كيف غيرت مهنتك أو دراستك في شخصيتك ؟؟

**د.أحمد سمير** · 22-07-2007 04:46 AM

سؤال دائماً يراودني .. ويهمني الحصول على إجابات منكم .. هل طبيعة المهنة أو الدراسة تؤثر في الشخصية بشكل كبير ، أنا أقول نعم ، لكن ياريت كل واحد يشرحلنا إيه أجمل صفة كانت فيه وضاعت بسبب العمل أو الدراسة ، وإيه أسوأ صفة كانت فيه والحمد لله ضاعت لنفس السبب ، وإيه الصفات الجميلة التي اكتسبها من خلال عمله ودراسته .
أبدأ بنفسي :
أنا أجمل صفة كانت فيا وراحت بسبب العمل هي الشعور بالشباب وصغر السن ، فوجئت بإني داخل الجامعة لازم يكون لي برستيج محترم ووقور وشعور زائد بكبر السن ، وعلى المدى الطويل تحول هذا الماسك الذي كنت أرتديه أيام ما كنت معيد وطالب في الدراسات العليا ، إلى شعور قاسي بأنني كبير في السن ، حتى مغامرات الشباب واندفاعه راحت بعد ما بقى تلامذتي في كل حتة وأكاد لا أخرج يوماً حتى أقابل من أعرفه .. فصرت حريصاً جداً في كل تصرفاتي وحركاتي .
أما أسوأ صفة كانت فيا وراحت بسبب العمل هي الكلام .. بقيت أحب اسمع أكثر من أن أتكلم ، وبقى صوتي واطي في الكلام بعيداً عن الحماس الزائد في الحديث والذي كان يجعل صوتي يرتفع بشدة دون قصد ، وأظن المسألة دي عززت كذلك شعوري بكبر السن .

تقبلوا جميعاً خالص مودتي

**AhmedElsayed** · 22-07-2007 10:50 AM

مواضيعك مميزة بجد يا دكتور احمد

انا مقتنع تماماً ان كل مهنة او حتى دراسة من الاول بتأثر فى الشخصية يعنى طالب الطب والهندسة بيبانوا

انا بقى دراستى الاقتصاد والعلوم السياسية أثرت عليا فى العقلية الناقدة يعنى بقيت ابص للأمور بنظرة ناقدة اكتر من الاول يعنى مش علشان الناس اجتمعت على حاجة تبقى صح ولا لازم غلط بس لازم احكم عقلى الاول
علشان كده ممكن ابقى مقتنع بحاجات كتير الحكومة بتعملها وشايفها ممتازة حتى لو الناس بتلطم منها وعمال تسب وتلعن

اتعلمت برده احسب كل حاجة واحسب حتى التكلفة غير المباشرة للموضوع

واتعلمت افكر لقدام اكتر من دلوقتى وكل حاجة بفكر فيها كاستثمار فارفض شغل بمرتب اعلى بكتير وبرستيج اعلى لانه مش حيكبرنى اوى فى المستقبل واختار وظيفة تانية مش حتدينى فلوس كتير لكن مستقبلها على المدى الطويل اعلى

والله اعلى واعلم

**hazem_khidr** · 22-07-2007 11:48 AM

انا اشتغلت في 3 اماكن :
اول مكان شركه ادويه كمندوب مبيعات و بصراحه استفدت كتير و خلتني اتعامل مع انماط كتير من الافراد و ابقي عارف اتعامل مع كل واحد ازاي لكن في نفس الوقت حسستني بالضآله من كتر الضغط اللي كان علي الواحد من المشرف و المدير.
تاني شغل ليا كان في الامارات و التجربه دي كلها اتعلمت منها حاجه واحده بس و هيا الصبر انا من النوع المتسرع و عاوز اعمل كل حاجه بسرعه لكن الغربه فعلا علمتني يعني ايه صبر في نفس الوقت علمتني مش ابقي مآمن لاي حد و احرس من ناس كتير و ما تبقاش نيتي صافيه لكل الناس و دي بحاول اخلص منها .
هنا بقي لما رجعت من الامارات و عملت مشروعي الخاص الصغير احساس تاني خالص لما ابقي مدير المكان دا احساس جميل الصراحه اني بنزل الشغل وقت ما انا عاوز و اسيبه زي ما انا عاوز برضه محدش يسالني رايح فين و جاي منين و كمان فرض عليا اني ما اهزرش مع حد و ابقي معظم الوقت جد علشان حاولت اتصرف بطبيعتي مع الناس اللي شغاله معايا لقيتهم سوري يعني في الكلمه حيدوني علي قفايا ف لقيت اني لازم اكشر دايما علشان ابقي كويس .

**AlmAhAtmA** · 22-07-2007 02:47 PM

في البدايه
انا بشتغل محلل مالي لاستثمارات راس المال
يمكن طبيعه الشغل بتديني فترات للتامل اكتر من العمل اليدوي
ده خلاني صامت خارجيا و صاخب داخليا
لكن اللي اثر فيه جدا هيه جنسيات الشركات اللي اشتغلت فيها
في البدايه تويو اليابانيه
و دي اتعلمت منها الاخلاص و حب الشركه و الانتماء الي اقصي الحدود
مديري كان بيعاملني زي ابنوا كان بيعلمني كل حاجه ازاي اكل اشرب اعيش
و علمني ازاي اروح الشغل الصبح نايم كويس و واكل كويس
و بعدين بكتل الانجليزيه
و دي اتعملت منها ازاي اوازن بين الحياه الشخصيه و العمل
لاني كنت بتعامل فيها مع ناس فوق ال 40 و كل واحد فيهم بعد الشغل بيعمل حاجه
كان فيهم واحد بيلعب جيتار و واحد كل همه جنوط العجل و مديرتي كانت بتتسلق جبال
و بعدين بكتل الامريكيه
و دي اتعلمت منها بعد النظر و ازاي اربط بين الاشياء
اول يوم دخلت فيه الشركه عطوني جدول بمواعيد الكورسات و التريننج لسنه قدام
و بعدين كادبوري الانجليزيه
و دي اتعلمت منها حب الشيكولاته :lol:

**sab3aawy** · 25-07-2007 02:10 PM

اعتقد اننى تأثرت بمجال العمل career بأكثر مما تأثرت بالمهنةprofission

فمجال عملى الحالى كمدير مشروعات فى احدى الشركات اكسبنى عدة صفات:

1-صفة لا أدرى اذا كانت طيبة ام سيئة وهى توقع الأسوأ دائما ممن حولى،وعدم توقع المعونة من اى شخص إلا فى حالة انه يقدم لى المعونة كنوع من انواع "تقديم السبت" حيث انه سيحتاج لى لاحقا

2- ايضا مجال عملى ساعد على اكون اكثر اتصالا مع المجموع البشرى المكون للمجتمع ، حيث اننى بطبيعتى انطوائى واعشق العزلة ولا اكره فى حياتى شيئا قدر رنين تليفون يمزق على الوحدة التى استتر بها بعد مواعيد العمل، وان كنت امارس الإتصال مع المجموع البشرى باعتباره واجب ثقيل وليس شئ محبب

3-بفضل مجال عملى اصبحت دائم التخطيط لمستقبلى ودائم التقسيم للمهام الكبرى فى حياتى الى مفردات اصغر واصغر حتى اصل للمفردات القابلة للتحقيق