اشتريت سيراتو 2014 .. و حسبي الله و نعم الوكيل
الحمد لله ربنا كرمني من فضله بدون حول مني و لا قوة و رزقني و اشتريت النهاردة سيراتو 2014 في الكويت
استلمت العربية النهاردة الصبح الساعة 11 تقريبا .. لونها بني Golden Beat
العربية كانت عاملة 13 كم .. لفيت بيها شوية و خرجت المدام و الأولاد افسحم فيها و العداد وصل لحوالي 80 كم
و الحمد لله اتبسطت بيها جدا
المهم
ركنتها و نزلت باليل عملت مشوار بعربيتي التانية و رجعت ركنت و قولت اروح ابص عليها
لاقيت العربية متعلم عليها بمسمار الجنب الشمال كله .. من اول الرفرف الشمال الأمامي .. البابين الشمال .. الرفرف الشمال الخلفي
الكلام ده النهاردة الساعة 10 باليل
العربية معداش عليها 12 ساعة .. ما عملتش 100 كم .. اللزق اللي على الدركسيون و الريموت لسه زي ما هو .. حرام و الله
الموضوع ده مش اول مرة يحصل معايا ..
عربيتي التانية اتعلم على الجنب الشمال كله و بعرض الشنطة كلها .. و كان حصل مع ناس تانيين في العمارة ..
دلوقتي مش عارف اعمل ايه .. الموضوع ده بيحصل غالبا للعربيات اللي راكنة تحت المظلات بتاعة العمارة .. لما بركن العربية في الشارع في الشمس يعني مش بيحصل حاجة .. انا نقلت العربية هناك و ها اضطر اسيبها كده في الشمس ..
اسيبها كده في الشمس ولا اعمل ايه ؟ ده المفروض انه افضل حل .. بس طبعا الشمس هتخلي العربية تبهت في شهر بالكتير .. دي شمس الكويت
ناس بتقولي غطيها .. و ده عذاب طبعا في الحر و درجة الحرارة اللي بتوصل ل 50
الخدش ده اعمل فيه ايه ؟! ينفع يترمم كده بدون دهان ؟! او يتحسن شوية على الأقل ؟!
بردو العربية انا المفروض اني جايبها لمراتي .. استخدام بسيط جدا .. ها ارميها كده و لا اعمل ايه ؟!
محبط جدا .. و بفكر اعزل من العمارة و اريح دماغي
اي اقتراحات ؟؟
لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ