مرة اجربها لانى ركبتها قبل كدة فى الالنترا
الاتزان بقى احسن
الفردة صوتها واطى جدا حتى على الاسفلت الخشن و النقر و المطبات
الفرامل بقت تكلبش اقوى
لانى كنت بجرى على كورنيش العجوزة عشان اجرب الفرامل و حظى كان الكورنيش فاضى
فعلا التورانزا تستاهل كل قرش اتدفع فيها و مش غالية من فراغ
و ربنا يستر طريقنا جميعا