غيرت جوان وش السلندر أعمل إيه بعديه؟؟

مساء الفل
أنا غيرت جوان وش السلندر والميكانيكي حاسبني فقط بدون أي تعليمات وكان الوقت متأخر جداً وتعبانين والصنايعية بيتخانقوا مع بعض. المهم انا لما صدقت خلصت ومشيت كانت الساعة حوالي ٢٫١٥ صباحاً

السؤال هنا: في خنقة في أول الدوارة وصوت الماتور تخين أو كأن الشكمان مخروم مع العلم إني راجعت علي الشكمان ومتظبط ١٠/١٠ ولازم أدوس بنزين كتير علشان متبطلش بس في المشي السريع بتبقي ناعمة بس صوت الماتور هو اللي أجوف إنتوا فاهمين قصدي إيه. المهم بأه أعمل إيه وهل في إجراءات لازم أتبعها؟ أفيدوني جزاكم الله كل خير

العربية لانوس ١ موديل ٢٠٠٠ مانيوال

شكراً

ها اقول لك رايي وصدقني مش قصدي شيئ
ظبتها وشوف مشتري...

ماشي
بس ليه؟؟؟

طالما وش السلندر اتفتح عند ميكانيكي مره العربيه ما بترجعش زي الاول.... غير عفشه وفرامل وعلبه دركسيون ..بس بعيد عن الماتور ما فيش مشكله
... انما وش سلندر وصبابات وبساتم .....انا رايي اذا كان في استطاعتك تشوف عربيه
بنفس قيمه عربيك يكون افضل .. وبكلمك عن تجربه انا مريت بيها في اول عربيه اجيبها اول ما اتخرجت
وربنا يوفقك

انا رايي مش لدرجه ديه متعقدش الراجل هو لسه محاولش يظبطها اصلا عشان نقول انها مزبططس و اسواا الظروف حيجيب وش استعمال 2ﻻكامه و يبقي كسبان برضو

اقتباس:

---

المشاركة الأصلية كتبت بواسطة waga

طالما وش السلندر اتفتح عند ميكانيكي مره العربيه ما بترجعش زي الاول.... غير عفشه وفرامل وعلبه دركسيون ..بس بعيد عن الماتور ما فيش مشكله
... انما وش سلندر وصبابات وبساتم .....انا رايي اذا كان في استطاعتك تشوف عربيه
بنفس قيمه عربيك يكون افضل .. وبكلمك عن تجربه انا مريت بيها في اول عربيه اجيبها اول ما اتخرجت
وربنا يوفقك

---

كان ليا واحد صاحبي يقولي إيه ..أحسن دعوه تدعيها لواحد معاه عربيه ..ربنا ما يوقعك في صنايعي يبيعك هدومك ..أهو رأي حضرتك ده فكرني بكلام صاحبي ده ..إن فعلا ممكن يكون غباء الميكانيكي في تقفيل العربيه أو تقفيل أي جزء في العربيه يخليك تكره العربيه وتبيعها

أنا معايا سوزوكي ألتو 2008 ..بعد ما إشتريتها ب 24 ساعة إكتشفت إن فيها جوان وش سلندر ..بتجيب زيت على المياه ..إتصلت بصاحبها عشان أتكلم معاه في إنه يقولي حتى إيه سبب إنها جايبه جوان ..أنكر إن العربيه كان فيها حاجه ..وكان معلق على كلمه واحده ..مش إنت إتفرجت وعاينت والميكانيكي قالك تمام..مش إنت إتفرجت وعاينت والميكانيكي قالك تمام ..وتحس إنه مكانش حافظ غير الكلمه دي

رحت للميكانيكي بتاعي اللي شافها وقالي تمام ..وعملت عنده جوان وش سلندر ..قعدت أسبوعين ..وجابت جوان تاني..زيت على المياه برضه ..مشيت بيها بتاع شهر أو شهرين مياه على زيت ومستحمل ..وخصوصا إن الميكانيكي اللي عملي الجوان كان مخوفني من فتح وش المكنه تاني ..وكان بيقولي ..المكنه دي لو إتفتحت تاني ..مش هتعرف تضبطها ..لإن خلاص ..فبريكتها راحت ..لكن رحتله ..وقلتله أبوس إيدك ..إفتح المكنه وإعملي جوان وش سلندر ..كنت عامل زي المدمن اللي رايح لبتاع الكيف ياخد من عنده الكيف بتاعه وهو عارف إنه كده بيضيع نفسه ..بس أعمل إيه ..مكنتش أعرف ميكانيكي غيره ..وكنت مضطر أعمل موضوع الجوان ده لإن الزيت بدأ ينقص نتيجة دخوله على المياه

وعمل جوان تاني ..ومشيت شهر ..وجابت جوان تاني..بس المره دي ..دخلت كبس المكنه على المياه وطبعا في المرتين كانت بتسخن ..بصراحه ..كرهت العربيه ..إتعقدت .كرهت نفسي وكرهت اليوم اللي فكرت أشتري فيه عربيه ..وعرضتها للبيع ..وخصوصا بعد ما سمعت فتاوى كتير من ميكانيكيه كتير ..واللي يقولي إرمي المكنه ما دام عملت كده مرتين يبقى المكنه دي فيها شرخ في البلوك ..واللي يقولي إعمل حسابك على شورت بلوك ..واللي يقولي أنا ما بشتغلش في العربيات دي أصلا ..وقولت أنا هعملها جوان وأبيعها وهي لسه في فترة السير الحسن ..ما أنا عرفت بقى اللي فيها ..وعرفت إنها بتجيب جوان بعديها من أسبوعين لشهر

ركنتها تحت البيت لغاية ما ربنا يفرجها بأي فلوس ..كانت أيام كئيبه ..دافع فلوس وراميها ..وكمان هبيع بخسارة

بحكي لواحد صديقي من أصدقاء العمر ..يعني بفضفض معاه من غلبي وحزني ..قالي تعالى فيه ميكانيكي محترم قوي ..هيبص على العربيه ..ويقولك فتوى كويسه في العربيه دي ..وراجل محترم ..مش بتاع إشتغالات ..رحت فعلا للميكانيكي اللي صديقي قال عليه ..وقابلته ..وقعدت بتاع 10 أيام عشان أعرف آخد ميعاد ..لإن بسم الله ما شاء الله ..ما تعرفش تقف في الورشه بتاعته تتكلم معاه ربع ساعة على بعضها من كتر العجل اللي واقف عنده ..وفي الآخر عرفت أخد ميعاد ..عشان يشتغل في العربيه

وكانت المفاجأة ..إن المشكلة كلها ..كانت إن وش السلندر مش مربوط أصلا ..أيون ..وش السلندر كان مفكوك ..العربيه ماشيه بوش سلندر مفكوك..ومش كده وبس ..ده الإسبراتير كان مفكوك ..وإسبراتير الإنجيشكن بيبقى قطعه واحده كده بتتربط بمسمارين ..يعني هو حتى الميكانيكي الأولاني مكانش هاين على أمه يربط مسمارين ..مسمارين من غير ضبط ..لإن إسبراتير الإنجشكن ملوش ضبطه ..هو بتربطه كده وتأرط عليه وخلاص ..وأنا أقول العربيه كانت بتاكل بنزين بشراهه ..وكان صوتها كده خشن وتخين ..طبعا وش السلندر إتأرط عليه..والإسبراتير إتربط والتقسيمه إتعملت من جديد ..والعربيه بسم الله ما شاء الله ..زي الفل

دي حكايتي مع ميكانيكي كان هيبيعني عربيتي ..ميكانيكي جشع ..أهم حاجه عنده يلهف الميتين جنيه أو الميه وخمسين جنيه المصنعيه ..لكن الزبون يحصله إيه ..لالالالالا ..مش مهم ..يبيع عربيته ..يتعقد ..يخسر ..يولع بجاز ..

رأي ..العضو المحترم اللي عنده المشكله دي ما يتعبش ناحية الميكانيكي ده تاني ..ويطلع عدل على مركز دايو محترم وليه سمعه وتجربه مع حد يشوف فيه إيه المشكلة ..جوان وش السلندر ..بيتعمل في العالم كله ..ووشاش السلندر بتتباع في العالم كله ..جديد وإستعمال

رايي الشخصي ..والعضو المحترم ليه الرأي النهائي..شوف حد كويس يراجع على العربيه ..وما ترجعش للميكانيكي اللي إشتغل فيها تاني

الخلاصة سيب الفتاي الي رحتله وشوف حد بيفهم يظبطلك المكنة

العضو المحترم جداً : m_m_sh_a
بجد بجد شكراً لحضرتك ولمشاركتك الهامة جداً ورأيك السليم لأن أنا عندي إعتقاد في العربيات وهو "طول ما الشاسيه والبادي سلام يبقى أي مشكلة تتحل، لأنها في الآخر قطع غيار ليها عمر إفتراضي طال أو قل هيجي اليوم وهيتغير". مش معقول لما جوان وش السلندر يتغير يبقي أغير مكنة أو أغير عربية مفيش حد في العالم هيعمل كده حتى لو العربية قديمة لأن إللي صناعها عامل حساب إنك ممكن تعمل كده مرة واتينين وتلاتة والماتور كمان يتعمر مرة واتنين وتلاتة دي إسمها منتجات مُعمرة حسب الاستعمال. المهم أنا هعمل بنصيحتك ونصيحة الزملاء الأفاضل وهغير الصنايعي لأني عرفت سبب المشكلة والحمد الله إن البيه الصنايعي وهو بيركب وش السلندر إتعافى على كوعة الفايظ بتاعت الزيت وقطها "شوف ستر ربنا" وبالتالي انا عمال أسخن في العربية وضربت بيها مشاور من حلوان لحد العجوزة والزيت عمال ينتر بره علي المكنة وفي الأرض وعامل الصوت الأجوف ده. المهم بالصدفة البحتة "شوف ستر ربنا" بعد ما كتبت المشكلة علي المنتدي خلصت شغل ومروح قولت إيه أبص على الميه وأنا بفتح القربة عيني لمحت الكوعة ولاقيتها مقطوعة بغباء ودي كانت جديدة أصلاً. ربنا ستر وغيرتها النهاردة الصبح وحطيط زيت. الصوت التخين ده راح بس لسه في رجة في الماتور على السلانسيه مش على نغمة واحدة أنا للآسف لازم أروحله علشان يعرف اللي حصل ويربط على الجوان بعد المشاوير وتبقى آخر زيارة ليه إن شاء الله.

شكراً جزيلاً لحضراتكم

اقتباس:

---

المشاركة الأصلية كتبت بواسطة sameyes

العضو المحترم جداً : m_m_sh_a
بجد بجد شكراً لحضرتك ولمشاركتك الهامة جداً ورأيك السليم لأن أنا عندي إعتقاد في العربيات وهو "طول ما الشاسيه والبادي سلام يبقى أي مشكلة تتحل، لأنها في الآخر قطع غيار ليها عمر إفتراضي طال أو قل هيجي اليوم وهيتغير". مش معقول لما جوان وش السلندر يتغير يبقي أغير مكنة أو أغير عربية مفيش حد في العالم هيعمل كده حتى لو العربية قديمة لأن إللي صناعها عامل حساب إنك ممكن تعمل كده مرة واتينين وتلاتة والماتور كمان يتعمر مرة واتنين وتلاتة دي إسمها منتجات مُعمرة حسب الاستعمال. المهم أنا هعمل بنصيحتك ونصيحة الزملاء الأفاضل وهغير الصنايعي لأني عرفت سبب المشكلة والحمد الله إن البيه الصنايعي وهو بيركب وش السلندر إتعافى على كوعة الفايظ بتاعت الزيت وقطها "شوف ستر ربنا" وبالتالي انا عمال أسخن في العربية وضربت بيها مشاور من حلوان لحد العجوزة والزيت عمال ينتر بره علي المكنة وفي الأرض وعامل الصوت الأجوف ده. المهم بالصدفة البحتة "شوف ستر ربنا" بعد ما كتبت المشكلة علي المنتدي خلصت شغل ومروح قولت إيه أبص على الميه وأنا بفتح القربة عيني لمحت الكوعة ولاقيتها مقطوعة بغباء ودي كانت جديدة أصلاً. ربنا ستر وغيرتها النهاردة الصبح وحطيط زيت. الصوت التخين ده راح بس لسه في رجة في الماتور على السلانسيه مش على نغمة واحدة أنا للآسف لازم أروحله علشان يعرف اللي حصل ويربط على الجوان بعد المشاوير وتبقى آخر زيارة ليه إن شاء الله.

شكراً جزيلاً لحضراتكم

---

يعني حضرتك بتقول قطعلك كوعة الزيت ..وحضرتك شوفتها بفضل ربنا وعدت على خير..تقوم رايحله تاني عشان يتلف حاجه تانيه..وبعدين معلش بقى ..واضح إن الميكانيكي اللي حضرتك روحتله ده مش تمام ..وأنا خدت بالي من المشاركه بتاعت حضرتك لما كتبت في آخرها إنهم كانوا بيتخانقوا مع بعض ومعرفتش تتكلم معاه ..هو لو ميكانيكي محترم وبيخاف على أكل عيشه ..يلم نفسه قدام الزباين عشان يعرف يسلم الشغل لصحاب الشغل مضبوط ..مش يقعد يتخانق ويسلم الشغل بايظ ..روح لحد كويس يفنش الشغلانه..واضح إن هي حاجه عبيطه ..بس عايزه واحد بيهتم بالفينش زي ما بيهتم بحساب المصنعيعيه

هههههه
صح صح معاك حق... لازم حد يتقى ربنا يفنش الشغل ربنا يسهل

وشكراً مرة تانية

اقتباس:

---

المشاركة الأصلية كتبت بواسطة m_m_sh_a

أنا معايا سوزوكي ألتو 2008 ..بعد ما إشتريتها ب 24 ساعة إكتشفت إن فيها جوان وش سلندر ..بتجيب زيت على المياه ..إتصلت بصاحبها عشان أتكلم معاه في إنه يقولي حتى إيه سبب إنها جايبه جوان ..أنكر إن العربيه كان فيها حاجه ..وكان معلق على كلمه واحده ..مش إنت إتفرجت وعاينت والميكانيكي قالك تمام..مش إنت إتفرجت وعاينت والميكانيكي قالك تمام ..وتحس إنه مكانش حافظ غير الكلمه دي

ركنتها تحت البيت لغاية ما ربنا يفرجها بأي فلوس ..كانت أيام كئيبه ..دافع فلوس وراميها ..وكمان هبيع بخسارة

بحكي لواحد صديقي من أصدقاء العمر ..يعني بفضفض معاه من غلبي وحزني ..قالي تعالى فيه

وكانت المفاجأة ..إن المشكلة كلها ..كانت إن وش السلندر مش مربوط أصلا ..أيون ..وش السلندر كان مفكوك ..العربيه ماشيه بوش سلندر مفكوك..ومش كده وبس ..ده الإسبراتير كان مفكوك ..
دي حكايتي مع ميكانيكي كان هيبيعني عربيتي ..ميكانيكي جشع ..أهم حاجه عنده يلهف الميتين جنيه أو الميه وخمسين جنيه المصنعيه ..لكن الزبون يحصله إيه ..لالالالالا ..مش مهم ..يبيع عربيته ..يتعقد ..يخسر ..يولع بجاز ..

رايي الشخصي ..والعضو المحترم ليه الرأي النهائي..شوف حد كويس يراجع على العربيه ..وما ترجعش للميكانيكي اللي إشتغل فيها تاني

---

m_m
مساء القفش
الصراحه انت تنفع سيناريست عشره علي عشره انت خلتني اندمج مع قصه عربيتك
كاني بتفرج علي فيلم درامي ومشاء الله السيناريو محبك بدايه وجسم الموضوع وبعدين العقده
وبعدين الانفراجه والنهايه وبعدين الموعظه الاخيره للجمهور قبل ما يسيب السينما
لا وايه حكايتي مع الميكانيكي فيلم مليان اثاره ... حب غدر كراهيه
بس الصراحه انا فرحت جدا انه ربنا اكرمك في الاخر انا عندي احساس انك انسان طيب
علشان كده فلوسك مارحتش عليك
تحياتي

اقتباس:

---

المشاركة الأصلية كتبت بواسطة أمجد هووز

m_m
مساء القفش
الصراحه انت تنفع سيناريست عشره علي عشره انت خلتني اندمج مع قصه عربيتك
كاني بتفرج علي فيلم درامي ومشاء الله السيناريو محبك بدايه وجسم الموضوع وبعدين العقده
وبعدين الانفراجه والنهايه وبعدين الموعظه الاخيره للجمهور قبل ما يسيب السينما
لا وايه حكايتي مع الميكانيكي فيلم مليان اثاره ... حب غدر كراهيه
بس الصراحه انا فرحت جدا انه ربنا اكرمك في الاخر انا عندي احساس انك انسان طيب
علشان كده فلوسك مارحتش عليك
تحياتي

---

والله العظيم إنت راجل عسليه .. حزلؤم من فيلم لا تراجع ولا إستسلام.. :verygood: