جي ام وسماعات كينوود وبازوكا جي بي ال : تجربة مفصلة + تقييمي + مطلوب أرائكم

السلام عليكم ورحمة الله وبركاته ؛؛؛
اعضاء المنتدى الكرام
عندي مشكلة وهشرح بالتغصيل للاستفادة من ارائكم القيمة.

اخوكم مقيم في السعودية - ومعايا عربية فورد توروس 2011 ومركب عدة صوت كالتالي :
1- الكاسيت الاصلي اللي جاي في العربية - USB و CD و MP3 تحكم بيز وتربل بس بدون ميد تشانيل - وللاسف مغيش مجال لتغييره لأنه راكب في كونسول كامل يتضمن شاشة معلومات وتحكم المكيف.
2- السماعات : Kenwood KFC-HQ718 320W
3- الامبليفاير : Kenwood KAC-8404 600W 4CH
4- بازوكا : JBL 1214 1000W

طريقة التوصيل : السماعتين على 2 تشانيل - كل واحدة لوحدها - والبازوكا متوصلة بريدج.

تقييمي : جودة معقولة نوعاً ما - الصوت طبعاً فلات - التربل تعبان - بيز كويس - ولو عليت الصوت اكتر من النص السماعات تبدأ تشنشن من البيز CLIPPING علماً ان الصوت مش مؤذي للأذن - طبعاً اتعكننت - مش دي الجودة اللي بدور عليها.

اضفت : ايكوﻻيزر زيرو باور سيمفوني 7 تشانيل (بين الكاسيت والجي ام) بتحكم منفصل للبازوكا

النتيجة : تحسن واضح في الجودة - بصراحة في فرق عن الاول - لكن بدأ يحصل CLIPPING في التربلات في اغاني معينة - ولو وطيت تحكم التربل سواء من الايكوﻻيزر او الكاسيت بتروح لكن اغاني تانية بتتكتم - يا امل توطي الصوت وهنا مش هتسمع بالدرجة المطلوبة - مشكلة ان كل اغنية يبقالها ظبطة - صحيح في فروقات بيت الاستوديوهات والتسجيلات وجودة الملف الصوتي - لكن اللي عايز اقوله نفس الملفات بتشتغل على عدد تانية بدون المشاكل او الفروقات دي.

حاجة تانية : ان الصوت جوا العربية افضل من برا بمراحل - يعني التربل مش بيخرج برا ازاز العربية عكس البيز اللي بيهز العربية - انا مش عايز ازعج الناس بالصوت العالي - لكن دي مجرد ملاحظة تانية.

أخيراً : الامبليفاير الكينوود ده المفروض انه Signal Sensing Turn-On حتى لو موصلتش سلك الريموت بالكاسيت وده حسب كلام الكاتالوج - المشكلة انه شغال علطول حتى لو الكاسيت مطفي ودي حاجة مش فاهمها.


ملاحظة : التوصيلات سليمة وكلها حسب توصيات الخواجة - والشغل نظيف بشهادة ناس كتير.

اعتذر عن الاطالة - ولكم خالص شكري وتقديري.