معلش يا بيه اصلك محبكها شوية ؟!

**mk3** · 04-09-2014 10:37 PM

-اما ترش عتب عربيتك وتلاقيه مش ميه واحده ( مش مستوى ) !
-اما تعمل باب حديد وتلاقى لحاماته عايزه تتسحق وشكلها وحش !
-اما تعمل جبس فى شقتك وتلاقيه مصفر !
اما تركب يافطه وتلاقيها مايله 3 سم !
اما تنظف بطانيه وترجعلك زى ما هى !
اما تروح لميكانيكى وانت راجع تلاقى العربية عايز يتقرط على صواميلها !
اما يحاول نقاش يقنعك ان محاره الحيطه عندك بايظه !
اما يحاول مبيض محاره يقنعك ان طوب الحيطه نفسه بايظ !
اما نجار يفحتلك باب شقه وعايز ياخد 50 جنيه !
اما تشترى عربيه وواحد جارك يحط عليها كبايه الشاى !
اما الفهلوة تكون هى سيده الموقف وميعرفش الفهلوى يسلك معاك لانك فاهم !
اما تروح لميكانيكى وتكون فاهم اللى فى عربيتك وهو يعملك فيلم !

هل انا محبكها هل انا شكاك ؟ مشكلة قله الضمير معاكم ؟

**mo3tazanas** · 04-09-2014 10:45 PM

نفس معاناتى

**M!SHO** · 04-09-2014 11:07 PM

صنايعي البورسلين وهو شغال براجع وراه

كان خلص رسيبشن بتاع ٤٠ متر كده ، وبدون مبالغه فيه اكتر من ٣٠ بلاطه مطرقعه

المشكله اني لما اتكلمت معاه وزعقتله يرد عليا ويقولي ايه المشكله لما البلاطه تكون مطرقعه ، هتضايقك في ايه :@

فعلاً اوسخ فئه في المجتمع ، اغلبهم ان مكانش كلهم :(

**mmtronic** · 04-09-2014 11:34 PM

نفس الكابوس الى انا عايشه

الكارثه ان معظم الناس بقت من الفئات القذرة دى .....ناااااادرا لما تلاقى حد محترم و بيخاف ربنا ...

بصراحه مش عارف اخرتها ايه المعاناة الى انا و حضرتك عايشينها دى ؟!

**almohaor** · 04-09-2014 11:44 PM

انها ازمة الضمير وانعدام الاتقان والاخلاق

وهو ده اسلوب الفهلوة المصرى اللى بقى ماشى ومنتشر
بين الحرفيين والمهنيين الا من رحم ربى وكله على حساب الزبون
وان معظمهم يمتهن حرفته بالعافية دون تدريب ا و معرفة اصول المهنة او الصنعه

حتى الاهمال وصل للاطباء ايضا
وزمان كان الطبيب لايتقاضى اجره الا بعد شفاء المريض

وتناسوا ان الله يحب اذا عملا احدكم عملا ان يتقنه

**Bassem Youssef** · 05-09-2014 12:07 AM

صنايعيه عايزه الحرق و ياريت بيبطلو طمع و جشع

**بحار** · 05-09-2014 12:58 AM

اللى مايعرفش القرايه والكتابة صح .. بيشبه على الكلمه احيانا بتيجى صح وغالبا خطأ ويضحك الناس على طريقة قرايته لكلمه معينه شافها على لافتة مثلا .
الصنايعى الخايب كده بيكمل جهلة بصنعته بشوية فهلوة ورغى كتير مالوش دعوة بالموضوع .. ولو لقاك ملتزم وبتصلى مثلا ..
تكلمه عن حاجه مش مضبوطه فى شغلة ... يكلمك عن اسعار الحج السنه دى اللى غليت وجوز اخته مش عارف يحج ..
كهربائى ومش متعلم وصنايعى فاشل .. تسألة عن الفولت والامبير ... يقوللك حر جدا دى عدت 35 درجه النهاردة !!!

**islam_lee** · 05-09-2014 02:32 AM

ياه يا باشا .. كده أنته محبكها ,,

لما زميلك في المستشفى يموت لأن مافيش سرير ,,
لما سعر الجاز بيغلى مش على الغني لاء على الفقير ,,
لما الظلم في كل حته و المظلوم مالوش نصير ,,
لما تدخل معهد كبد و تخرج بثقب نتاج تنظير ,,

كده أنته مش محبكها شويه .. كده أنته محبكها كتيير ,,

**lena jo** · 06-09-2014 12:59 PM

حضرتك صح و كلهم غلط. العامل المصري زمان كان شاطر و مطلوب في الدول العربية . الان مفيش حد كويس الا القليل جدا و اصبح غير مطلوب في الخارج لسوء صنعته و زي ما بيقولوا اكل و مرعي و قلة صنعة. و للاسف اي حاجة عايزة تصليح رميها ارخص لان محدش بيفهم في حاجة و الحرفيين كل همهم ياخدوا كام و في الاخر بيعكوا . مفيش حاجة اسمها محبكها. كل واحد بيشتعل لازم يتقن شغله. الهنود و الصينيين غلبونا و العامل منهم بيشتغل اكثر و بياخذ اقل و مش لكعي زي المصري. اللي بجد بيضايقني ان لما تتعامل مع الناس دي لازم تفاصل و بيحسبك حسب المنطقة او العربية او مظهرك كان المفروض اللي ساكن في منطقة راقية مكتوب عليه يتسرق علني او لاقي فلوسه في الشارع و من حق الصنايعي ينهبه. نفسي الاقي سعر محدد واحد و كلمة واحدة مع الكل. البلد دي حالها عمره ما هيتصلح لو حتي ولوا عليها احسن حاكم في العالم طول ما الشعب كدة