الموضوع: محتاج خبرتكم يا جماعه

المشاركة الأصلية كتبت بواسطة smoke_vfx

هى اسعار الكبالن للفليشيا وتركبيهم كام يا جماعه وتظبيط العفشه من جلد وكاوتشات وكده وسعر الزجاج الامامى كام وعداد السرعه لو مش شغال هو وعدد لفات الموتور والاكصدام الخلفى والامامى حد يقولى تكليفتهم كام كلهم ضرورى واسف للاطاله.... اه هى سكودا فليشيا 1998

اى خدمة نمسك الموضوع واحدة واحدة::

اسعار الكبالن من 65 الى 130 حسب الجودة والحالة المادية***

الجلد بتاع الكبالن ب25 الجنب يعنى اجمالى 50 جنية***

العفشة ياريت تقولنا اى مشاكلها علشان نقدر نحدد سبب المشكلة مقص مساعد اسكترا خلافه***

الزجاج المامى انا ركبته لفيفورتى من سنتين كان 295 جنية اليوم معرفش اسعارهم ممكن تتصل بجريش فى العاشر من رمضان وتعرف الاسعار****

عداد السرعة ممكن تكون مشكلة ترس السرعة اللى فى الفتيس وممكن يكون واير السرعة وممكن يكون ترس المناول اللى فى العداد نفسة ودا اللى كان عندى وللاسف غيرت الطابلوه بالكامل
وممكن تجيبة استيراد ب 250 الى 350 جنية انتا وشطارتك**

ازاى عداد الار بى ام مش شغال شوف كهربائى ممكن يكون سلك الموبينة مش واصل وممكن يكون العطل فى العداد نفسه وممكن يكون السوكت اللى فى الطبلوه مهزوز**

هو حضرتك لسة شارى العربيه دى ولا ايه ؟؟؟؟؟؟؟؟؟؟

المشاركة الأصلية كتبت بواسطة smoke_vfx

هو ان شاء الله المفروض انى هاشتريها عربيه سكودا فليشيا 98 صاحبها قالى ان الحاجات دى العربيه محتاجاها انا روحت شوفتها العربيه حالتا ككل حلوه جدا بجد لكن محتاجه اللى انا كتبته ده فاعاوز اعرف انا تقريبا هاصرف كام عليها فوق سعرها صاحبها للامانه شاب محترم جدا وصريح المفروض انى ان شاء الله بكرا هاروح انا وميكانيكى نبص عليها برضو

بص عليها الأول واكشف على الموتور لانى بجد خايف من العربية دى**

المشاركة الأصلية كتبت بواسطة smoke_vfx

ليه خايف منها ؟
هو الموتور جديد هو لسه مغيره وبصراحه سحبها حلو جدا هو بس صوته عالى شويه بس ممكن حضرتك تقولى ايه مصدر خوفك لانى خبرتى على قدها اوى فى العربيات وانا حمتاج عربيه للسفر الكتير يعنى اسافر بيها كل اسبوع وبقالى فتره بجمع المعلومات الكافيه عن الفليشيا وانا حاببها العربيه اللى بقول لحضرتك عليها مش راشه لا دواخل ولا خارج وهو لسه مغير المساعدين هو قالى على الحاجات اللى قولت عليها دى الكبالن وحاجات فى العفشه زى الجلد وكده انما بيقولى المقصات تمام والمساعدين هو جايب مساعدين جداد والزجاج الامامى فى شرخ فانا اللى عاوز اغيره اه ومساعدين الشنطه الخلفيه وعداد السرعه وهو قالى مارضتش اعمله لانى مش عاوز ابهدل التابلوه وكده انما مؤشر الحراره شغال والوقود اه والاكصدام الخلفى والامامى انا حابب اغيرهم تنصحنى بايه ؟

على بركة الله العربية عموما موتور وصاج والباقى سهل تغييرة عادى اكشف على الموتور واكشف على الصاج والاهم الاعتاب بتاعة العربية وفصص صاج العربية حته حته لو فيها برومة فى الصاج يبقى كدا حتصرف معاك كتير انما الشغل اللى حضرتك بتتكلم عليه فى راس الموضوع غايته 1500 جنيه بالمصنعية دا لو حتغيير فلاتر وسير الدينمو كمان**

بالنسبة للاكصدمات انصحك لو حالتهم تمشى امشى بيهم عادى لأنك مش حتلاقى زى الاصلى والاستيراد مش حيبقى نت النت برضو حيبقى فيه شروخ انما انتا ممكن ترجع الاكصدامات زيرو وديلهم لبتاع الفيبر جلاس حعملهملك
ويرجعهم زيرو والتكلفة بسيطة**

المشاركة الأصلية كتبت بواسطة smoke_vfx

استاذ sakr_skoda
الف شكر اهتمامك بجد وهاقول لحضرتك اللى حصل النهارده انا خدت سمكرى كويس وميكانيكى اعرفه بتاع سكودا وقابلنا صاحب العربيه الاتنين مسكو العربيه نفضوها فوق وتحت فلوها الميكانيكى قالى المكنه ماشاء الله عليها قالى بس الفتيس من تحت فى حاجتين بساط انا مش فاكر اسمهم هايتغيرو قالى حاجات بسيطه والسمكرى قالى العربيه دى الماظ ماشاء الله فبريكه لا برومه ولا بهدله وتمام فعلا كلام صاحب العربيه اللى قاله طلع مظبوط كل الشغل فى العفشه مش اكتر وبجد ارتحت جدا وكنت مبسوط لانى اطمنت الحمد لله ... بس هو حضرتك ممكن تقولى موضوع الاكصدامات ده اعمله فين بالظبط لانى مش عارف لانه فعلا خساره حتى صاحب العربيه قالى حرام عليك اوعى تغيره ده الاصلى بتاعها مش هاتعرف تجيب زيه بس نفسى انضفها واهتم بيها بجد ان شاء الله حضرتك قولى اعمل موضوع الاكصدامات ده فين واجيب قطع الغيار منين مع العلم انا من بولاق الدكرور محافظة الجيزه فياريت تقولى اتعامل مع مين من بتوع قطع الغيار لو تعرف واسف انى طولت عليك بس انا مستجد ومحتاج خبرة حضرتك والاخوه فى المنتدى وبصراحه الناس هنا قمة التعاون ودى حاجه انا حاببها جدا

مبروك مقدما على قولك وكلامك بسم الله مشاء الله سيارة تحفة خلص فيها واتوكل على الله واللى فيها حاجات بسيطة زى ماقلت لحضرتك العربية موتور وصاج فقط**

بالنسبة للفتيس اعتقد انك حتحتاج تغير اولسيهات الكبالن الداخلية واولسية المدفع ودى حيتغير وانتا بتغير كبالن خارجية عادى جدا****

بالنسبة للاكصدامات اصل اى سواق ميكروباص او تاكسى او اى سمكرى على بتاع الفيبر جلاس وإن شاء الله ربنا يعطرك فى واحد صنايعى ابن حلال*

للاسف انا من الاسماعيلية فمش حقدر ارشد حضرتك تتعامل مع مين ومتتعملش مع مين بس احنا هنا فى القسم بنتبنى سسلف هلب سلف يعنى بالبلدى اعمل حاجتك بايدك فلو تم الشراء سوف نعلمك كيف تقوم باصلاح اعطال سيلرتك بنفسك وخليك معانا تابعنا اسالنا احنا مش حنكل من كثرة الاسئلة وحنشرحلك اسباب المشكلة وازاى تحلها بنفسك ومبروك مرة تانيه*****