الموضوع: الاعيب معارض السيارات والوكلاء - خلي بالك

السلام عليكم ورحمة الله
انا عضو قديم معاكم هنا بس انا عملت العضوية ديه مخصوص للموضوع ده برجاء من الادارة تقبل الامر منعاً للاحراج
انا شغال من سنة ونص في توكيل سيارات وبصراحة شوفت العجب سرقة ونصب وخداع وغش وقرف ولاني مش بحب القرف ده وما بحبش القرش الحرام فاصبحت مكروه جداً من زملاء العمل بس الرزق على الله
يمكن انا مش ملتزم دينياً بشكل كبير بس اكبر التزام عندي هو اني ما اقبلش فلوس حرام ولا اسكت على غلط وده للاسف واضح انه ما بيعجبش الزملاء ولا حتى اصحاب العمل تصور انك في الشغل تقول لرؤسائك فلان حرامي وفلان بيعمل وبينصب وتلاقي انك في الاخر المتضرر من المشاكل ديه وتفضل زي المغفل الى قاعد على جنب وعمره ما بيكبر في الشغل ..المهم ربنا يبارك في الحلال
ادعولي ربنا يوفقنى وما احتجش مليم منهم ولا اكون زيهم
طيب انا عامل الموضوع ده ليه ؟؟
عامله عشان احاول افضح كل الكلام الى بيحصل في التوكيلات والمعارض واخليكوا تستفادوا وتخلوا بالكم وانتوا بتشتروا وانتوا بتتعاملوا مع اي معرض سيارات او تاجر الموضوع عام وما فيهوش اي تشهير بماركة او تاجر او شخص
والمقابل لكده : الاجر من الله ...ودعوات حضراتكم بالنجاح والتوفيق
بسم الله
نبدأ منين من البائع الى بيقابلك في المعرض ( النصاب الكبير ) الا من رحم ربي
البياع مش هيديلك العربية الكويسة ولو انت في معرض عربيات لازم تعرف ان البياع بيوجهك للعربية ذات العمولة العالية ليه --- ومصلحته اولاً واخيراً
انت عارف ان البائع ما بياخدش نفس العمولة على كل العربيات بعض الماركات بتحاول تحفز البائع حتى في المعارض الاخرى وبتديله فوق عمولة المعرض الى شغال فيه عمولة تانية بتطلع من التوكيل نفسه بتبقى من 500 وبتوصل ل 3000 واكتر حسب اسعار العربية وللعلم التوكيل عندنا بيعمل كده بس غيرنا بيدفع اكتر وبعض المعارض بتضرب عمولة البائع في جيبها اكنها من ضمن مكسب المعرض في العربية
ياعنى من الاخر لما تروح معرض اقف مع البائع وخليه يشرحلك بس ما يقولكش تشتري ايه ابداً ... افتكر انه مصلحته بتبقى في العربيات الاعلى في العمولة بغض النظر عن الجودة وكمان دائماً العمولة الاعلى بتبقى في العربيات الغير رائجة الى بتبقى محتاجة شغل عشان تلبسها للزبون
- ما تخليش البائع يعملك اي خدمة خارج العربية بلاش تامين وبلاش قسط بنك تبع البائع وده هيتشرح ويطول شرحه شوية بعدين ...البائع معاك يعرفك العربية وتقوله تمام ووفرلي اللون والاستلام امتى وخلاص وحدد مواعيد ثابته معاه وحاول تقلل دوره خصوصاً انك كل ما هو قادم وبيتدخل فيه البائع بيعتبر (( سبوبة كبيرة )) وهنشرح في كل جزئية بالتفصيل
ياعنى البائع مش شخص بيدور على مصلحتك ومش هيفيدك في اي حاجة غير انه هيحاول يطلع منك شوية مصالح ايوة انت في الموضوع ده هتشوف المصالح الى بتتطلع من ((الزبون ))
ابحث عن عربيتك على النت واقرا واسال مجرب وحاول توصل لافضل سعر في المعارض المختلفة وسيبك من فكرة انك تروح لبائع او معرض وتسلمه دقنك ويوديك ويجيبك
البائع لو باعلك عربية معيوبة مصلحة ليه هيبقى عند الشركة مميز وصايع ومش بيعيد يترقى ((اه والله )) وبياخد عمولة اكبر على العربيات الي فيها مشاكل والمشاكل بتبقى كتييييير بتوصل ان العربية بتبقى فيها مشاكل في الفتيس والبطارية متغيره وراشه وبلاوى كتير هنشرحها واحدة واحدة

اهم حاجة وانت بتستلم بلاش تعمل فيها البيه الواثق من نفسه والنزهي ديه فلوسك ولو استلمت العربية انسى انك تعرف تعمل حاجة فيها وابقى قوم اطمن على فلوسك (( لو غاوي بقى حماية المستهلك ووجع القلب ..حب اقولك كان غيرك اشطر ووسط ملايين بيتغشوا واحد او اتنين بياخدوا حقهم )

اسيبكم بقى لاني مش عارف اكتب اكتر من كده النور بيجي 5 دقايق ويقطع 4 ساعات انهارده
للحديث بقية

ربنا يباركلك عن النصيحه
وبكده محدش يشترى عربيات ونروح نعمل واحده عموله على ايدينا افضل :-)
الواحد مش عارف يعمل ايه فى البلد وفى الناس عليه العوض