الموضوع: القواعد الذهبية للذهاب الى شرم

يا اخوانا براحة على المصريين شوية

شوفت بعيني في سونستا بيتش خمس نجوم واحد ماشي بشبشب حمام و فانلة حمالات
و محدش كلمه عشان خواجة (روسي)

و في نفس الفندق شوفت السباك و النجار و مبيض المحارة
وبياخد سعر في الليلة ميحلمش بيه اي مصري و كمان (all inclusive)
و تلاقيه مش بيصرف 5 دولار في اليوم
لكن بيتشال على راسهم من فوق عشان اجنبي

يجي المصري و يزعلوا منه عشان اي حاجة
و الله العظيم حرام اللي بنعمله في بعض دا

سبحان الله.....ده لفه واحده فى القسم ألأجتماعى هتلاقى عشرات و عشرات من المواضيع اللى بتحكى و تتحاكى على مستوى ألأنحطاط اللى وصلنا ليه كشعب و كميه رهيبة من الموضوعات لناس عايزة تهج من البلد بعيالها بسبب التردى ألأخلاقى اللى الشعب وصل له. جينا عند الفنادق و الشعب المصرى بقى مظلوم و بقى شعب من الملايكه و الناس اللى بتشتغل فى السياحة بتتجنى عليه !!! يا ساده داحنا واخدين مركز من المراكز ألأولى على مستوى العالم فى التحرش و الفساد والفوضى و حوادث الطرق ....و كل ده بسبب السلوكيات الهمجيه و انعدام الضمير و ألأخلاق عند النسبة الغالبة من الشعب. هنيجى عند الفنادق و نقول أن النزيل المصرى مظلوم!
و الله العظيم فيه سياحة أردنيه و سعودية فى شرم الشيخ فى منتهى ألأحترام و النظام و فى زياده مضطرده و الفنادق بترحب بيهم .

حضرتك ليه مش كاتب ان الموضوع منقول من الفيس بوك

المشاركة الأصلية كتبت بواسطة aif

بص يا استاذ مهاب
انا بردو من الناس اللي بتنتقد تصرفات بعض المصريين والعرب في الاماكن دي
وده طبيعي جدا ....
لكن ان الموضوع يوصل لفصل علي اساس الجنسية .... هنا يبقي الامر دخل منحني تاني خالص
فيه حلول تانية
مثلا ان امن الفندق يمنع اي تصرف غير لائق سواء من مصري او عربي او اجنبي
او يغلو سعر الفندق علشان النزلاء يبقو اقل
...
انا اعتراضي الوحيد اننا نطالب بعمل مكان لجنسية دون الاخري
تفرق اني ما أروحش المكان ده عشان ضد عاداتي وتقاليدي وبين انه يتم منعي من دخولها قسرا
ارجو اني اكون قدرت اوصل اللي عاوز اقوله
وتقبل خالص تحياتي

يا باشا محدش يقدر يمنعك قسرا من دخول أى مكان أنت تنور و تشرف أى حته, يمكن أنا فى حالة ألأحباط اللى حاسس بيها من جهة الموضوع ده كتبت بشكل انفعالى و موصلتش الفكرة صح...أنا بفكر فى منتجعات تكون مفيهاش كحوليات و تكون بأسعار و امكانيات و اصطاف يقدر يتعامل مع مجموعات المصريين و يهندل مشاكلهم و يبقى عارف انه شغله كله هايكون مع نزلاء مصريين فهيكون ده أفضل ليه و للنزيل و فى نفس الوقت مش هايكون فيه تعارض بين سلوكيات النزلاء لأن كلهم هيقدروا يتعاملوا مع بعض . و من ناحيه تانيه الفنادق التانيه متمنعش حد بس اللى هايروح يبقى عارف ان فيه ناس بتلبس مايوهات و فيه كحوليات و فيه نظام ماينفعش يخالفه فى البوفيه و فى ازعاج غيرة و خلافه من السلوكيات المرفوضه.
انا اللى بيحزننى جدا لما حد أجنبى بيسردلى لسته انتقادات و أنا ببقى فى نص هدومى و فى نفس الوقت ماقدرش أقوله انتوا عندكوا كده برضوا لأن هما ماعندهمش كده و هنا اللى بيتصرف منهم تصرفات خارجة بتكون نسبته قليلة جدا جدا...بمعن أن السياح النسبة الغالبة منهم ملتزمة و جزء بسيط جدا بيكون مثير للمشاكل و ده بنعرف نتعامل معاه و بيتشد و و بيتزعق فيه و بينطرد من الفندق بدون مبالغة. و العكس بالعكس بالنسبة للمصريين..أن النسبة الغالبة بتكون فوضوية جدا و جزء بسيط جدا ملتزم. و الفوضويين الفنادق جربت معاهم كل الطرق من عمل لافتات و من توجيه بطريقه لطيفه ألخ..بس للأسف بتلاقى زعيق و صريخ و انا هاعمل و اسوى و أنا دافع فلوس( و الله لسه من أسبوعين بتعشى فى فندق وتابعت نزيلة مصريه أخدت التورتة كلها من على البوفيه و حطيتها على ترابيزة قاعد عليه 6 أفراد و مدير المطعم انتظر لما خلصوا خالص و خدوا بعضهم و قايمين و خد الراجل على جنب بعيد عن الناس و أنا شايف اتسامة مدير المطعم على وشه علشان ما يحرجش النزيل و لفت نظره أن التورتايه هاتترمى بالشكل ده لأن مستحيل تتحط على البوفيه تانى(ماكلوش أكتر من جزء بسيط منها و طبعا بهدلوها من كل ناحيه) فما كان من النزيل المصرى الا انه عمل فضيحة فى المطعم لمدير المطعم....ده موقف من مواقف كتير جدا بيصعب عليا فيها عمالة الفنادق. و الله العظيم شوفت عائلة مصريه كامله رايحين الغرفة و معاهم حامل حقائب واحد و شادد وراه 3شنط كبيرة و بيعافر مع الشنط و تيجى النزيله تقول لأبنها اللى زى الحيطه أنت شايل الشنطه ديه ليه(شنطه هاند باج خفيفة) و تقول لأبنها بمنتهى الجحود اديهاله ماهوا ده شغله...هيا كده بتعلم ابنها الجحود و القسوة فى التعامل مع الناس...
طيب علشان أختم كلامى...النزيل المصرى المحترم بيتقال عليه من ساعة لما بيسكن قدام الرسيبشن" الناس ديه كويسة لازم يتظبطوا" زى ما يكون الأصطاف لقى حاجة نادرة و بيبلغوا بعض..خلى بالك مع غرفة كذا الناس ديه محترمة(مش ماديا بس معنويا أن النزيل مايتعاملش معاهم وحش ).
أنا مش بشتغل فى فندق بس كل يوم بخش فنادق كتير و عايش الواقع ده و بسمع للمديرين فى الفنادق لما بيتكلموا بمرارة عن السياحة الداخليه و ازاى انهم بيشيلوا الهم طول الصيف وفى ألأعياد.
و تحياتى الطيبة لشخص حضرتك الكريم و اوعى تزعل منى ان كنت فى مشاراكات سابقة أسأت اختيار بعض مفرداتى فى عرض وجهة نظرى.