الموضوع: المهندس -معتز الجمل -- من اجما ما كتب --تقييمة للاسبيرانزا

نتمنى ان نجد المهندس المحترم معتز الجمل- يشاركنا هنا ايضا---لانة فعلا كان صاحب اسلوب مميز --وهذة واحدة من اجمل ما كتب وذكر --(((تقييم موضوعى للإسبيرانزا




بدايه أسم السيارة كلمه باللغه الإيطاليه تعنى الأمل وأعتقد أن هذا له مدلول خاص عند أبو الفتوح
لقد قمت بالحجز من أبو الفتوح بالإسكندريه يوم 9/8/2006 و أستلمت السيارة يوم 10/12/2006 بنفس اللون الذى أريدة( كان ممكن أستلم لون أخر يوم 21/11/2006)
منذ ترخيص السيارة حتى اليوم قراءة الكيلو متر 420km أغلب السير على الصحراوى
1.السيارة كبيرة حجما أكبر من سيارتى السابقه (فيات سيينا) و أطول . الأكصدام الأمامى قوى جدا عن تجربه (أثناء الركن كسر أكصدام تويوتا ميكروباص فيبر طبعا)
2. المرايات تعطى أدق التفاصيل وعيبها الوحيد أن رذاذ المطر يغطيها كان يجب أن تكون( داخله لجوة شويه)
3. الجير بوكس كان خشن شويه بس أنا ملاحظ أنه بدأ يستجيب بسهوله مع الأستخدام المتكرر
4. صوت الموتور هادى جدا بيزيد بعد 140km/h
5. تقفيل العربيه أكتر من ممتاز و المواد المستخدمه من أنواع تستحمل(فى السيينا كسرت إحدى فتحات التكييف أثناء تنظيفها) وإن كان فيه جراب فى الباب أنا شايف أنه ضعيف شويه بس ماشى
6. مفتاح مروحه التكييف تتش يعنى ممكن و أنت بتعشق الأول وسط الزحمه والنرفزة تشغله
7. التابلوة أكتر من رائع بالإضاءة الزرقاء و المؤشرات الواضحه فى أى وضع للقيادة (يا ريت لو حد يقولى إزاى أعمل reset لعداد km لأنه باضغط عليه بيعمل swtichما بين km وLITER/100km)
8. الفرامل أكتر من ممتازة سواء على أرض جافه أو بإستخدام ABS
9 . أستهلاك البنزين حوالى 10كيلو /لتر (معقول بالنسبه لسيارة لسه الموتور بيليين وكمان أنا بدوس جامد أوى- بنزين 92 )
10. معدل التسارع بقى ممتاز بعد أول 200 كيلو
11. الأتزان على الطريق حتى 160KM/Hرائع مفيش رجه ولا غربله ولا بتحس أنك ماسك الهوا أو أن العربيه بتتحكم فيك
12. كان فيه مشكله بالكلاكس أن فردة واحدة بس هى إللى شغاله دورت ولقيت أن SOCKET ما كانش راكب مكانه يبان من الشبكه الأماميه ضغطت عليه بقى تمام
13. فى المطبات لو العجلتين إللى قدام نزلوا مع بعض فى مطب بسرعه بتسمع صوت و تحس بيه فى الدركسيون (أصل المحافظ الجديد بيحفر إسكندريه كلها)
14. الجلوس بداخلها مريح جدا إللى جنبك يفضل ثابت فى مكانه
15. الكاسيت أكتر من ممتاز إمكانياته عاليه أوى(السيينا كان فيها كلاريون برضه ) محتاج بس أنك تظبط من المانيوال كويس و تحفظ أماكن المفاتيح بتاعته أنصح كل إللى يظبط أنه يلغى الأكولايزر ويظبطه من مفتاح A-M بيعمل شغل جامد أوى
16. السماعات كان لازم تكون أكبر من كدة بس والله صوتها ممتاز فى المستقبل تتكبر شويه
17. الأضاءة الخارجيه مبهرة بمعنى الكلمه تجبر لو واحد غلس قدامك لازم يوسعلك و إلا يتعمى من النور
18.زجاج السيارة ملون (يدى على أخضر شويه)

عيب العربيه أنك لازم تفضل تقرأ قرأن طول ما أنت ماشى لأنه مفيش حد سايبك فى حالك من كام يوم لقيت عربيه ميكروباص بالركاب إللى فيها قاعدين معايا جوة العربيه
على فكرة(اللهم أحفظنا) من كام يوم أتوبيس الشركه بتاعتى لطش واحدة إسبيرانزا فى الرفرف اليمين والأكصدام الخلفى (كان بياخد غرزة) بس اللهم صلى على النبى العربيه بتمشى - عربيه تانيه كان لازم تتسحب بالونش
على فكرة كمان مدير معرض أبو الفتوح قالى أن فيه عربيه وش السلندر ضرب منه (اللهم أحفظنا) لونها أبيض مسأله إمكانيات سواق وأرزاق
دة تقييمى الشخصى للعربيه وأنا حاولت أذكر كل العيوب إللى أن حاسس بيها أما بالنسبه للمميزات فلازم تجربها بنفسك
و شكرا
م/ معتز الجمل