تجربة قيادة النيو كارينز و مقارنتها بسيارتي الحالية
هذا الموضوع يوضح وجهة نظري فقط وقد تتطابق او تختلف مع الاخرين ولا يمس اي شخص بذاتة.
سقت النيو كارينز مشوار كبير واليكم الاتي :
العربية ما شاء الله كعرض داخلي عريضة اوسع بتاع نص شبر من جوة ولاحظت برضوا ان الابواب من الداخل رفيعة قوووي عكس باب الكروز تقريبا ضعف التخانة.
الكراسي لو رجعت للاخر بتضايق اللي ورايا ودة عشان الصف التالت مدينلة مساحة فواكل من مساحة الكنبة
الكراسي الاخيرة لطفلين 6 سنوات بالكتير.
الباور المفروض كهربا بس بنفس خفة الكروز مش عارف اذاي.
مساحات الاضائة رائعة و العربية منورة من جوة ودة مديها وسع نفسي زيادة.
نيجي بقي للمفيد
كموتور ... صغير عالعربية برضوا كنا 5 قاعدين والعربية بتقاوح عشان تجري.
التلاتة اللي ورايا كانوا في وضع ... تثبيت اكتاف ... العرض يدوبك كفاهم.
ال body rolling فظيع ... جسم العربية عالملفات بيميل بعبط مع احساس انها حتفقد ال traction و تبدأ تعمل over steering من ورا .. يعني الضهر يلف اكتر من المقدمة ولولا اني متعود عالحركة دي في الكارينز القديمة كانت لفت.
لما حسيت بالرولينج دة وانا عالملف لمست الفرامل لقيت المقدمة مالت جدا عكس اتجاة الدركسيون و عكس اتجاة الملف و اللي معايا في العربية صرخوا !
للعلم مكنتش واخد الملف جامد يدوبك 70 و للعلم الحمد لله الكروز بتاخدة علي 120 like a boss !!
ملحوظة ... فرامل الكروز في الملفات مش بتوقع بودي العربية ذي الكيا.
قرصت شويتين وقلت اشوف الفرامل علي ال straight ... و لحسن حظي الطريق قفل و كابس علي الفرامل بس مش واقف عليها ضاغط يعني جامد حبتين ... لقيت ان الفرملة مش كافية ضغطت زيادة علي نفس الوضع الفرملة لم تزيد و حسيت البدال اتحجر تحت رجلي مع برضوا نفس صراخ اللي معايا و حنلبس يا شهدي
لقية بركز علي دي ... عشان يوميها اتأكدت باهمية معزز الفرامل او ال brake boost assist اللي في الفرامل البوش بتاعت الكروز.
عندنا لو كابس واحتجت تضغطت اكتر الفرامل حتكلبش العربية في الارض ودي مش موجودة في الكيا
جربت تاني ال brake boost ودي حتلقوها عندنا ... اقولك تجبها اذاي
جرب دوس فرامل بشويش لحد مدي معين و جرب تاني نفس الدوسة لنفس المدي بس بسرعة فائقة كانك مخضوض ... حتلاقي الفرامل اتحولت وبقت جامدة جدا ماشاء الله .
دة مش موجود في الكيا.
بدال بنزين الكيا طالع من الارض و قاعدتك زاوية قايمة بمعني الكلمة .. يعني رجلك الشمال لو عايز ترفعها لفوق مش حتعرف الا لو جبت صندوق ترفع علية رجلك ودي ممكن متكونش مشكلة لبعض الناس.
نفس شكوتي القديمة متغيرتش علي الرغم اني كنت مقرب الدركسيون للاخر ... الدركسيون بعيد جدا و فارد دراعك completly عشان تطولة مع ميلان الضهر.
نيجي للعفشة ... ببساطة ذي كل الكوري بترزع .. تحس ان البودي كلة بيخبط في بعضة ... حتي الازاز وهو بيقفل للاخر بيرزع كانة بيخبط في صاج.
ببساطة العربية حتوصلك من النقطة أ الي النقطة ب فقط وتلم كل العيلة. يعني مش حتنزل من البيت مبسوط انك حتسوق العربية لأ نازل تعمل مشوار و خلاص (احساسي) .
كواليتي الانتريور حلو و طري لكن بالرغم من كدة مقدرش يمنع الطقطقة و الاصوات من التابلوة.
في النهاية احب اقول ...
الحمد لله اني تمسكت بالكروز و مجبتش الكيا السيراتو او الكارينز ... لان الفرامل و ال over steering و النشوفية و الطقطقة حتبقي هي هي لنفس تطابق المكونات .