السيراتو والغردقة رايح جاى
انا عندى ولله الحمد سيراتو خليجى اوتو 2011 ومقيم بالقرب من الزقازيق بمحافظة الشرقية
وكنت حاجز مصيف فى فندق لونج بيتش بسهل حشيش بالغردقة
وسهل حشيش لمن لا يعرف يقع على طريق سفاجا والدخول لهذا الطريق قبل الغردقة بحوالى 20 كيلو تقريبا
المهم جهزنا حاجتنا وحطينا الشنط وركب معايا مراتى واخواتها الاتنين وبنتى الصغيرة
وكان معايا نسيبى وعربيته اوكتافيا فانتازيا ومشينا السبت الساعه 6 صباحا
ومشيت فى الذهاب طريق الزقازيق ثم بلبيس ثم طريق القاهرة الصحراوى ثم العبور ثم محور الفريق الشاذلى ثم الطريق الدائرى ثم طريق القطامية ثم طريق العين السخنه ثم طريق الزعفرانه - رأس غارب ثم طريق الغردقة ونسيبى هو الى مشانا من الطريق ده ومكنتش عاوز امشى عليه بسبب ان الدائرى رصفه وحش وزحمة وكذلك الحال بالنسبة للطريق داخل مدينه العبور
وفى العودة مشيته من الطريق الدائرى الاقليمى وهو بصراحة طريق رائع جداااوفاضى ورصفه ممتاز لدرجة انى كنت ماشى على سرعه 150 وكانت مراتى فاكرة انى ماشى على سرعه 70 ..... فى الرجوع رجعنا من طريق الغردقة ثم طريق رأس غارب - الزعفرانه ثم طريق العين السخنه ثم الطريق الدائرى الاقليمى ثم العاشر من رمضان ثم بلبيس ثم الزقازيق
نيجى بقى للعربية ......
التكييف ما شاء الله عليه ممتاز
السحب كنت سايق على المانيوال مش اوتو والعربية كانت بتسحب معايا ووصلت لسرعه 170 لثوانى بس ومعظم الطريق كنت سايق مابين 130 إلى 150 واحيانا 160 بس كان قليل لحد ما وصلت طريق العاشر من رمضان وطبعا نزلت سرعتى بسبب المطبات والرصف التعبان وطبعا طريق السخنه كنت مهدى جامد لان الطريق رايح جاى وكله منحنبات خطرة
الثبات وده اهم حاجة فى الموضوع ... من الاخر العربية دى علشان تحس انك مسيطر عليها متزودش عن 120 اما بعد كده فتمسك فى الدريكسيون بايديك ورجليك وسنانك ههههههههه .... بصراحة لما كنت بزود عن 120 كنت بحس ان الهوا وخصوصا على طريق الغردقة انه بيطوح العربية شوية وكنت بسيطر عليها تانى
انا عارف ان السرعه غلط بس كنت مضطر علشان الطريق طويل جدا لانى بالسرعات دى ووصلت فى حوالى ست ساعات ونص تقريبا
ربنا يسلم طريقنا جميعا
