محتاج مساعدتكم فى مشكله مع جار ليا بسبب السباكه
مساء الخير يارجاله
عندى مشكله ومش عارف اتصرف فيها ازاى
انا مشترى شقه من شهر 3 اللى فات في برج من التمانينات وانا في الدور الثامن
اول ما اشترتها هديت الحمام كله وغيرت كل المواسير للصرف والسباكه كلها جديده وحاليا شغال النقاش وحتى الان انا مسكنتش في الشقه لانها تحت التشطيب
المهم وانا بعمل السباكه طلعتلى الجاره اللى تحتيها وفضلت تهلل ان حمامها بايظ بقاله كتير بسبب الميه اللى نازله من الصرف العمومى اللى بره العماره اللى مشترك فيه انا وجارى اللى جنبى وان الجزء من ماسورة الصرف اللى بيمر قدامنا مكسور وبينقط عندها..السباك بتاعى بص من الشباك عندى ولقى ان التسريب نازل من ماسورة صرف الدور العاشر وبيمشى على كوع الصرف بتاع جارى ويدخلها وكمان لقى ان الماسورة الحديد بتاعت صرف العماره كلها دايبه وبتنقط من كل الادوار وانا نفسى عندى نشع في سقف الحمام من الميه وان الماسوره بتاعت صرف العماره كلها محتاجه تتغير ببلاستيك مكان الحديد اللى دايبه خالص
المهم طلعت هللت فوشى قدام السباك والصبى بتاعه وانا كنت هادى جدا ومحترم لاقصى درجه وقالتلى دانا جايبه حبس للست اللى باعتلك الشقه 3 شهور بسبب الميه دى وانها باعتها عشان كده وانى مستشاره ومش عايزة ازعل حد وطبعا هى شكلها بعيد جدا عن انها مستشاره..
المهم جيت بعدها بكام يوم خبطت عليها ومفتحتليش
وقفلت الشقه شهرين وجيت اشتغلت نقاشه من اسبوع وطلعت برضه عملت الحبتين دول مع النقاش وانا مش موجود اصلا لان شغلى من الضهر لبليل وكلمتنى من عند الراجل وقالتلى عايزة اجيب سباك وينزل بسقاله ويقطع الجزء اللى بيخر (من وجهة نظرها) ويركب مكانه جزء جديد وقلتلها حاضر وتحت امرك وشوفى الراجل اللى جنبى وشوفى التكلفه كام وانا ادفع وقلتلها هعدى عليكى بكره ونطلع للراجل اللى جنبى وجيت تانى يوم وخبطت عليها ومفتحتش للمرة التانيه!!!
والراجل قالها مليش دعوه وطلعلتله تانى بليل س 1 عملت نفس المشكله وخدت رقم تليفونى ولسه مكلمتنيش
انا شايف ان الموضوع ملوش علاقه بيا وان الميه مش نازله من عندى اطلاقا وده واضح جدا لان الماسوره عندى ناشفه بينما مواسير الناس اللى فوق كلها فيها ميه وطحالب خضره
دلوقتى اعمل ايه؟؟وهل فعلا ممكن تحبسنى زى مابتقول وهل ياترى سكوتى عليها وهى بتطلعلى شقتى وتهيننى قدام الصنايعيه ده خلاها تحس انى خايف منها؟؟
اعمل ايه؟؟بالله عليكم شورو عليا