الامطار والمياه العميقة

**iunknown** · 25-10-2008 02:16 AM

نظرا لأن خبرتي في ميكانيكا/كهرباء السيارات لا تزيد عن معلوماتي في فيزياء الجوامدكنت عايز اسأل خبراء المنتدى عن تأثير القيادة في مياه عميقة (نوعا ما) على السيارة وما هو العمق الذى لا يصح ان تغوص فيه بالسيارة .

شكرا مقدما

**xylola** · 25-10-2008 02:26 AM

طب في حالة لو لقيت نفسك فجاة في نص المياة المفروض هتعمل ايه؟؟؟؟

1- تتققل العربية و تشمار وتنزل تعومممم؟؟؟؟ طب اللي مبيعرفش يعوممممم!!!!!!!!

2- تقفل العربية وتنتظر على جانبك لحد لما تلقي مركبة جانبك معدية تروح ناتط فيها!!!!!!

يبقه لازم مع قانون المرور الجديد و مع وجود المثلث والشنطة ضرورة وجود عوامة او لايف جاكيت لعدم الوقوع فى ظروف بحرية

**waled369** · 25-10-2008 02:30 AM

المشاركة الأصلية كتبت بواسطة iunknown

نظرا لأن خبرتي في ميكانيكا/كهرباء السيارات لا تزيد عن معلوماتي في فيزياء الجوامدكنت عايز اسأل خبراء المنتدى عن تأثير القيادة في مياه عميقة (نوعا ما) على السيارة وما هو العمق الذى لا يصح ان تغوص فيه بالسيارة .

شكرا مقدما

طبعا مفيش حاجة اسمها تسوق في مياه عميقة لأنك مش سايق غواصة أي مستوى من المياه تبعد عنه فورا اثناء القيادة و ارتفاع الميه ممكن يعمل مشاكل كتير

**iunknown** · 25-10-2008 02:34 AM

المشاركة الأصلية كتبت بواسطة waled369

طبعا مفيش حاجة اسمها تسوق في مياه عميقة لأنك مش سايق غواصة أي مستوى من المياه تبعد عنه فورا اثناء القيادة و ارتفاع الميه ممكن يعمل مشاكل كتير

يا استاذ وليد انا مش قصدي اني انزل بيها البحر طبعا

انا اللي اقصده حاجة زي للي حصلت النهاردة

الطريق خلاص بقة فيه ميه بعمق حوالي 20 سم والعربيات ورايا يعني مش هقف في نص الشارع يعني

انا قصدي ايه تأثير حاجة زي دي على العربية وايه اللي لازم افحصه

**waled369** · 25-10-2008 02:39 AM

المشاركة الأصلية كتبت بواسطة iunknown

يا استاذ وليد انا مش قصدي اني انزل بيها البحر طبعا

انا اللي اقصده حاجة زي للي حصلت النهاردة

الطريق خلاص بقة فيه ميه بعمق حوالي 20 سم والعربيات ورايا يعني مش هقف في نص الشارع يعني

انا قصدي ايه تأثير حاجة زي دي على العربية وايه اللي لازم افحصه

طالما العربية لسه شغالة و مطفتش خلاص مفيش مشكلة بس قصدي ان حضرتك تبعد عن أي مكان متغطي بميه لأن ممكن يكون فيه بلاعة مثلا لا قدر الله مفتوحة أو يكون منسوب الميه عالي مثلا يضر بحاجة في كهربة العربية أو الكومبيوتر أو أي شئ ممكن الميه توصل له
طبعا انا عارف ان الظروف هيه اللي بتحطك في الموقف بس حاول تتفادي المشي بالميه على قد ما تقدر

**Mohamed_Ibiza** · 25-10-2008 04:58 AM

خليها على ربنا وربنا يباركلك في عربيتك ويكفيك شرها

**ibrahimsaad** · 25-10-2008 07:28 AM

المشاركة الأصلية كتبت بواسطة iunknown

نظرا لأن خبرتي في ميكانيكا/كهرباء السيارات لا تزيد عن معلوماتي في فيزياء الجوامدكنت عايز اسأل خبراء المنتدى عن تأثير القيادة في مياه عميقة (نوعا ما) على السيارة وما هو العمق الذى لا يصح ان تغوص فيه بالسيارة .

شكرا مقدما

توكل على الله وامشى بس برفق لغايه لما تعدى بسلام زى كده لسه امبارح عاملها وكانت الميه اكثر من 20 سم كمان والعربيه فيات 128

وماحصلش اى شئ وده بيتكرر كثير معايا ومع غيرى

بس عموما كلما تجنبت تلك الاماكن كان افضل طبعا لكن المضطر يركب الصعب هنعمل ايه قدرنا كده

**mrghost** · 25-10-2008 08:31 AM

هم حاجه الميه لاتزيد طبعا عن ارتفاع السياره نفسها عن الارض والا هتلاقى المياه داخله جوه العربيه وطبعا الميه مفروض متلمس الموتور لان المياه لو جت على اسبراتير العربيه العربيه هتقف ومش هتمشى الا لو الميه نشفت ومش هتمشى ولا بالطبل البلدى وطبعا الشكمان برضه بيتاثر بالحكايه دى لانه بيضعف لما تيجى عليه مياه خصوصا انه بيكون ساخن وكذلك اداء الفرامل بيقل نظرا لوجود المياه بين التيل والطنابير