الموضوع: مشكلة كبيرة في دائرة التكيف - تويوتا كورولا ٢٠١٠

السلام عليكم ورحمة الله وبركاته


الحكاية تبتدي من عند كهربائي ابن ...... بدون ذكر اسماء ، كان المفروض بيركب جهاز انزار، المهم الراجل قعد ٤ ساعات يقص سلك و يجرب بيه ، و بعد الحمد لله ٤ ساعات جهاز الانزار مشتغلش ... عملت مشكلة و قال ان الجهاز كان بايظ، ما علينا المهم الكلام دا كان في الشتا و مكنتش مركز اوي مع التكيف ، عدت الايام و الجو عندنا في مصر ما شاء الله مبيصدق يحرر و جيت اشغل التكيف اتصدم مش شغال، رحت لكذا واحد بتوع تكيف يقول لي كباس بايظ ، لحد انا عن نفسي اقتنعت ان الواحد هيلبسلو في شوية فلوس حلوين ، لحد راجل ابن حلال وصل للكباس كهرباء من برة اشتغل الحمد لله.. راح جايب جهاز كشف الاعطال ، العربية قالت انه في مشكلة في ال solenoid circuit و هنا بدات المشكلة، انا و بتاع التكيف دا يا معلم تنحنا لبعض ههههه و محدش فاهم حاجة خالص.. المهم الجو يسخن و انا اولع في العربية مش لاقي حل. قلت عوضي على ربنا رحت التوكيل كشفو عليها و اتصل بيا قال لي محتاجه كونترول تكيف ب ١٦٠٠ جنيه و موجود حاليا قلت طب بسيطة الحمد لله و لسه بقوله ماشي التوكيل قال لي كمان محتاجة علبة فيوزات داخلية و مش موجودة في مصر هتتبعت تتجاب من اليابان هتقعد شهر عبال متوصل و هتكلف ٥٠٠٠ الاف جنية ...... ولله كان في حاجات كتير هتطلع بس اللي حصل ، وانا بقى زي الباشا رحت دفعت تمن كشف التكيف و قلت لنفسي التكيف اصلا حرام ،،، فقدت الامل بصراحة ، لحد ما رحت لكهربائي ( واحد تاني غير الاول) قلتله على المشكلة ، قال لي حل و هو ده اللي انا عاوز اسال فيه، قال الكباس بياخد كهرباء ٦ فولت، قال انه ممكن هيعمل له دايرة كهرباء بكتاوت و هيشتغل..

انا بقى عاوز اسال ينفع الحل ده ، ولا الكباس مش هيستحمل و هيضرب ،، و في حاجة اصلا اسمها قفلة في علبة الفيوزات؟
عشان التوكيل قال لي الكهربائي بتاع اول انزار عمل لك قفلة في علبة الفيوزات و محتاجة تتغير


يا ريييت افادة عشان الجو بقى مش طبيعي و انا خلاص داخل على سنة بحالها من غير تكييف، راكب ياباني و الاقى كل العربيات حوليا مشغلين التكيف، بس فاضل اشوف لادا مشغل التكيف و هرمي العربية دي في البحر

المشاركة الأصلية كتبت بواسطة atwany2

الحل تشوف عربيه زيها ويكون صاحبها ابن حلا ل وتشوف القفلات اللي عملها كهربائي الانذار وترجعها تاني زي ما هيه واللي اعرفه علبة الفيوز دي صعب تبوظ لانها دايرة ومفيهاش اي مقومات او مكثفات كلها كباري من الضفيرة اللي جاية من الطبلوه الي الكتاوت والفيوزات وبترجع في ضفيرة تانية الي المكينة وممكن اي قفله فيها تتلغي يكون عمله الكهربائي وربنا معاك

هو فعلا كلامك مظبوط بس المشكلة هنا ان العربية انا رحت بيها للتوكيل الام فرع محرم بيك في الاسكندرية و كانت العربية قبل ما تروح كنت اشغل التكيف الاقي ال rpm بيعلى المعدل الطبيعي بس فاضل الهوا الساقع يطلع.. بس بعد ما راحت للتوكيل الاقي لمبة ال ac منورة على طول حتى لو المروحة على 0 مع ان المفروض اللمبة تطفي،. رحت سالت كهرباءي قال لي كونترول التكيف شكلة اتغير، مصدقتش رحت بعدها توكيل معتمد اسمه شركة الرزق على طريق القاهرة اسكندرية الصحراوي، العربية قعدت عندهم حوالي ٣ اسابيع و جابو كونترول تكيف جديد و ركبوه بعد عناء كبير في البحث عن قافلة في الاسلاك و مفيش فايدة الكارتة ضربت، و سالتهم عرفتو منين ان الكارتة الجديدة ضربت، قالو انهم جابو عربية اخت بتاعتي ركبو فياها الكارتة تكيفها مشتغلش.. كلام التوكيل الاول علبة فيوزات جديدة، و التوكيل الثاني ضفيرة داخلية كاملة للعربية و تكلفتها تقريبا ١٢ الف جنيه مش اقل من كدا.... ف انا عاوز اشوف حل ضروري ، يعني مثلا كهرباءي يعمل لي توصيلة للكباس خارجية او يعمل كوبري اذا كان فيها قافلة فعلا