اصل دا حسب الموقف و طالما مش عندك esp الدنيا بتكون صعبه جدا وربك الستار
عرض للطباعة
اصل دا حسب الموقف و طالما مش عندك esp الدنيا بتكون صعبه جدا وربك الستار
أما العربية تعوم تمسك الدريكسيون بإيديك الإتنين وتعدلها براحة من غير ماتكسر بطريقة عنيفة وتفضل معاها يمين شمال لحد أما العربية تتزبط في طريقها
لو العربية abs خليك ماسك فرامل مفيش مشكلة
لكن لو مش abs حقولك سيب الفرامل وأزبط العربية وده مستحيل لإن ساعة الخضة الواحد بيكبس فرامل لاإراديا والصراحة أنا مستغرب جدا جدا من إللي بيشتري عربية في الزمن ده من غير abs ده بجد بيلعلب بعداد عمره في كل مرة بينزل بالعربية مشوار ، تخيل بيبقى مسموحلك ياإما تفرمل من غيرمناوارة ياإما مناورة من غير فرامل !!!
اها فهمت لو عومت منك على السرعة دى يبقى لابد انك تمور العربية وترفع رجلك من على البنزين واحذر الفرامل وموت على الدريكسيون الى ان تهداء قليلا غمز ليها بالفرامل على خفيف الى ان تتوقف بلاش تكبس فرامل ولاتكبس بنزين وربنا يستر طريقك وبلاش غرز وشغل الترزية الله يرضى عنك**
حمد الله على سلامتك الاول
ومفروض كل واحد عارف ثبات عربيته مش هقولك تهور او اي حاجه كلنا بنجري طبعا
بس انا مثلا معايا سيفيك 94 ممكن اخد غرز اكثر من كدا بس تهبيط العربيه وثباتها عارف والملفات برضه مفروض من خبرتك عارف انت راكب ايه
ومره برضه فيكترا مو 2000 -- 2000 سيسي كان بيجري معايا دخلنا ملف انا 170 هوه دخل 190 واتقلب وهوه عنده abs
مش شرط رئيسي abs اعرف ثبات عربيتك الاول وامشي في حدودها
واعرف عفشتك بالكامل عامله ايه دي اسباب
وساعت التعويمه لو حصلت لاني شوفت عربيات ثابته كثير من التهور بتعوم
اياك والفراااااااااااااااااااا ااااااامل علشان انا عومت مني على ملف 90 مره وكان بسبب ميه والاسفلت متغرق ولمتها بستر ربنا مش هقولك خبره بس اغلب حوادث التعويم بسبب الفرامل وربنا يكفينا جميعا
شكرا يا رجالة على الردووووود الجميلة دى ..
وافهم من كدة مدسش فرامل ولا بنزين خالص عند التعويم صح ^
القاعدة رقم 1 و 2 و 3 و 10 ، ما تدوس فرامل ، حتى لو عندك abs ! ما تدوسش فرامل طالما العربية ضهرها بيلعب ، خلى عندك ثبات انفعالى واتعود تتحكم في دوستك اللا ارادية ع الفرامل ، مفيش مشكلة انك ممكن تنسى او لا اراديا تدوس فرامل بالغلط بس لو احساسك عالى بالعربية هتاخد بالك على طول ان الفرامل بتنيل الدنيا اكتر وهتلحق ترفع رجلك تانى
الدركسيون في الوقت ده تقريبا بيبقى هو كل حاجة في العربية
خلى حركة الدركسيون محسوبة ومش سريعة ، خلى بالك ان حركة صغيرة بتخلى العربية تحدف جامد اوى فالحركة تبقى بالعقل والاتجاه الصح ، الاتجاه الصح انك تلف الدركسيون في نفس الاتجاه اللى ضهر العربية بيتحرك بيه ، ومالكش دعوة بالمقدمة ، يعنى لو الضهر بيروح ناحية اليمين تعالى يمين ، ييجى شمال تعالى شمال ، وهكذا ، هتلاقى التعويم بدأ يخف ، لو ربنا كرمك في خلال ثوانى هتلاقى العربية بعد ما كانت حركتها عنيفة ومش عارف تسيطر عليها بدأت تستقر وتتماسك بالارض وتمشى في خط شبه مستقيم تانى، ساعتها تدوس بنزين تتعدل معاك وتكمل طريقك على خير ، المشكلة في الموضوع ده كله ان يبقى الطريق فاضى ويسمح بالمرجحة دى كلها بسلام ، او انك ما تخبطش في عمود مثلا لا قدر الله ، و في الاول وفي الاخر ربك هو اللى بيسترها
اعتقد ebs و ebd مع بعض يساعدوا ان العربية تلم نفسها بس دوس فرامل بالعقل
بص فى حاله التعويم بيكون فى حاجه اسمها مركز لحظى للدوان
وده بيحصل لان ساعه الغرزه حضرتك بيحصل ما يسمى lateral load transfer
يعنى فى عجله من الاربعه ( وغالبا واحده من الاتنين اللى قدام ) بيكون عليها قوه الجر اعلى بكتير من التانيه
الحل ساعتها انك تعمل مركز لحظى للدوران عكس المركز اللحظى اللى موجود
المركز اللحظى للدوران بيكون بفرمله عجله معينه ينشى عنها عزم مساوى فى المقدار ومضاد فى الاتجاه للعزم اللى خلى العربيه تعوم فى الاول
وده باختصار اللى بيعمله نظام esp
واللى انت مش حتعرف تعمله طبعااااااااااا
لكن فى حل وسط وبيخلى العربيه تمسك نفسها شويه والتعوميه تقل كتييير
انك تعمل ما يسمى engine brake
يعنى تسقط نقله يا زميل
لو عملت غرزه على الرابع ولاقيت العربيه عومت منك انزل للتالت بسرعه وامسك دركسيون كويس
العربيه حتلم منك
ارجوا اكون وضحت النقطه
شكرا يا رجالة على المعلومات المفيدة دى
لو حسيت أن العربية أبتدت تعوم وأنت بتلف, دوس سنة بنزين, أو أعمل Engine brake, سيب دبرياج وبنزين بالراحة علشان تبطأ العربية بالموتور مش بالفرامل, وأحود سنة عكس أتجاه الملف أو الغرزة اللى بتاخدها سواء بيتعمل Engine break أو بتدوس بنزين, ماتعملش أى حركات مفاجئة أو تدوس بنزين أو فرامل جامد علشان الكاوتش مايفقدش ثباته والعربية تعوم بجد, لو ظهر العربية فقد ثباته فعلا الموضوع بيبقى تجارب وخبرة, ناس ممكن تلم عربية ماشية بجنبها وناس بتخيش. لو عايز تزود الثبات, قلل أرتفاع العربية بحيث مركز ثقلها يبقى أقرب للأرض, ركب سوست ومساعدين أنشف وأوطى. كاوتش أعرض بتاريخ أنتاج حديث وماركة محترمة, غير توزيع الوزن جوه العربية, ببساطة ميبقاش نص العربية الخلفى أتقل من الأمامى. غير كده, عرض قاعدة العجل بتاع العربية, كل ماكانت قاعدة عجل العربية أكبر كل ما كان أتزانها أعلى. أهم حاجة تعرف حدود عربيتك أيه, بالأضافة أن مش كل مرة تسلم الجرة, بقعة زيت, حمار بيعدى طريق سريع, واحد سايق على أساس أنه الوحيد اللى ماشى فى الطريق ممكن يسببلك كارثة ولا هتعرف تعمل معاه حاجة.