معلومات هامه بخصوص النظام الصوتي للبيجو ٥٠٨
مساء الخير
طبعا الفتره اللي فاتت الواحد كان مركز في امكانيات العربيه و سايب موضوع الساوند سيستم للاخر
ما علينا اول حاجه طبعا استعملت فلاشه عليها الاغاني المفضله و كنت واخد خلفيه ان مستوى الصوت فوق المتوسط و فضلت اظبط بيز و تريبل الى اخره و كانت الصدمه
الصوت اللي طالع و مقبول لغيري مش هيمشي معايا خالص و خصوصا اني كنت مركب في السيفيك جهاز دي في دي زي بتاع التوكيل كان عليه صوت و تنغيم زي الحلاوه من غير جي ام و على سماعات الفابريقه
و فعلا حاجه تنرفز يعني عربيه بالجمال ده استخسروا يحطوا فيها جهاز انضف شويه إن شاء الله صيني على سماعتين جامدين
مش لازم الجي بي ال و لو ان انهم كانوا زودوا المبلغ كام باكو فرق الاجهزه مش مشكله
الصوت من الاخر يسليك مش يمزكك
ابتديت الصراحه افكر في الحاجات الافترماركت لقيت هنخش في موالات ملهاش اخر و طبعا لو جبت جي ام لازم اخرم ورا الكنبه للسماعات ده ايه القرف ده
و انا قاعد بفكر في المشكله دي خصوصا اني سميع كبير و بعزف موسيقى طول عمري افتكرت اني عندي جهاز ايبود تاتش كنت راميه في السيفيك و ما بستعملوش
قلت ما يمكن يا واد ياهاني لو وصلته الصوت يتعدل و خصوصا انه جهاز بيطلع صوت و ليه اكولايزر بعكس الفلاشه
ما ضيعتش وقت و ركبته المفاجاءه الساره انه اشتغل بمنتهى السلاسه المفاجاءه الزفت ان الصوت مفرقش ان مكنش اقل كمان
الله يخرب بيت الحمار اللي حط الجهاز ده
ده انا اللي بقول
وانا ماشي و عمال اسمع اغاني انا عارفها و هطق من الغيظ من الصوت سرحت في حاجه كده لدرجة اني دخلت على السيتنج و لبست مطب صناعي محترم مش مهم كله يهون في سبيل الفن
اتاري يا جماعه ان كل ما تشغل مصدر معين لازم تظبط له الاكولايزر بتاعه يعني كل حاجه ليها ظبطه منفصله مش ظبطه واحده بتشغل الكل
طبعا قمت معلي التريبل على الاخر مع شوية بيز محترمين و لاودنيس و حبشتكنات لقيت العربيه قلبت ديسكو
يا بنت الك...... ولا بلاش
يبقى يا جماعه اللي عايز يطلع امكانيات الصوت بلاش الفلاشه ممكن ايبود او ايفون او موبيل او اي جهاز ام بي ثري رخيص المهم يكون ليه بطاريه بتتشحن عشان ما تقعدش تغير في بطاريات و يبقى شحنه من توصيلة ال يو اس بي
