الشتا بالنسبة لك ايه؟

**OlaOsman** · 24-10-2008 05:33 PM

نقاء جو.. و خصوصا بعد المطرة على طول بيبقى الوقت الوحيد اللي تقدر فيه تملا رئتيك بالهوا في القاهرة.

دعاء مستجاب.. وقت المطرة بادعي كتير اوي من قلبي.

صحصحة و نشاط.. أحلى تمشية ع الكورنيش الصبح لمدة 15 ساعة.. بس هاتحرم منها السنة دي عشان معايا العربية :(

مج هوت تشوكلات سخخخخخخخخخن في البلكونة.. أو كباية شاي في كباية إزاز مش مج

شوب سحلب ملهلب في ليالي الشتا قدام التليفزيون مع ماما و أخويا.

تشميسة في البلكونة الساعة 10 أو 11 الصبح و اشرب الشاي مع ماما في أيام الأجازات.

المشي في المطرة بيصيبني بحالة من الزأططة يصعب السيطرة عليها

تمشية في وسط البلد بعد صلاة الظهر في شمس شهر يناير الدافئة و الفرجة على المباني العتيقة في شوارع وسط البلد الجميلة.. دي بأه لوحدها بتنقلني لعالم تاني و باحس اني انا مش انا و لا عايشة في العصر ده :Angel_anim:

طبعا ما باحبش فيه البرد الشديد و التكتكة و حشر الهدوم فوق بعضها.. انما ميزاته بالنسبة لي و متعه بتغلب سيئاته بكتير.. سبحان الله الذي سخر لنا المطر و أنعم علينا بتبديل الفصول و تغيير الأجواء.. ربنا أعلم بنا منا.. عارف ان الإنسان ملول بطبعه و بيزهق بسرعة.

انتوا بأه الشتا بيمثل لكوا ايه؟

**Hassan Khalil** · 24-10-2008 05:44 PM

لحقتي تعملي موضوع عن الشتا يا علا ؟؟؟؟
دي المطرا لسه مكملتش ساعتين زمن
-------------------
بصي يا ستي ..
الشتا ...
زيارتين او تلاتة للاسكندرية
زيارتين او تلاتة لسطح العمارة .. علشان اضبط الدش
زيارتين او تلاتة للدكتور.. علشان انا بحب البرد .. و البرد بيحبني
اجتهاد و تركيز في العمل اكتر من الصيف بمرااااحل
باشوف اهلي اكتر من الصيف
الشتا شيااااااااكة في الهدوم ... الصيف بيبقي الواحد طالع من هدومه
الشتا .. روحانيات اعلي .. خصوصا وقت المطر.. او لو مطرت اثناء الصلوات واحنا في المسجد
الشتا .. اكل كتير.. و حركة قليل
الشتا ...جو نقي به لفحة باردة جميلة بعد الفجر ..تستحق التمشية حول الميريلاند او تلاوة الاذكار علي الكورنيش
الشتا .. .. مذاكرة و امتحانات .. :( خاصة لواحد اكتب عليه انه يذاكر طول عمره .. و هو اصلا ملهوش فيها ..

**OlaOsman** · 24-10-2008 05:44 PM

فيلم آيس كريم في جليم بيعيشني اوي في جو الشتا.. و كاميرا عبقري التصوير الخارجي خيري بشارة و كادراته في الفيلم ده بتخليني عايزة أنط جوه الشاشة و أمشي جنب الناس دي :D

أغنية محمد منير بتاعة شد اللحاف الشتا من البرد تصويرها المغرق في الشتوية بيخليني عايزة أقوم أجيب بطانية حتى لو شفتها و انا في شهر أغسطس :D

فيلم يوم مر و يوم حلو يخليك مش عايز فصل الشتا ده ييجي خالص عشان السيناريو رابط بين الفقر و الشتا و قسوته و السيناريو بصراحة رائع في النقطة دي.

برد الشتا على فكرة احسن من برد الصيف (الأنفلونزا يعني)، أصلك في الشتا هاتعمل ايه؟ تشرب حاجات سخنة و تتكلفت في السرير و تبعد عن تيارات الهوا، انما برد الصيف ده تشرب له سخن و تتكلفت ازاي و تبعد عن تيارات هوا ازااااااااااااااي؟ :k41:

**MTAK** · 24-10-2008 05:50 PM

الشتاء من احب الفصول الى قلبى

دفا و عفا

و نظرة من ورا شباك لرخة مية هنا و هناك

و جو مغيم كثير بشكل يجعلنى اسرح كبير

و لمة اسرة و احنا صغيرين و كلنا بنتسابق ننزل تحت البطاطين

و شقاوة عيال معفرتين فى المطرة بيجروا زى المجانين

و ليل طويل و معاه سهر جليل

لعاشق ولهان و تلميذ حيران و ساعات كسلان

و ايام و بنعيشها بس يا ريت نعيشها

**OlaOsman** · 24-10-2008 05:55 PM

المشاركة الأصلية كتبت بواسطة Hassan Khalil

لحقتي تعملي موضوع عن الشتا يا علا ؟؟؟؟
دي المطرا لسه مكملتش ساعتين زمن

ماهو الشتا ملهم لية ما أقولكش يعني :D
-------------------

الشتا ...
زيارتين او تلاتة للاسكندرية

ما تفكرنيييييييييييييش.. عمري ما رحت اسكندرية في الشتا.. نفسي مرة أعملها.. نفسي بجد :(

باشوف اهلي اكتر من الصيف

لأ مش فاهماها دي.. انت مش بتزورهم في الصيف ليه؟

الشتا شيااااااااكة في الهدوم ... الصيف بيبقي الواحد طالع من هدومه
الشتا .. روحانيات اعلي .. خصوصا وقت المطر.. او لو مطرت اثناء الصلوات واحنا في المسجد
الشتا .. اكل كتير.. و حركة قليل
الشتا ...جو نقي به لفحة باردة جميلة بعد الفجر ..تستحق التمشية حول الميريلاند او تلاوة الاذكار علي الكورنيش

كله صح إلا حكاية حركة أقل دي.. دي الحركة كلها في الشتا - بالنسبة لي طبعا عشان باعرف اخرج بالنهار اكتر، مش زي الصيف الخروج بالنهار جنان رسمي :k41:

**Mohd_Adel_Amin** · 24-10-2008 05:59 PM

آه بالمناسبة افتكرت حاجة روعة فعلا لو حد من اسكندرية او بيروح هناك في الشتاء ممكن يحس بيها ..

منظر البحر من شارع البحر والدنيا بتشتي بيبقى تحفة .. انا بركن العربية واتمشى على شارع البحر ساعتها والناس كلها بتجري من المطر وبتتفرج عليّا زي الأهبل ..
(لو حد شاف واحد طويل واهبل بيتمشى على شارع البحر في وسط المطر يعرف انه أنا )!!!!!!!!!

**SAbuhashem** · 24-10-2008 06:00 PM

شوارع مضلمه كلها طين ومياه سوداء

كل شويه في المغسله اغسل العربية وفي طابور عربيات طويل

خناقات مع أي واحد يجي يركب معايا العربية علشان لازم أخليه يلمع جزمته من فوق وتحت قبل ما يركب ولو حقعد ساعة مستنيه :)

Thanks
Eng.Sherif Shaker

**2hmed_7osam** · 24-10-2008 06:04 PM

*الشتا من اجمل فصول السنة اللي بحبها :biggrinjester::biggrinjester:

*بحب السواقة ف المطرة جدا:k4:

*وبزأطط :k49:برضو لما اقف ف المطرة انا لسه طالع من تحت دلوقتي الدنيا كانت بتمطر قطع تلج عندنا هنا فمدينة نصر كنت انا وابن عمي بس المجانين الي فالشارع اللي واقفين لوحدينا

*بحب لبس الشتا جدا جدا جدا جدا :D:D

*ويسلام بقا الواحد يبقا دفيان تحت الغطا ومعاه جردل النسيكافيه جمبه يسسسسسسسلام

*وبحب جدا لما انزل الصبح وافضل اطلع دخان ببؤي

ياااااااه ببقا عامل زي الاطفال :D:D:D

*بحب جدا الرياضة ف الشتا بالذات الكورة والاسكواش معرفش ايه علاقة الاسكواش بس بحبه وخلاص:D:D

*وحاجات كتير كتير كتير

*بفتكر سفرياتي لتركيا وسوريا سافرتهم ف الشتا وكانو تح

ححححفة تحفة تحفة :k18:

والله يا علا فتحتي جوايا حاجات كتير

ربنا يرضا علينا كلنا ويغفر لينا وميحرمناش من عطفه وكرمه ونعه الكتيرة علينا

**Hassan Khalil** · 24-10-2008 06:04 PM

المشاركة الأصلية كتبت بواسطة SAbuhashem

شوارع مضلمه كلها طين ومياه سوداء

كل شويه في المغسله اغسل العربية وفي طابور عربيات طويل

خناقات مع أي واحد يجي يركب معايا العربية علشان لازم أخليه يلمع جزمته من فوق وتحت قبل ما يركب ولو حقعد ساعة مستنيه :)

Thanks
Eng.Sherif Shaker

بوظت الشتا !!!!!!!!!!!!!!

-

الموضوع: الشتا بالنسبة لك ايه؟

LinkBack

أدوات الموضوع

عرض

-

-

-

-

المواضيع المتشابهه

جواكت جلد للبيع جديدة بمناسبة الشتا

جواكت جلد للبيع جديدة بمناسبة الشتا

هل الماتور الخفيف مش بينقص زيت فى الشتا

سيارة تسير على الماء هى دى اللى تنفع فى الشتا فى مصر!

بخاخات الزجاج علشان الشتا

الكلمات الدلالية لهذا الموضوع

المفضلات

المفضلات

ضوابط المشاركة