الموضوع: رأيكم يهمنى جدا ً لأنى فى حيرة

المشاركة الأصلية كتبت بواسطة moumen_hs

الكروز الجديدة كورى بالكامل تحفة فنية بمعنى الكلمة شوفها واحكم بس هى هتعدى150 الف اخر مرة شفتها فى منصور كانت بالسعر دة من شهرين بس عالم تانى وعلجو موضوع الفتيس الى كان فى مشكلة

حاضر إن شاء الله أبص عليها و أشوف سعرها كام شكرا ً لإهتمامك بس لو فى السعر ده ممكن تدخل السيراتو كمان ؟

المشاركة الأصلية كتبت بواسطة ramiabbas

انا معايا العربية بقالها حوالي سنة و 7 شهور ... و عن تجربتي الشخصية ما ندمتش في حياتي على اي حاجة غير شراء العربية دي ... و اقسم بالله العظيم انا حاسس دلوقتي اني راكب قطعة خردة مجمعينها على انها تبقى عربية و خلاص ...
و للامانة الموتور سحبه كويس و العفشة ناعمة دي ميزة العربية
العيوب بقا ...
بلي عجل بيبوظ مع نفسه و بدون سابق انذار و اقسم بالله تاني ركبته في الضمان و طلعت بالعربية بعد 3 ايام بالعدد باظ تاني و لما رجعت لهم رفضوا يغيروه
تيل فرامل هيتغير كل 8:10 الاف كيلو كأقصى حاجة
الطنابير مش هتستحمل معاك فوق ال 30 الف كيلو و لازم تتغير بعد كده
العربية فوق ال100 كيلو بتبقى هي و ورقة الشجر في الهوا بنفس القدرة على الثبات ثبات زي الزفت إلا لو العربية فيها ال 5 افراد هتبقى ثابتة
التوكيل التعامل فيه كأنك رايح تاخد منهم صدقه ... المعامله زي الزفت و العربية بتدخل بعيب بتطلع بنفس العيب

=================
انا انصح حضرتك تشوف اي عربية تانية .. البيجو على حسب ما شفت في المنتدى هنا انها فيها مشاكل في الفرامل بردو و التوكيل بتاعهم زي الزفت ... في نفس الفئة حضرتك ممكن تلاقي الستروين الأليز لكن انا شخصيا ما اعرفش هل عربية كويسة و لا لأ .. لكن خلاصة القول عشان فلوسك اللي تعبت فيها ما تندمش عليها بلاش العربية النيسان الصني دي خالص
و ربنا يوفقك في الاختيار .

أنا مش عارف أقول لحضرتك إيه غير إنه ربنا إن شاء الله يعوض عليك بحاجه أفضل و يجنبك شرها يا رب و شكرا ً جدا لإهتمامك و مشاركتك و إن شاء الله أبعد عنها و استفدت كتير منك شكرا ً

المشاركة الأصلية كتبت بواسطة hatahet

بص يا كبير البيجو اسوء مافيها التوكيل ناس كتيير اشتكت منه تانى حاجه الكبوت فوق الاكصدام مباشرة يعنى الصدر قصير و اى تريحه قدام بتاثر علي الكبوت دا غير ان اماكن الاوبشن متغيرة
و الاكسنت هربيه جميله و كويسه انا مسمعتش عنها مشاكل كبيره و كفايه ان توكيلها مع غبور
النيسان مشاكلها كتير زى الفرامل و العفشة نشفه شويه و تقفيلها بيكون فيه مشاكل

شكرا ً جدا لإهتمامك طب يا ترى حضرتك تنصحنى بإيه ؟

المشاركة الأصلية كتبت بواسطة د.عماد صلاح

اوبترا قديم .....نيسان قديم ....بيجو 301 ..بالترتيب لو بتلعب في من 120 الف الي 130 الف
شارك فئه تانيه ....كروز ....بيجو 301 هاي لاين لو بتلعب من 140 الي 150

شكرا ً جزيلا لإهتمام حضرتك .. يا ترى هيونداى أكسنت Rb و ريو و سيراتو أول فئه تدخل معاهم ولا لأ و حضرتك تفضل أنهى بشكل عام ؟؟

المشاركة الأصلية كتبت بواسطة ahmed_selmy

انا مش عارف الناس بتشتكى من الثبات ولكن للعلم انا كنت بشد انا وواحد صاحبى انا بالتيدا وهو بالنيو صنى الهاى لاين....واحنا الاتنين كنا مشغلين التكييف وماشيين على 190 كم/س على طريق السخنه واخدنا تقريبا الطريق كله كدا ....وبسم الله ما شاء الله العربيه كانت ماشيه 100100 ولا اى حاجه ......مش حنكر ان الواحد بيكون مقلق بعد ا140 بس حستش خالص ان هو كان بيعوم او بيتمرجح على الطريق.

التيدا أفضل من الصنى على حسب معلوماتى كموتور و كعفشه و ثبات و أداء و كل حاجه تقريبا ً و يا ريت تفيدنى بمعلومات أكتر عنها و يا ترى لو حبيت أجيب تيدا 2010 تكون فى حدود كام ؟

من واقع تجربتي بلاش النيو صني واحد صاحبي معاه النيو صني و انا باخدها منو كتير العربيه صاج ضعيف اي خبطه بتأثر فيه و ثبات لحد ال 120و مش بتاعت غرز و الكلام داه نهائي هي عربيه عائليه جدا و ك مجمل هي عربيه مش وحشه بس العربيه ليها مميزات برضوا
1-عفشه ناعمه
2-استهلاك بنزين قليل
3-واسعه جدا من ورا
4-صيانه سهله جدااا
الاربع حجات دول تتفوق فيها نيو صني عن بيجو 301 , مع العلم ان بيجو 301 كويسه جدا و مسمعتلهاش مشاكل كتير و بتحاول تثبت نفسها في السوق المصري, و لو حضرتك بتفكر في الهاي لاين ما بين الاثنين فا البيجو 301 الهاي لاين فيها اوبشنز اكتر زي فتحه سقف مثلا و شكلها احلي من النيو صني (اختلاف ازواق) و برضوا خضرتك اسأل في قسم بيجو عن بيجو 301 اكيد هايفيدوك عن العربيه اكتر. بس من وجهه نظري بيجو 301 احسن من نيو صني و في الاخر كل عربيه فيهم فيها ميزه بتتفوق بيها علي التانيه مثلا ثبات البيجو 301 احسن من نيو صني فشوف حضرتك ايه المميزات اللي انتا عايزها
و بناء عليه هتعرف تقرر تشتري انهي عربيه فيهم