الموضوع: خطأ فى الحساب فى مشتريات من ikea

السلام عليكم ورحمه الله وبركاته
ازيكم يا رجاله وأخباركم إيه
يارب تكونوا فى أحسن حال ........

موقف مش لطيف حصل معايا أمس الجمعه فى أيكيا الموجود فى كايرو فيستفال سيتى- التجمع

كنت أنا وزوجتى وأولادى بنشترى شويه حاجات متنوعه للبيت وروحنا نحاسب عند الكاشير
وطبعا كل حاجه لها كود وحتى نفس الصنف لو اختلف لونه بيكون له كود مختلف .
سامحونى بقى على التفصيل ده بس علشان تتصوروا الوضع عامل إزاى .

خلصنا وروحنا البيت ونزلت مشوار ورجعت بالليل لاقيت زوجتى بتقولى انها
بعد ما راجعت الحاجات اللى اشتريناها لنها كانت اعداد كبيره وطابقتها مع الريسيت لاقيت فى خطأ :

1-من ضمن المشتريات عدد 7 أطباق 4 ألون مختلفه بأكواد مختلفه طبعا لكن بنفس السعر
لاقينا عدد 5 أطباق بس اللى نازبين فى الريسيت يعنى فى عدد 2 طبق الكاشير مسجلهمش
مع العلم طبعا إنه هو بنفسه اللى بياخد الحاجه ويمرر ماكينه الباركود عليها وبعد كده يحطها لزميل له تانى بيغلف الأصناف قبل ما يحطها فى شنط خاصه لو كانت زجاج أو أى شئ قابل للكسر وده نظام المكان والعميل دوره فقط يحط كل الاصناف على السير اللى امام الكاشير ويقف يتفرج .

2- من ضمن المشتريات عدد 6 كاس عصير وده لون واحد وكود واحد لكن لاقينا اللى مسجل عدد 1 فقط
يعنى فى عدد 5 كاس مش مسجلين .

3- تقريبا قيمه الحاجات دى حوالى 250جم

4- السؤال هنا ادفع الفلوس ازاى وطبعا لازم هروح وادفع قيمه الحاجات
اللى اخدناها ومتسجلتش فى الريسيت .


بمعنى انى علشان اروح اقول لخدمه العملاء على الموقف ده
غاليا الكاشير ده ممكن ياخد جزاء أو حتى يمشوه بسبب الخطأ ده
وطبعا اسمه موجود على الريسيت اللى معايا ،
أنا خايف عليه وبقول يمكن كان تعبان أو مش مركز مع انه مش مبرر له
وبسبب الخطأ ده ممكن يفقد وظيفته .

وفى نفس الوقت متضايق على المكان وانه ممكن يخسر بالطريقه دى كتير جدا لو الخطأ ده
حصل من نفس الكاشير او من غيره بالسهو او حتى بالترتيب مع اى حد للاسف .

الحل الوحيد علشان ميحصلش مشكله للكاشير ده انى اروح واخد الاصناف دى من جوه المكان
كأنى بشتريها عادى لأول مره واروح على ماكينه الكاشير وتتسجل وادفع الفلوس واسيب الحاجات
وما اخدهاش بس المشكله لو مش نفس الكاشير .
اى حد واقف هيقول عليا انى مش طبيعى
فى حد هيدفع فلوس حاجه ويسيبها ويمشى !


أفيدونى أفادكم الله