الموضوع: ال c180 محيراني بعد ما استقريت علي الاوكتافيا

يا جماعة ياريت تفيدوني انا كنت استقريت علي الاوكتافيا بس ال c180 w203 مش عارف اشيلها من دماغي وكل ما اسال حد يقوللي دي عربية كانك فاتح بيت تاني عشان قطع غيارها وصيانتها غالية مع العلم ان مفيش حد منهم معاة العربية دي وانا بصراحة مابحبش اسمع كلام عن دون تجربة فياريت تفيدوني هل لو حصل نصيب ولاقيت واحدة c180 موديل 2003 او 2002 حالة كويسة هتزهقني في مصاريفها وقطع غيارها ومصاريفها عموما وهتحتاج ميزانية لوحدها فخدها من سكات واخلليني في الاوكتافيا ولا في امل اشتريها واعرف اصرف عليها

ال w203 كعربيه حلوه مفيش كلام انما العبره بالحاله يعني دلوقتي اللي حضرتك بتدور عليها هيبقي بقالها ١٣ او ١٤ سنه و عداد كيلومتر اكيد عالي و قطع غيار اي ماكينه في الدنيا مهما كانت صناعتها ممتازه بيبقي ليها عمر افتراضي بيبقي مرتبط بسنه الصنع و احيانا عداد الكيلومتر او معتمد علي الاتنين معا و ممكن يكون المالك اللي قبل حضرتك ملتزم بالصيانات في مواعيدها بقطع غيار اصليه و احتمال لأ اعتمادا علي انها عربيه ألماني يعني معمره و مش ممكن تبوظ و احتمال تكون صاحبها مشتريها من واحد تاني مكنش ملتزم بالصيانات و طبعا زي ما انت عارف ان كله ساعه البيع بيقول دي فابريكه لا تحتاج اي مصروف و الكلام ده بصرف النظر عن الحاله الفعليه. طبعا ممكن يبقي حظك كويس و تلاقي حاجه حالتها نادره فعلا انما حتي برضه لو كده احتمال ان حاجه تبوظ فيها برضه وارد و لابد من العناية الجيده بها علشان تفضل حالتها كويسه و العنايه دي يعني فلوس و مصاريف. علشان كده الناس بتقلق من المستعمل القديم و بتفضل الموديل الحديث حتي لو كان حاجه اقل انما اعتماديته بتبقي اعلي بحكم ان تاريخ الانتاج اعلي بفتره و كمان في حاله حضرتك الاوكتافيا عربيه كويسه كمان يعني مش حاجه تعبانه . نصيحه اخيره لو نفسك في ال c180 يبقي ما تجيبش أوكتافيا لان عمرك ما هتقتنع بيها و حاول تجمع فلوس زياده يجيبولك w203 موديل اعلي يعني أواخر ال انتاج ال w203 يعني 2006 او 2007 او w204 ان امكن طبع علشان تقلل احتمالات المشاكل و تبقي عداد كيلومتر اقل نسبيا