الموضوع: الجين ان 2 ومواصفاتها و عيوبها

السلام عليكم اولا انا معايا بروتون بيرسونا ٢٠٠٩ مانيوال عامله معايا ١٥٥٠٠٠ الف كيلو بدون عطل واحد مع الاخذ بالاعتبار اني بسافر سيناء ٢ ال٣ مرات في الشهر و بحكم شغلي كضابط ي طول بدخل مدقات و اقسم بالله في مدقات كانو العرب بيدخلوها بالمارادونا في ٤٥ دقيقه كنت انا بدخل في وقت اقل من ٢٠ دقيقه السياره اعتماديه لاقصي درجه في حالتي علي الاقل ثبات ممتاز لا يقارن بالالماني مثلا و لكن ثبات مرضي الغايه عفشه ناشفه و لكن عاليه الاحتمال من اول شراء السياره و مع المدقات طول خمس سنوات لم احتاج لتغيير سوي صوابع ميزان و جلب امامي و خلفي فقط الصاج محترم موتور قوي بس استهلاك البنزين عالي اما خلاصه رايي انها سياره فوق الممتازه في الفءه السعريه و لكن غايه في السوء من ناحيه اعاده البيع نهايه انا لا امدح في السياره لاني اصلااريد بيعها(عشان مانيوال) انا احاول نقل تجربتي ليستفيد من يستفيد

بعد إذن حضراتكم
استهلاك البنزين عالي آه بس مش مشكلة أوي لأن أي عربية مش معمولها صيانة صح أو ماتورها مش متلين صح (متفتح صح) هتاكل بنزين برضو غير إنها ١٦٠٠ وبرضوا الاستهلاك بيرجع لطريقة السواقة والمفروض إننا قبل ما نجيب أي عربية يبقى عندنا المعرفة السليمة للسواقة السليمة مش أي حد عنده واسطة يطلع رخصة ويقرف الناس ويقرف العربية.
من الآخر زي ما أنا قولت في المشاركة السابقة إن إختيار العربية دي بالزات راجع للمكان إللي هتمشي فيه وأنا محتاج مواصفات إيه لهذا المكان علشان تساعدني لأن مفيش عربية بدون عيوب أو توصل لمستوى البيرفكشن المهم أنا عاوز إيه وممكن أقبل عيوب معينة مقابل مميزات أهم ودي بتختلف من شخص لآخر.
ممكن تروح معرض تشوفها على الطبيعة وتقعد جواها (لأنها برضوا راحة نفسية) وياريت لو عندك أي معلومة جديدة تشاركنا بيها وبالتوفيق

المشاركة الأصلية كتبت بواسطة hmatchy

مميزات العربيه
صاج هايل وتقيل
عفشه ناشفه شويه وده معناه ثبات وراحه على السرعات العاليه ومش هتخليك تحس بالارهاق فى المسافات الطويله علشان مش هتعد تتنطط بس فى المقابل رخمه جو البلد اوى والشوراع المكسره
متور عزمه قوى (كامبرو) وده معناه سحب كويس اوى فى اول النقلات وبيشحط شويه على السرعات العاليه بعد 170 بس بردو مش هيخلى فى تاثير كبير للتكيف على السحب فى الطالعه
بتنزل بالبارك سنسور و الانزار
2 اير باج و فرامل abs - ebd مع جنوط سبور 15 وكاوتش 195 عرضه مع تقل الصاج والعافشه الثابته تبقى عربيه السيفتى بتاعها حلو اوى (بعد ستر ربنا طبع )
الشكل ده بقى ازواق
العيوب
تقفيل سيئ وفقير جدا جدا وخامات الصالون وحشه
حماره بنزين مع كامل الاحترام للاعضاء اللى قالو ان ممكن تغير بوابات او تعمل فيها حاجه بس بردو استهلاك بنزين عالى
قطع غيار مش متوفره اوى ولازم تعرف الاماكن اللى بتتباع فيها
اسعار قطع الغيار فى المتوسط زى اى عربيه لا رخيصه ولا غاليه
توكيل منيل بنيله وهتعتبر جايبها من غير ضمان يعنى هتصلح على حسابك الا بقى لو كارثه فى العربيه تروقلهم و تفضالهم
تقيله فى بيعها شويه لكن هتتباع بردو
فى النهايه هيا بالنسبه لسعرها ووسائل الامان اللى فيها سعرها كويس مش وحش

مع احترامي لحضرتك .. حضرتك معكش العربية عشان تقول حل المشكلة

اولا عربيتي معايا من سنة 2009 معرفتش احل مشكلة استهلاك البنزين غير اول 2014 بعد تغيير البوابة عشان كان عندي فيها مشكلة "صوت تكتكة ملحوظ وغير طبيعي" .. لكن لو البوابة سليمة مكنتش غيرتها وكمان الصيانة باستمرار هتجنب استهلاك البنزين العالي .. الهيدر المشروخ سبب استهلاك البنزين العالي ودي مشكلة منتشرة في البروتون وتم حلها بعد موديلات 2012 وكمان مشكلة البوابة اتحلت بعد نفس الموديل ده
لو تلاحظ في كلامي اني قولت انها بتستهلك اكتر من اغلب العربيات ال 1600 في السوق بس الفرق مش هيكون اكتر من 10-20 كيلو في الصفيحة

لو هنتكلم عن التوكيل .. التوكيل بيغير الاجزاء في الضمان علطول بدل ماتروح تشتكي في حماية المستهلك والكلام ده .. وكمان التوكيل الوحيد تقريباً اللي بيدي ضمان على العفشة كلها مع ضمان العربية مش بس 10000 كيلو ولا 20000 .. الاداء زي الزفت ونصابين ده طبيعي بردو في كل التوكيلات وانا اكتر واحد كنت بتخانق معاهم لما بروح وحصلي مشاكل كتير معاهم بس في نقطة الضمان هما الاحسن على الاطلاق

المشاركة الأصلية كتبت بواسطة hmatchy

معاك حق انا فعلا معيش العربيه بس انا اشتغلت فتره فى معرض موزع معتمد لماركه بروتون وليا اصحابى معاهم الجين
بس معروف ان المواتير الكام برو كلها استهلاكها عالى حتى الساجا ال 1300 وده لصالح العزم الكبير اللى بتطلعه المواتير دى
انا مش بهاجم العربيه انا قلت مميزاتها وعيوبها بدون تحيز ولو خت بالك من كلامى بردو انا قلت انها سعرها كويس على امكانيتها
نقطه التوكيل بقى اظن دى اصحاب العربيه نفسها ممكن يردو عنى فيها بالمواضيع والتعليقات اللى موجوده فى المنتدى هنا

يا فندم انا مكدبتكش بالنسبة لموضوع استهلاك البنزين لاني في المشاركتين اللي فاتوا قولت فعلاً انها اكتر عربية 1600 سي سي بتسحب بنزين .. ومش كل العربيات في مشكلة المانافولد زي عربيتي اللي كان فيها مشكلة من فترة كبيرة ومحدش فاهم حاجة في التوكيل