إمبارح كنت على الطريق الزراعى مشوار حوالى 30 كيلو وزيهم راجع وطبعاً قلت فرصة أقرص على العربية شوية عشان الموتور يفوق شوية ويطلع من حالة الكسل اللى هو فيه من زحمة الشوارع ...
وقبل ما أوصل ب 4 كيلو العربية بدأت تنتش على خفيف وطبعاً وصلت مشوارى فتحت الكبوت ملحظتش حاجة غريبة بدور العربية كله تمام خلصت شغلى وراجع ويدوب مسكت الطريق والعربية بدأت تنتش جامد والمشكلة إن فيه إصلاحات فى الطريق لمسافة 3 كيلو والطريق يعتبر حارة واحدة ومليان تريلات يعنى لو العربية وقفت كارثة مفيش أى مجال أو مكان العربية تقف فيه ... قرصت على العربية شوية والحمد لله ( كعادة الماروتى عمرها ما عملت معايا دقة نقص ) وصلت بالسلامة رحت محل قطع غيار أشتريت بوجيهات لأنى عارف إن المشكلة منهم ( العربية متلتة ) طلعت على ميكانيكى لقيت بوجيه ضارب وطالع من مكانه خالص والباقيين عليهم هباب على الرغم إنهم مكملوش 7000 كيلو ...ركبت الطقم الجديد كله .... حسبى الله ونعم الوكيل فى التجار اللى بيكسبوا من حرام على حساب أروحنا وعربيتنا
وللعلم قطع الغيار المضروبة لقت هى الأصل والإستثناء إنك تلاقى قطع أصلية وطبعاً بما إنى مش ساكن فى القاهرة مفش بقدر أشترى قطع الغيار من التوكيل وبضطر إنى أشترى من التجار