الموضوع: الطريقة الصحيحة لتسقيط الماكينات

السلام عليكم و رحمة الله و بركاته

النهاردة ان شاء الله هنتكلم عن تسقيط الماكينات (انجيكشن كامل – يعني عربية و فيها كنترول)

بقالي فترة كل ما ادخل المنتدى اشوف مواضيع طويلة عريضة اللي مسقط مكنه و اللي المكنه مش مظبوطه و اللي مكنه بترجف و اللي مكنته ما بتعديش 120 و اللي مكنته بتبطل
و كل المشاكل دي ظهرت بعد التسقيط
طيب نفسي افهم اللي بيروح يسقط ده بيروح كدا و خلاص من نفسه على الميكانيكي و لا رايح فاهم هو عاوز ايه !!!
من واقع اللي شفته و قريته في مواضيع كتير ان الناس بتروح تسقط و هي و نصيبها انا هسقط اي مكنه في حته و على ما تفرج
لا احنا هنغير بقا النظريه العجيبه دي و هنبتدي نشتغل على اساس سليم من A ~ Z

تحديد المطلوب

قبل ما اخطي خطوة لتسقيط المكنه لازم اعرف و اتاكد من 3 حجات في عربيتي مهمين اوي
1- لازم اعرف سنة صنع السيارة الاساسي و ده اللي موجود على رقم الشاسيه .
2- لازم اعرف هسقط انه مكنة و هل هتنفع عندي و لا لا – (بتكلم على الشغل اللي بدون اضافات او تعديلات) و ده اللي بنصح به طبعا .
3- لازم اعرف الدفيرة اللي عندي تتوافق مع الدفيرة الموجوده و لا هغير دفيرة .

نمسك بقا نقطه نقطه و نتكلم باستفاضه
اولا : فيه عربيات بتصنع مثلا 2002 و تنزل مصر بعدها بسنتين فا احنا هنتأكد من رقم شاسيه العربية عندنا و ده هيسهل علينا يا هنسقط ماكنه استيراد نفس الموديل في حاله خراب القديمة او هنعدل و هنجيب بديل اعلى في سعة المحرك مثلا و لكن يتوافق مع الدفيرة الحالية او هنجيب دفيرة كاملة من العربية اللي كان عليها الماكينة الجديدة اللي هنسقطها .
ثانياً : لازم نبقا رايحين عارفين هنسقط 1400 ولا 1800 ولا 2000 .... الخ . ليه ؟؟؟؟
هيوفر عليك تلاقي المكنه بكنترولها بالدفيرة على طول ... فا مش هروح اجيب مكنه راكبه على 2002 و يروح البياع جايبلي دفيرة بكنترول من عربية نوع اخر و مختلفة المضمون (دفيرة بره و جوة و كنترول) بس نفس السنة و يقولي هتشتغل ... الكلام ده مش صح خالص
لو هتركب مكنه بولو موديل 2002 يبقا هندور في بولو او ما يوازيها في سيارات اخرى في المجموعة (نفس سنوات الصنع و نفس المضمون) ده علشان ما ادوخش على دفيرة و كنترول و توفيرا للنفقات
على سبيل المثال : معايا توليدو 2003 هسقط مكنة كوردبا 2001 ( هينفع بقا نجيب دفيرة بره بس ؟؟؟ هينفع نجيب دفيرة كاملة ؟؟؟ هينفع نوصل كنترولنا بالدفيرة على المكنة الكوردبا ؟؟؟
الاجابة ايه :
توليدو 2003 الدفيرة مختلفة بنسبة 90% عند الاطراف و الطوال و الحجم عن الكوردبا 2001
كنترول التوليدو 2003 ك (hardware) مختلف في الاصدار و ك (wiring) بردوا مختلف في مدخل التعريف او سوكت التعريف ، كنترول التوليدوا نازل و عليه ريجسيتري متسجل عليه بيانات و خدمات مختلفة تماما عن المتسجل في ريجيستري الكوردبا كما انه لاقدر اركب كنترول التوليدوا ع الكوردبا و لا العكس لاختلاف مداخل الانترفيس .
سيبك من الرغي السابق كله .. اعتبره كان لم يكن ده انا عمله تمهيد للتوضيح
- لما نيجي نسقط ماكينة.. نجيبها بالكنترول ( و ده في حالة ان الدفيرة هي هي الموجوده)
- هتجيب ماكينة و كنترول و دفيرة ( لابد انك تكون حريص ان العربية نفس الحجم في حوض المكنة و داخل التبلوه ) يعني هتفك محتوى العربية الاستيراد و تركبه عندك بالكامل .
- هتجيب كنترول بديل بدل كنترول محروق .. لازم تجيبه يركب على نفس الدفيرة مع عدم تجاهل ( سنة الصنع في المقام الاول و مدخل السوكيت في المقام التاني) لان احيانا بتلاقي كنترول بتاع كوردبا 2001 ما يركبش على دفيرة 2002
الناس هتقولي ازاي ... هرد و اوقوله انا مجرب بنفسي في عربيتي و نفس العربية نفس السنة و السوكيت الانترفيس بتاع الكنترولات مختلفه تماما .. فكنت حريص ان ادور في نفس سنوات الصنع و نفس رقم الكنترول و نفس شكل سوكيت الانترفيس متطابقين كلهم .
( مع العلم كما اوضحت ان العربيتين نفس بعض بالملي المكنة و الدفيرة و الموديل)

اهم حاجه بقا ان بعد ما اسقط و اوصل و كله تمام
اول خطوه اعمله (اوفق راسين في الحلال) يعني ايه الكلام ده
فرضا اني جبت مكنه من سيارة تركب على الدفيرة اللي عندي و جبتلها كنترولها من عربية نوع تاني خالص في المجموعة و الدفيرة اللي كان راكب عليها الكنترول متطابقة زي اللي عندي و وصلتهم اول حاجه اعملها (ابرمج افتراضي) لازم اعرف الكنترول على المكنة لاااااااااااااااااااااااز م
اعمل بقا ده على كل الافتراضات السابقة و التوافيق و التباديل المتاحة كما سبق ذكرة ( بعد تطبيق الشروط السابق ذكرها ايضاً) دون الاخلال بها ، علشان اتجنب عك الميكانيكي او بعض الصانيعية اللي لا يفقهوا شيء في الميكانيكة و بيخربوا بيت الواحد مصاريف .
بعد ما خلاص ركبت الدفيرة على الكنترول و الماكينة اوصل VAS5054 و اعمل default adaptation هيقوم البرنامج قاري الكنترول و يروح معرفة على المكنة مظبوط و يعرفة على التوصيلات و يعرفة على ( مثبت سرعة او EGR او ABS او immobilizer او..... الخ) اللي احنا كلنا ماشاء الله حفظينها .

كدا ان شاء شغلنا هيبقا تمام التمام و مش هنعاني و حد يجي يقول انا قرفت من العربية .. انا هركب طيارة انا هرمي نفسي في الترعة .. و الكلام المحبط اللي ليس له اي معنى .

يا شباب اتوسل اليكم ... علشان نتفادي الاعطال المتكررة بعد التسقيط .....كل مره تسقط ماكينة او تركب كنترول

(الــــــبرمــــــــــجة)




الجزء الثانى من الموضوع

http://www.nilemotors.net/Nile/440800-2.html