الموضوع: الاوراق المطلوبة للزواج من اجنبية في مصر

مفيش حاجة اسمها زواج مدني في مصر

شوف يا سيدي

لو هو متجوزها في كندا ...... و الزيجة لا تخالف الشرع ...... ممكن يسجل الزيجة في مصر ....... عن طريق ان قسيمة زواجه في كندا يختمها من السفارة او القنصلية المصرية في كندا ...... و ينزل مصر يسجلها في مصلحة الاحوال المدنية في العباسية


لو هو مش متجوزها في كندا و هيتجوزها من الاول ..... اجراءات الزواج من روسية في مصر معقدة جدا و هتاخد شهور ......


1- لازم يقدم على موافقة سفارتها ...... و دي بتاخد وقت و اوراق كتير ...... لان السفارة الروسية في مصر يتحاول تقلل من الزيجات من مصريين ..... بيطلبوا قيد عائلي و فردي من الزوج و فيش و تشبيه و موافقة اهل الزوجة في روسيا و و و و و ...... و في الاخر بيدوله الموافقة .......

2- بعدين يتجوزها عرفي ....... و يقدم بموافقة السفارة + العرفي على اقامة 6 شهور في المجمع ليها

3- بعد الفحص الامني و موافقة مباحث الجوازات هتاخد الاقامة ..... و بكده يقدر يتجوزها رسمي في وزارة العدل في لاظوغلي - مكتب تزويج الاجانب في الدور الرابع

4- هيحتاج شوية ورق جنب الحاجات اللي فوق زي فحص المتزوجين في مستشفى و طابع اسرة و حاجات بسيطة تتدبر في يوم

و بالمناسبة ده مش زواج مدني ده زواج شرعي ............. لانه بيشترط الشروط الشرعية ان المسلم لا يتزوج الا مسلمة او كتابية و المسلمة لا تتزوج الا مسلم ...... و مش معنى انه في وزارة العدل انه مدني ......

و الزواج من الاجانب في مصر ما ينفعش لا في كنيسة و لا ماذون ...... الماذون و الكنائس المصرية مصرح لها بتزويج المصريين المتحدين في الديانة و الملة فقط ............ يعني لو مصري مسلم بيتجوز اجنبية مسلمة ما ينفعش يتجوزوا عند ماذون

الحل التالت انه يتجوزها في كندا في السفارة المصرية ........

المشاركة الأصلية كتبت بواسطة prof2013

والافضل من دا كله انه يسافر روسيا ويعمل عقود الزواج هناك في الزاكس مش هتبقى صعبه زي هنا اعتقد
صوح ولا غلط ؟

زاجس مش زاكس

هتبقى اسهل بس هو كمان لازم يجيب فيش و تشبيه و شهادة من السفارة المصرية في روسيا انه لم يسبق له الزواج .......

المشاركة الأصلية كتبت بواسطة batran

ايه نوع الجواز؟ ولو هوا متجوزها رسمي طيب ما ممكن يخلص كل الأجراءات في كندا

أنا خاطب كنديه وده الورق اللي مطلوب هنا وممكن فيه ورق يتعمل في سفارتها أو بلدها بره قبل ما تيجي مصر

1-شهادة من السفارة بعدم الممانعه مصدق عليها من الخارجيه المصرية وبها الديانه والحالة الإجتماعيه.
الشهاده دي ممكن تتعمل من اي notary office وتتبعت للسفارة المصريه علشان تصدق عليها وبردو شهادة موافقه ولي الأمر تقريباً لو هي اقل من 20 سنه.

2-جواز سفر ساري وبه اقامه من مصلحه الجوازات والجنسيه من مجمع التحرير علشان لو رحت مكتب زواج الأجانب وجوازها في فيزا سياحه مش هيوافقوا يكتبوا العقد غير لما تغير الإقامه.

3-مترجم معتمد للغه الروسيه لو هي مبتعرفش انجليزي.

4-طابع اسرة فئه خمسين جنيه و خمس صور شخصية للزوجين

5- 2 شهود وتكون البطاقة سارية

6- 2شهادة صحية للزوجين معتمده بختم النسر من مستشفي حكومي مصري أقرب حاجه علي ما اعتقد أحمد ماهر وفيه حاجه تبع وزارة الصحه في شارع متفرع من باب اللوق اللي بيعملوا فيها شهادة صحية للسفر بس معرفش بيطلعوا فيها شهادة صحية للزواج ولا لا.

7-فيه اجراءات بتخلصها بعد ما تاخد العقد من مكتب زواج الأجانب زي توثيق العقد في الشهر العقاري والخارجيه

ده كل اللي انا فاكره دلوقتي ولو فيه حاجه افتكرتها تاني هبقي اضيفها.

الكندية غير الروسية

فيه لستة ببعض الجنسيات في مصر ما ينفعش تتجوز منهم من غير ما تكون حاملة لاقامة 6 شهور لغير غرض السياحة و الطريقة الوحيدة للاقامة دي هي الزواج العرفي ثم التقديم عالاقامة ثم الزواج الرسمي


كندا مش في اللستة دي بس روسيا فيها

المشاركة الأصلية كتبت بواسطة sameh samy

يا جماعة الموضوع اعقد من كدة شوية
هي من مولدافيا اللي كانت تبع التحاد السوفييتي قبل ما يتفك
والبلد دي تقريبا مالهاش سفارات اصلا في اية حتة وحتي لما راح هناك مالقاش سفارة مصرية
صاحبي مسلم بس هاجر كندا
بعد مخد الجنسية سافر الامارات
موش عارف ياخد مراتة عشان الاقامة وراح مولدفايا معرفش يتجوزها هناك عشان مافيش سفارة
من الاخر كدة هو مسلم وهي مسيحية وموش عارف يثبت الجواز عشان يديها جنسية كندا او ياخدها معاة الامارات وعاوز يعرف لو جة مصر يعمل اية

مولدوفا مالهاش سفارة في مصر .... و تاشيرة الدخول لبنت من مولدوفا لمصر صعبة جدا جدا جدا .......