السلام عليكم ورحمة الله وبركاتة
انا معايا سيراتوا 2014 خليجى فتحة سقف و abs و شوية حاجات تانية كدة من شهر 3/2014 وعامل لحد انهاردة 600 كم
المهم ملاحظاتى على السيارة
1. التيل اللي ورا بيزيق بعد موصلت لحد 3000 كم تقريبا قلت اكيد وساخة رحت عند ميكانيكي وقلي فعلا وساخة وفتح لقا في رايش كدة مطرح ما التيل بيتاكل المهم نظف وسنفر ... العجلتين اللي ورا واخد 30 ج ومشيت
بعدها باسبوع او عشر ايام كدة رجع نفس الصوت
نسيت اقولوكوا اني سالت الراجل دة من اية قلي اصل التيل دة ناشف ووحش .... يا عم الحج دة بتاع الفبريكة قالي واية يعني .... هههههه لا حول ولا قوة الا بالله .... يا اما بيفتى زى ما احنا متعودين من اغلب الصنايعية يا اما كلامة جد الله اعلم
المهم العربية دلوقتي عاملة 6000 وكل ما افرمل اسمع احلي تزييق
فالظاهر ان دي مشكل عامة لان واحد جاري في الشارع جاب سيراتوا بردة وبعد شهرين كدة لقيتة وهو بيركن بردة عمال يزيق هههههههههه .... قلت اهلا انت وصلت كدة محدش احسن من حد
يا تري الحل اية نسيب التيل لحد ما يخلص ونغيرة ولا كدة التنابير تبوظ
2. موضوع السخونية دة فعلا انا لاحظت الحكاية دى من ساعة ما جبت العربية فى سخونة من جنب دواسة البنزين فى حتة مفتوحة وفيها حديد لونة اسود كدة بعد شوية من المشى والحر الحديد دة بيسخن جدا اكنة بوتاجاز والله .... بس الموضوع دة معرفش الصراحة قل ولا نا اتعودت على السخونية دى بس انا شايف هنا الناس بتقول ممكن يتعزل ب 50 ج اشوف واجرب .... بس دة مش مواسير التكيف السخن لأن التكييف السخن مش بيسخن الا لو انت لفيت البكرة على الاحمر حتى لو مش مشغل المروحة بيبدا هو يسخن واول متشغل المروحة الهوا بيطلع سخن فانا اعتقد ان التكييف السخن ملوش دعوة وخصوصا ان البكرة عندى على الازرق على طول من ساعة مجبت العربية.
3. انا ملاحظ ان استهلاك البنزين عالى شوية وسط البلد مع التكييف ال20 لتر مش بتكمل 200 كيلوا انا مشوارى كل يوم مدينة نصر وسط البلد رايح جاى..... ميكروباص يعني ....هههههههه ..انما على الطرق السريعة انا من اسبوعين رحت اسكندرية ورجعت المشوار كالتالى فولت من الزمالك وبعدين اسكندرية - لحد ميامى ورجعت القاهرة - مدينة نصر دائري - المشوار كلة حوالى 500 كم واتبقى فى التنك الربع .... اعتقد ان دا استهلاك كويس وخصوصا كنت ماشى على سرعة من 100 الى 160 حسب الطريق....
4. ثبات العربية كويس لا تعليق
5 لو حد راكب جنبى و 2 ورا على الكنبة .... العربية بتسلم على 90 % من المطبات على الرغم انى نافخ الكاوتش على 32 زى الكتالوج ما بيقول ...
6. بالنسبة للصاج مرة قطة نطط من صور عالى على السقف للاسف السقف حصل فية تقويصة بسيطة..
7. ودى حاجة مضيقانى اوى ان العربية من جوة بتلم تراب يعنى لو راكن العربية وانا فى الشغل ارجع اجد التابلوة علية وبرة خفيفة من التراب بالرغم من انى قافل الزجاج كويس وكمان قافل فتحات التكييف من الزر الخاص بدخول الهواء من الخارج.
8. موضوع مثبت السرعة ممتاز خصوصا فى السفر بيقلل استهلاك البنزين بدل متفضل مثبت رجلك على الدواسة.
9. بالنسبة للبلوتوث حاجة بردة مضيقانى وانا بتكلم من العربية دايما اللى بكلمة يقولى الصوت بيقطع انا معايا موبيل ميجا معرفش العيب من بلوتوث الموبيل ولا بلوتوث العربية...
10. انا مركب فى العربية وحدات رفع زجاج وكمان جهاز gps tracker علشان اشوف مكان العربية من على النت .... وكمان ركبت جهاز انذار على الرموت بتاع العربية علشان لما افتح واقفل تعمل صوت وكمان لو حد خبطها فى الشارع تعمل صوت وموصل الانذار دة على الكلاكس ... علشان الانذار اللى فيها مش بيعمل صوت الا لو الباب اتفتح بس ... ومغير الكالاكس ومركب نوع اسمة .... فيام ... بتاع ال bmw لانى دورت على ..... الطاط ..... فى شارع زكى لم اجدة
11. عاوز اغير الكاست بتاعها علشان انا بحب الصوت العاليى والحركات دى واركب كاست تاتش بس مش لاقى غير صينى اللى يركب عليها ووللاسف كل الاسف البيونير حبيب قلبى لو ركب التحكم فية من التارة مش هيشتغل اعلى اوطى اغير القنوات كدة يعنى.
12. موضوع التحكم فى الباور دة ممتاز 3 اختيارات طبعا جوا البلد عاملة comfort ... وعلى السرعات وانا مسافر بخلية sport بحس ان العربية راسية شوية مع الجرى فوق 140كم
13 بالنسبة لشكل التابلوة والاضاءة هى مش وحشة بس انا حاسس انها تقليدية يعنى من وجهة نظرى شايف ان شكل التابلوة بتاع الموديل اللى فات اجمل وخصواصا اللون الاحمر دة جميل جدا .... طبعا دا مش عيب ولا حاجة دى مجرد اذواق.
طبعا يا جماعة اوحش حاجة بجد انى اجيب العربية بسعر 159 الف جنية خليجى ومش اعلى فئة كمان والموديل اللى قبلها على طول كانت اعلى فئة سمارت كى عامل 142 الف جنية .... طبعا دى خيبة
اتكلمت معاكوا باستفاضة وعن تجربة شخصية ولم ابخل باى معلومة ولو حد عندة ملاحظة يحكى معايا
والسلام ختام
المفضلات