الموضوع: استشارة عاجلة : بتكهرب فى وجهى وأنا نايم

بسم الله الرحمن الرحيم

الحالة اللى عندى باختصار :
من حوالى سنة أو أكتر بتصيبنى كهرباء شديدة فى وجهى وفمى وأشم رائحة شياط أو حريق فى أنفى وأشعر إن فى فيه حاجة تقيلة داخل دماغى من الأمام ، وأعزكم الله ، فمى بيبقى فيه تشنج وببقى عاوز لا إرادياً أبصق اللى فى فمى ( أنا آسف على الوصف ده ، بس مش عارف أوصف كويس ) ، وفى مرة من المرات القريبة فمى فتح لوحده وبصق لوحده على السرير ، أقوم مفزوع من النوم وأقف على رجلى قفزاً من فوق السرير فى خلال جزء من الثانية ، أنا كنت شاكك إن المشكلة من اللابتوب لأنه كان بجوار السرير ففصلت الكهرباء منه قبل ما أنام ، وبعدين رجعت نفس الحالة بعدها بفترة فشكيت إن المشكلة ممكن تكون من اللحاف الفيبر والمخدة الفيبر غيرتهم لأننى قلت ممكن تكون كهرباء استاتيك ، وبعدين امبارح نفس الحالة رجعت تانى من غيرهم ، والموضوع كل مدى بيزداد قسوة .

برجاء الإفادة ، أنا خايف تكون فيه مشكلة كبيرة

سبحانك اللهم وبحمدك ، أشهد أن لا إله إلا أنت أستغفرك وأتوب إليك

المشاركة الأصلية كتبت بواسطة abdoumahros

لو كنت عملت تركيبات اسنان او حشو ضرس من انواع مختلفه اقصد نوع المعدن المستخدم في التركيبات او الحشو فده ممكن يسبب كهرباء في الفم
بمعني معدنين مختلفين وبينهم سائل قلوي ( اللعاب ) كده بقا في الفم بطاريه كافيه لتوليد تيار كهرباء ضعيف لكن يكفي لحدوث مشاكل

احتمال برضه
بس الحالة كانت بتيجى لى قبل الحشو بفترة كبيرة قوى والحشو أنا لسة عامله يدوبك من كام شهر وعملته كله نوع واحد عند نفس الدكتور فى نفس اليوم لأن الضروس اللى فوق واللى تحت كانت لازم تتحشى .
على العموم أنا كان عندى دور برد من يومين بسبب النوم تحت المروحة ( مروحة سقف على فكرة لأنى أنا خفت من المروحة المكتب يكون سلكها معدى قريب منى ولا حاجة) وبعدين رحت كشفت ، فقلت للدكتور على أعراض البرد الأول وبعدين لما قاس الضغط قالى باللفظ كده (إيه ده ياراجل ، قلت له خير يادكتور الضغط ماله ، قال لى الضغط بتاعك منخفض للغاية 80 / 40 لازم تعلق محاليل ) المهم قلت له يا دكتور أنا بتكهرب وأنا نايم بالليل وحكيته له ، لأنى أنا فكرت وقلت فى نفسى كده طالما الضغط ضعيف وأكيد الضغط بيضعف وأنا نايم يبقى أكيد الجسم بيعمل رجفة أو كهربة علشان يصحى وميدخلش فى حالة موت حسب ما قرأت على النت زى كده الرجفة اللى بتيجى فى الرجل والجسم بس أنا عندى بالكهربة ، بس هو خدها بهزار وقالى ياعم البلد ما فيهاش كهرباء