الموضوع: اتفرجت على الجراند اي تن في غبور ... واليكم التفاصيل

مبدأيا انا اسف جدا مكنش معايا الكاميرا عشان اصور ... انا دخلت المعرض بالصدفة ومكنتش مرتب انى ادخل ... هحاول اروح تاني واصورها وابقى انزل الصور

المكان: معرض غبور اوتو في عمارات العبور صلاح سالم
قعدت مع أ/ أندرو أديب مدير الفرع لان بتوع المبيعات مكنوش عارفين يجابوا على اسئلتي :) :) :)
العربية الموجودة كانت الهاى لاين الاوتوماتيك لونها نبيتي وسعرها الرسمي 106500

الانطباع الاول عن السيارة كشكل جيد جدا جدا ... أفضل بكتير من الاتراج والسويفت والديزاير ... تقدر تقول نسخة مصغرة من الار بي

الصالون: مش هقول واسع جدا لكن الصالون مقبول من ناحية الوسع ... الكرسيين اللى قدام المساحة قدامهم كويسة جدا لكن الكنبة الخلفية ضيقة شوية ... واحد طويل زي حالاتى هيكون قاعد متضايق شوية ... نقدر نقول صالون الفيرنا اوسع منها

خامات تقفيل الصالون: الخامات جيدة جدا والتقفيل كويس اوى ... معرفش باقي الفئات هيكون عامل ازاى ... اماكن الزراير والطارة ولوحة العددات والتكييف شكلهم شيك وافضل من سيارات منافسة كتير... فيه اماكن تخزين كتير في الابواب وبين الكراسي وفي الدرج

شنطة العربية ... مفيهاش زرار تفتحها وانت واقف ... لازم تتفتح من جوه الصالون او تتفتح بالمفتاح ... حجمها كويس بالنسبة لعربية بالحجم ده ... سألتهم هي كام لتر معرفوش لكن بالنظر كده هي مش اقل من 300 ومش اكتر من 350 لتر .. في جميع الاحوال هي اكبر من شنطة الفيرنا

حوض الموتور ... مفيهوش اى اختراع .. لكن حجم الموتور صغير :) :) :) حتى اول ما فتحت الكبوت قلت ياختي كاميلة :) :) :) هم بيأكدولى ان الموتور 1250 سي سي مش 1200 حتى وروني ورق العربية المعروضة مكتوب فيه 1248 لتر ... الحوض منظم وكل حاجة واضحة فيه ومش ضيق لان كل العناصر المحطوطة فيه حجمها صغير ...

ارتفاع السيارة ... العربية واقفة على الارض كويس زي ما بنقول ... وقفتها حلوة ... ارتفاعها كويس اوى عن الارض نفس ارتفاع اللوجان القديمة تقريبا ... واهم حاجة ان الشكمان مش باين من ظهر العربية زي عربيات كتير ... الشكمان مستخبي وزوره متني ونازل على الارض ومش باين من ورا العربية

العربية نزل منها دفعة واحدة 600 عربية خرجوا من الجمرك والتسليم هيبدأ من يوم 10 اكتوبر لحد 15 اكتوبر للدفعة الاولى

العربية نازلة ب 6 الون بس وهم (الاسود - الفضي - الفيراني - البترولي - الابيض - النبيتي) ... والصالون نازل بلون واحد بس وهو الاسود ومش نازل منها بيج

سألت ليه مش بتنزل بabs و airbags كان الرد ... ان فيه عملاء كتير في مصر مش بيحبوا الاير باج عشان تكلفة الاصلاح عاليه ولو كانت نزلت بالحاجات دي كان ثمنها هيقرب من ال 118000 وساعتها كانت الاكسنت الار بي هتتضرب ومفيش اى نية تنزل منها فئات اعلى عشان السعر ميزدش :) :) :) أل يعني كده السعر حلو

سألت عن حكاية XCENT و I10 GRAND دول ... قالولى هما هما نفس العربية لكن الاكس سنت انتاج هيونداي تركيا والاى تن انتاج الهند ... ومنزلوهاش مصر بالاسم الاكس سنت عشان ميحصلش لخبطة بينها وبين الاكسنت

ده كل اللى حصل :) :) :) وشكرا

اعتقد اه هيبقى كويس جدا ....