انا كنت من فترة اشتكيت من الإضاءة الغير مرضية في السيفيك ٢٠٠٨
و بعد ارآء السادة المحترمين ولأني مبحبش اركب زينون غير الأصلي بتاع العربية
ولأني برده وقتي مش فاضي خالص اني اعمل حاجه تاخد وقت
اتصلت بشركة اوسرام و رد عليه شخصية مهذبة احمد الطيب ده مدير مبيعات هناك
و شرحلي اد ايه ان اللمبات تكون ٥٥ وات لكن تدي قوة اضاءة اكتر ب ١١٠ ٪
و اقتنعت بصراحة و قالي انزل شارع دمشق هتلاقيها عند ابراهيم يا عند المدينة
و فعلا سألت عند ابراهيم معندوش و قدامه واحد اسمه علي لقيت عنده ال plus مش ال unlimited
و سألت في المدينة لقيته و إداني خصم ظريف :)) من ١٩٥ ل ١٨٠ عشان خاطر استاذ احمد الطيب
و جابلي واحد ركبهم ب ٢٠ جنيه .....
المهم بكل بساطة اللمبات بجد روعة :)
قوة اضاءة غريبة ماشاء الله و وضوح جميل و لونهم مش ابيض تلجي ولا اصفر لونه درجه من درجات الزينون يعرفها اللي عنده زينون و عدسات ...
بس بجد فرقت كتير جداً و اللي عنده في الهوندا الفانوس بيتحرك و شغال هيعرف يظبط الفانوس بشكل محترم هيخلي الإضاءة كمان اجمل بكتير .....
ده اللي إتعمل و كان واجب انقل خبرتي للسادة البهوات ملاك الهوندا عشان نفيد و نستفيد
واتمنى اللي مدايق من الإضاءة يجربهم كحل سريع مش هياخد اكتر من ١٠ دقائق تركيب و تكلفة ٢٠٠ جنيه
بس هيستمتع بتكنولوجيا ألماني محترمة بجد و بسيطة في نفس الوقت ....
ملحوظة مش بعمل اعلان عن اللمبات :) بس فعلا هركبهم في ال c 240 ان شاء الله يوم الجمعة لانهم يستاهلو
و شكرا لحسن متابعتكم واتمنى اكون افدتكم بمعلومة جديدة ......