تغيير كاوتش بسبب البلالين
السلام عليكم ورحمة الله وبركاته
اولا حسبي الله ونعم الوكيل في كل واحد فاسد ومش شايف شغله وخصوصا من المسئولين عن الطرق .. والله العظيم حرام الطرق الزبالة اللى احنا بنمشي عليها .. ربنا ينتقم من كل واحد عمل الطرق دي من غير ضمير
كنت خارج من بنزينه موبيل اللى على المحور (بعد اركان) وماشي طبعا فى البطئ ناحية ميدان جهينة .. ولان اسمه المحور ولانه طريق مفتوح .. فانا ماشي بسرعة ومش متوقع ابدا اني الاقي حفرة فى الارض عرضها حوالي 30 سم وعميقة جدا !!!!
للاسف اخدتها بالكاوتش اليمين (الامامي والخلفي) ومن شدة الصوت مراتي صوتت !!
المهم الخساير حتى الان هو الكاوتش الامامي .. ظهرت فيه بلونه بسبب الحفرة (ربنا ينتقم من اللى عملها واللى سابها)
عايز استشيركم:
1- العربية سيراتو 2014 والكاوتش عامل 13 الف كيلو .. هل في خطورة اكمل عليه مع وجود البلالين؟
2- بسبب السعر الغالي للكاوتش (كونتيننتال) فانا بفكر انزل الاستبن مكانه واخلي كاوتش البلالين كاستبن .. ايه رأيكوا؟
3- حد يعرف الكاوتش ده بكام؟؟ هو مقاس 16 (للاسف معرفش باقي المقاسات)
4- هل لو ركبت نوع تاني غير كونتيننتال هيبقى فى مشكلة؟
وحسبي الله ونعم الوكيل